ប្រទេសប៉ាគីស្ថាននឹងស្នើដល់ប៉ូលិសអន្តរជាតិ INTERPOL ឱ្យផ្សព្វផ្សាយដីកាចាប់ខ្លួនអន្តរជាតិប្រឆាំងអតីតប្រធានាធិបតី លោកព័រវេសមូសារ៉ាហ្វ ក្នុងក្របខណ្ឌនៃការស៊ើបអង្កេតលើការធ្វើឃាតអតីតនាយករដ្ឋមន្ត្រី លោកស្រីបេណាហ្សៀរ ប៊ូតូ។ ដីកាចាប់ខ្លួនដំបូងត្រូវបានចេញប្រឆាំងលោកមូសារ៉ាហ្វ នៅប៉ាគីស្ថានកាលពីថ្ងៃទី១២ កុម្ភៈ កន្លងមកនេះរួចដីកាមួយទៀតចេញថ្ងៃទី១៩ កុម្ភៈ។ តុលាការប៉ាគីស្ថានបានផ្តល់ពេលដល់អយ្យការរហូតដល់ថ្ងៃទី២ មេសា ដើម្បីអនុវត្តដីកាចាប់ខ្លួនទាំងនោះ។
លោកមូសារ៉ាហ្វ ធ្វើប្រធានាធិបតីប៉ាគីស្ថានពេលលោកស្រីបេណាហ្សៀរ ប៊ូតូ ត្រូវសម្លាប់នាថ្ងៃទី២៧ ធ្នូ ២០០៧ នៅទីក្រុងរ៉ាវ៉ាល់ពីនឌី ក្នុងការវាយប្រហារអត្តឃាតមួយនាឱកាសនៃអង្គមីទ្ទីងសំរាប់ឃោសនាបោះឆ្នោតសភាឆ្នាំ២០០៨។ ពេលនេះរស់នៅនិរទេសឯទីក្រុងឡុងលោកមូសារ៉ាហ្វ ទទួលការចោទប្រកាន់ថា ពុំបានបំពេញកាតព្វកិច្ចទាំងឡាយដើម្បីធានាដល់សន្តិសុខរបស់លោកស្រីបៀណាហ្សៀរប៊ូតូ។
រដ្ឋអាជ្ញាលោក CHAUDARY ZUL FIQAR ALI អះអាងកាលពីថ្ងៃទី២៦ មីនា ថាយើងបានបញ្ជូនសារលិខិត៣ច្បាប់ ហើយដល់រដ្ឋាភិបាលអង់គ្លេសដើម្បីឱ្យទទួលការអនុវត្តដីកាចាប់ខ្លួន។ ប៉ុន្តែរហូតមកទល់ពេលនេះយើងនៅពុំទាន់ទទួលបានដំណឹងណាមួយពីក្រសួងមហាផ្ទៃអង់គ្លេសនៅឡើយ ហើយយើងនឹងសរសេរទៅកាន់ប៉ូលិសអន្តរជាតិដើម្បីឱ្យជួយយើងអនុវត្តដីកាចាប់ខ្លួន ៕
ចែករំលែកព័តមាននេះ