កីឡា១២ប្រភេទ នឹងទៅហ្វឹកហាត់នៅចិនរយៈពេលវែង ត្រៀមស៊ីហ្គេម ២០២៣
- ភ្នំពេញ
រាជធានីភ្នំពេញ ៖ កីឡាចំនួន១២ប្រភេទរបស់កម្ពុជា នឹងចេញទៅហ្វឹកហាត់នៅប្រទេសចិន រយៈ
រាជធានីភ្នំពេញ ៖ កីឡាចំនួន១២ប្រភេទរបស់កម្ពុជា នឹងចេញទៅហ្វឹកហាត់នៅប្រទេសចិន រយៈ
រាជធានីភ្នំពេញ ៖ កីឡាចំនួន១២ប្រភេទរបស់កម្ពុជា នឹងចេញទៅហ្វឹកហាត់នៅប្រទេសចិន រយៈពេលយូរ ដើម្បីត្រៀមខ្លួនចូលរួមប្រកួតកីឡាស៊ីហ្គេម លើកទី៣២ ឆ្នាំ២០២៣ នៅកម្ពុជា។
តាមគម្រោង ការចាកចេញរបស់ក្រុមអត្តពលិកកម្ពុជាទាំង១២ប្រភេទកីឡា ស្មើនឹង ១៦១នាក់ គឺនៅក្នុងខែសីហា ឆ្នាំ២០២២ នេះតទៅ តាមរយៈការរៀបចំដោយគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) ក្រោមជំនួយឥតសំណងពីសំណាក់រដ្ឋាភិបាលចិន លើការហ្វឹកហាត់របស់កីឡាករ-កីឡាការិនីជម្រើសជាតិកម្ពុជា ។ ដើមឡើយគម្រោងនេះ គ្រោងចាប់ផ្ដើមកាលពីឆ្នាំ២០២១ ប៉ុន្តែដោយសារវិបត្តិជំងឺកូវីដ-១៩ ទើបត្រូវបានពន្យារពេល។
ឯកឧត្តម វ៉ាត់ ចំរើន អគ្គលេខាធិការ CAMSOCបានមានប្រសាសន៍ថា ឥឡូវនេះ តាមកិច្ចព្រមព្រៀងរវាងរាជរដ្ឋាភិបាលកម្ពុជា ជាមួយនឹងរដ្ឋាភិបាលសាធារណរដ្ឋប្រជាមានិតចិន គឺបានដល់ពេលត្រូវអនុវត្តនូវកិច្ចព្រមព្រៀងទាំងអស់នោះហើយ។
បានន័យថា ដោយស្ថានភាពនៅប្រទេសចិនមានការធូរស្រាលក្នុងការទទួលយកនូវកីឡាករ-កីឡាការិនី យើងចំនួន១៦១នាក់ ដែលត្រូវទៅហ្វឹកហាត់នៅប្រទេសចិន ពីឥឡូវរហូតទៅដល់ស៊ីហ្គេម ។ អ៊ីចឹង១២ប្រភេទកីឡាយើងបានរៀបចំអស់ហើយ។យើងកំពុងតែរៀបចំធ្វើវីសាឲ្យហើយដើម្បីបញ្ជូនទៅ ហើយថ្នាក់ដឹកនាំបានបញ្ជូនគោលការណ៍ទៅសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន CAMSOC ហើយ ដើម្បីទទួលបាននូវគោលការណ៍ និងរៀបចំដំណើរចេញទៅក្នុងពេលឆាប់ៗខាងមុខនេះ»។
កីឡាសរុបចំនួន១២ប្រភេទរួមមាន កាយសម្ព័ន្ធ, យូដូ, វូស៊ូ, បាល់បោះ, វាយកូនឃ្លីលើតុ, អត្តពលកម្ម, ចំបាប់, វាយសី, ហែលទឹក, លើកទម្ងន់, បាល់ទាត់ (នារី) និងបាល់ទះ ។ ឯកឧត្តមអគ្គលេខាធិការ មានប្រសាសន៍បន្ថែមថា ៖«យើងធ្វើយ៉ាងណាបង្រួមពេលវេលាឲ្យបានឆាប់ដើម្បីធ្វើឲ្យការអភិវឌ្ឍគុណផលកីឡាទទួលបានក៏ឆាប់ដែរ។
អ៊ីចឹងពេលវេលាយើងខ្លីក្នុងការហ្វឹកហាត់ ក៏ប៉ុន្តែយើងនៅតែមើលឃើញនូវការរៀបចំរបស់យើង ជំរុញការរៀបចំឲ្យទាន់ពេលវេលា ។ អ៊ីចឹងអ្វីដែលយើងរៀបចំសម្រាប់ហ្វឹកហាត់នៅក្រៅប្រទេស គឺមិនមែននៅតែចិនទេ ប៉ុន្តែទៅចិនពេលនេះគឺទ្រង់ទ្រាយធំ ។ មនុស្សច្រើន ហើយច្រើនវិញ្ញាសា ច្រើនប្រភេទកីឡា មានទាំងប្រភេទកីឡាជាក្រុម មានទាំងប្រភេទកីឡាឯកត្តជនផងដែរ ។ អ៊ីចឹងយើងត្រូវតែយកចិត្តទុកដាក់លើការថែទាំ លើការថែរក្សា»។
ឆ្លៀតក្នុងឱកាសនេះដែរ ឯកឧត្តម វ៉ាត់ ចំរើន បានថ្លែងអំណរគុណដល់រដ្ឋាភិបាលសាធារណរដ្ឋប្រជាមានិតចិន ដល់ភាគីរដ្ឋអំណាចកីឡាចិន ក៏ដូចជាអូឡាំពិកចិន ដែលបានទទួលយក និងជួយឧបត្ថម្ភគាំទ្រដល់ការហ្វឹកហាត់នេះទាំងស្រុង ទាំងសំបុត្រយន្ដហោះ ទាំងការស្នាក់នៅ ហូបចុក ទាំងការព្យាបាល ទាំងការថែទាំសុខភាពជំងឺកូវីដជាដើម ។ នេះជាកាយវិការមួយដ៏ប្រពៃណាស់ សម្រាប់ជួយដល់ព្រឹត្តិការណ៍កំណត់ត្រាប្រវត្តិសាស្ត្រស៊ីហ្គេម ២០២៣ របស់យើង៕
ចែករំលែកព័តមាននេះ