«រ៉យទ័រ»ផ្សាយកាលពីពេលថ្មីៗកន្លងមកថា ការសិក្សាស្រាវជ្រាវរបស់អង្គការពលកម្មអន្តរជាតិ (ILO) បញ្ជាក់ថា ពលករលើសពីពាក់កណ្តាលក្នុងប្រទេសចំនួន៥នៅអាស៊ានមានហានិភ័យខ្ពស់នឹងបាត់បង់ការងាររបស់ខ្លួនដោយសារគ្រឿងចក្រស្វ័យប្រវត្តិ (មនុស្សយន្ត) ក្នុងរយៈពេល២០ឆ្នាំខាងមុខ ពិសេសស្ថិតនៅក្នុងឧស្សាហកម្មកាត់ដេរសម្លៀកបំពាក់ ។
ការស្រាវជ្រាវបញ្ជាក់ថា ពលករប្រហែល១៣៧លាននាក់ ឬ៥៦% នៃពលករកម្ពុជា ឥណ្ឌូណេស៊ី ហ្វ៊ីលីពីន ថៃ និងវៀតណាម ស្ថិតក្នុងក្រុមមានហានិភ័យខ្ពស់ ។
នាយកស្នាក់ការវិនិយោគិនរបស់អង្គការពលកម្មអន្តរជាតិថ្លែងថា «ប្រទេសដែលប្រកួតប្រជែងផ្នែកថ្លៃពលកម្មខ្ពស់ ចាំបាច់ត្រូវកែសម្រួលគោលជំហរជាថ្មី ព្រោះការមានប្រៀបលើថ្លៃនឹងមិនគ្រប់គ្រាន់ដល់ជំនួញ ។ ពលករត្រូវទទួលការងារហ្វឹកហាត់ឱ្យធ្វើការដ៏មានប្រសិទ្ធភាព គួបផ្សំនឹងគ្រឿងចក្រស្វ័យប្រវត្តិ»។ ភូមិភាគអាស៊ីអាគ្នេយ៍ ឬអាស៊ានមានប្រជាជនជាង៦៣០លាននាក់ និងជាមជ្ឈមណ្ឌលផ្នែកផលិត ដោយមានពលករជាង៩លាននាក់ ពីចំនួនពលករទាំងអស់បានបម្រើការនៅក្នុងឧស្សាហកម្មកាត់ដេរ វាយនភណ្ឌ និងស្បែកជើង ។ពលករឥណ្ឌូណេស៊ីមានប្រហែល៦៤% មានហានិភ័យខ្ពស់បាត់បង់ការងាររបស់ខ្លួនដោយសារគ្រឿងចក្រស្វ័យប្រវត្តិ ខណៈនៅប្រទេសវៀតណាមមានពលករប្រឈមមុខគ្មានការងារធ្វើដល់ទៅ៨៦% និងកម្ពុជា៨៨% ។
អង្គការសហប្រជាជាតិបញ្ជាក់ថា បច្ចេកវិទ្យានានា រួមទាំងការបោះពុម្ពប្រភេទ 3D និងមនុស្សយន្តអាចប្រជ្រៀតលើផ្នែកនេះ ។
ចំណែកឧស្សាហកម្មយានយន្ត និងគ្រឿងបន្លាស់របស់អាស៊ាន ស្ថិតនៅលំដាប់ទី៧នៅលើពិភពលោកក្នុងឆ្នាំ២០១៤ បានជួលការងារក្នុងផ្នែកនេះជាង៨០០.០០០នាក់ ខណៈពេលរបាយការណ៍បញ្ជាក់ថា ពលករក្នុងឥណ្ឌូណេស៊ី ច្រើនជាង៦០% និងថៃជាង៧០% ត្រូវប្រឈមមុខនឹងហានិភ័យគ្មានការងារធ្វើ ។
អង្គការពលកម្មអន្តរជាតិឱ្យដឹងថា «មនុស្សយន្តកំពុងទទួលការអភិវឌ្ឍឱ្យធ្វើការកាន់តែល្អមានតម្លៃថោក និងអាចធ្វើការរួមជាមួយមនុស្សបានកាន់តែច្រើនឡើង» ៕
ចែករំលែកព័តមាននេះ