រាជធានីភ្នំពេញ ៖ ប្រទេសកម្ពុជាមានប្រភពទុនផ្សេងមួយទៀតហើយ ដើម្បីអភិវឌ្ឍន៍ហេដ្ឋារចនាសម្ព័ន្ធ និងបង្កើនផលិតភាពសេដ្ឋកិច្ចរបស់ខ្លួនឲ្យកាន់តែប្រសើរឡើង ដោយមន្ត្រីជាន់ខ្ពស់កម្ពុជាបានឲ្យដឹងថា កម្ពុជាគ្រោងខ្ចីឥណទានពីធនាគារវិនិយោគហេដ្ឋារចនាសម្ព័ន្ធអាស៊ីហៅកាត់ AIIB នៅឆ្នាំ២០១៨ ខាងមុខ ។
លោក វង្សី វិស្សុត រដ្ឋមន្ត្រីស្តីទីក្រសួងសេដ្ឋកិច្ច និងហិរញ្ញវត្ថុ បានថ្លែងក្នុងជំនួបពិភាក្សាការងារជាមួយលោកបណ្ឌិត D.J. Pandian អនុប្រធានធនាគារវិនិយោគហេដ្ឋារចនាសម្ព័ន្ធអាស៊ី កាលថ្ងៃទី១៧ មករា កន្លងមកថា បច្ចុប្បន្ន កម្ពុជានៅមិនទាន់មានគោលនយោបាយខ្ចីឥណទានពីធនាគារ AIIB នៅឡើយទេ ប៉ុន្តែនៅឆ្នាំ២០១៨ខាងមុខ កម្ពុជានឹងពិនិត្យវាយតម្លៃសមត្ថភាពខ្ចីរបស់ខ្លួនឡើងវិញ នៅក្នុងក្របខ័ណ្ឌនៃការរៀបចំឯកសារយុទ្ធសាស្ត្រគ្រប់គ្រងបំណុលសាធារណៈ ២០១៩-២០២៣ ដើម្បីឲ្យកម្ពុជាអាចខ្ចីឥណទានពីធនាគារនេះយកមកបំពេញតម្រូវការដ៏ធំធេងនៃការអភិវឌ្ឍហេដ្ឋារចនាសម្ព័ន្ធសាធារណៈ និងបង្កើនផលិតភាពសេដ្ឋកិច្ច ។
លោករដ្ឋមន្ត្រីស្តីទីបានបង្ហាញជូនភាគីឲ្យបានជ្រាបអំពីស្ថានភាពនៃការអភិវឌ្ឍសេដ្ឋកិច្ចរបស់កម្ពុជា ក្នុងនោះរួមមាន ការសម្រេចបាននូវកំណើនសេដ្ឋកិច្ចខ្ពស់ប្រមាណជាង៧%ក្នុងមួយឆ្នាំ នៅក្នុងរយៈពេល២០ឆ្នាំចុងក្រោយនេះផងដែរ ។
ទាក់ទងនឹងការអភិវឌ្ឍវិស័យហេដ្ឋារចនាសម្ព័ន្ធនៅកម្ពុជា លោក វង្សី វិស្សុត បានបញ្ជាក់ថា វាគឺជាកិច្ចការអាទិភាពមួយរបស់រាជរដ្ឋាភិបាល ហើយការងារនេះ កម្ពុជាកំពុងសហការជាមួយដៃគូ ដើម្បីរៀបចំនូវផែនការមេនៃការតភ្ជាប់ដើម្បីអភិវឌ្ឍន៍វិស័យដឹកជញ្ជូន និងគមនាគមន៍ ក្នុងគោលដៅលើកកម្ពស់ការប្រកួតប្រជែង និងប្រសិទ្ធភាពសេដ្ឋកិច្ច។ ដូចនេះ កម្ពុជានឹងខិតខំស្រូបទាញយកផលប្រយោជន៍ពីកិច្ចសហប្រតិបត្តិការជាមួយធនាគារមួយនេះឲ្យបានឆាប់តាមដែលអាចធ្វើបាន ។
លោករដ្ឋមន្ត្រីស្តីទី បានស្នើឲ្យធនាគារមួយនេះជួយផ្តល់ជំនួយបច្ចេកទេសសម្រាប់ការរៀបចំផែនការមេនៃការអភិវឌ្ឍវិស័យថាមពល ដើម្បីធ្វើឲ្យថាមពលនៅកម្ពុជាមានតម្លៃសមរម្យ និងជួយលើកកម្ពស់ភាពប្រកួតប្រជែង ក្នុងនោះ រួមទាំងការគាំទ្រដល់គម្រោងអភិវឌ្ឍន៍ហេដ្ឋារចនាសម្ព័ន្ធរូបវន្តផ្សេងៗទៀតដូចជា ផ្លូវថ្នល់ ផ្លូវដែក និងវិស័យទូរគមនាគមន៍ជាដើម តាមរយៈយន្តការជាដៃគូរវាងរដ្ឋ និងវិស័យឯកជនផងដែរ ។
ធនាគារ AIIB ផ្តោតការផ្តល់ឥណទានទៅលើការអភិវឌ្ឍវិស័យហេដ្ឋារចនាសម្ព័ន្ធរូបវន្ត និងបង្កើនផលិតភាពសេដ្ឋកិច្ចផ្សេងទៀត ។
លោកបណ្ឌិត D.J. Pandian បញ្ជាក់ថា គោលបំណងនៃដំណើរទស្សនកិច្ចមកកាន់កម្ពុជានាពេលនេះ គឺដើម្បីលើកកម្ពស់កិច្ចសហប្រតិបត្តិការរបស់ខ្លួនជាមួយកម្ពុជា ដែលជាប្រទេសស្ថាបនិក ជាពិសេស ដើម្បីស្វែងយល់អំពីតម្រូវការរបស់កម្ពុជា នៅក្នុងការអភិវឌ្ឍវិស័យហេដ្ឋារចនាសម្ព័ន្ធរបស់ខ្លួន និងពិភាក្សាលើគម្រោងដែលមានសក្តានុពលនានា ដែលរាជរដ្ឋាភិបាលកម្ពុជាចង់ស្នើសុំហិរញ្ញប្បទានពីធនាគារនេះ ។
ធនាគារAIIB មានទីស្នាក់ការកណ្តាលរបស់ខ្លួននៅរដ្ឋធានីប៉េកាំង ប្រទេសចិន ។ ធនាគារនេះមានដើមទុនសរុបដំបូងចំនួន១០០ប៊ីលានដុល្លារអាមេរិក ក្នុងនោះដើមទុន៧៥% កាន់កាប់ដោយប្រទេសជាសមាជិកក្នុងតំបន់ និង២៥%ទៀតកាន់កាប់ដោយប្រទេសជាសមាជិកក្រៅតំបន់។ ធនាគារនេះជាស្ថាប័នហិរញ្ញវត្ថុអន្តរជាតិពហុភាគី ដូចគ្នានឹងធនាគារពហុភាគីនានាដែលមានស្រាប់ដូចជា ADB, WB, IFAD និង EIB ជាដើម ៕
ចែករំលែកព័តមាននេះ