រាជធានីភ្នំពេញ ៖ ឈានចូលឆ្នាំថ្មី២០១៧ តារាសាច់សខ្ចីសុខ ពិសី បានដាក់តម្លៃខ្លួនសម្តែងខ្ពស់ជាងមុន ។ មានប្រភពលើកឡើងថា សុខ ពិសី ដំឡើងថ្លៃខ្លួនខ្ពស់ជាងមុនស្របពេលកេរ្តិ៍ឈ្មោះសិល្បៈរបស់នាងកាន់តែលូតលាស់ខ្លាំង ។
តារាចម្រៀងប្រចាំផលិតកម្មសាន់ដេកញ្ញាសុខ ពិសី បានធ្វើឲ្យកក្រើកជាមួយនឹងការសម្តែងក្នុងរយៈពេលប៉ុន្មានឆ្នាំចុងក្រោយនេះ។ បច្ចុប្បន្នការទទួលការងារថ្មីជាបន្តបន្ទាប់ ធ្វើឲ្យតារាស្រីរូបនេះបញ្ចេញតម្លៃខ្លួនថ្មីឡើងខ្ពស់ជាងឆ្នាំមុន ។ តារាចម្រៀងសុខ ពិសី បានសម្រេចស្នាដៃ ធំៗជាច្រើនកាលពីឆ្នាំចាស់ ពិសេសនាងទើបទទួលបានគ្រឿងឥស្សរិយយសពីព្រះមហាក្សត្រដែលបំពាក់ដោយប្រធានអង្គភាពប្រឆាំងអំពើពុករលួយ ។ ចូលឆ្នាំ២០១៧ភ្លាម តារាចម្រៀងសុខ ពិសី ត្រូវផលិករទម្លាយពីការទាមទារតម្លៃខ្លួនខ្ពស់ជាងឆ្នាំមុន ។
ប្រភពបញ្ជាក់ថា សុខ ពិសី ដែលពីមុនទទួលច្រៀងក្នុងកម្មវិធីប្រគំតន្ត្រីចន្លោះពី១.៥០០ទៅ១.៨០០ដុល្លារអាមេរិក ប៉ុន្តែពេលនេះនាងប្រកាសឡើងតម្លៃខ្លួនចាប់ពី២ពាន់ទៅជាង២ពាន់ដុល្លារអាមេរិក ។ តម្លៃខ្លួននេះប្រហាក់ប្រហែលតារាចម្រៀងឱក សុគន្ធកញ្ញា និងមាស សុខសោភា ។ ការដំឡើងតម្លៃខ្លួន ស្របពេលដែលតារាចម្រៀងសុខ ពិសី ទទួលបានការងារសិល្បៈច្រើន ពិសេសការសម្តែងក្នុងឈុតឆាកផ្សព្វផ្សាយពាណិជ្ជកម្ម ធំៗជាបន្តបន្ទាប់ ។
ក្នុងជំនួបជាមួយតារាចម្រៀងសុខ ពិសី កាលពីពេល ថ្មីៗកន្លងមកនាងបញ្ជាក់ថា នាង សប្បាយចិត្តនឹងការងារដែលសម្រេចបានក្នុងពេលកន្លងមកទាំងកម្មវិធី ធំៗ និងកម្មវិធីសប្បុរសធម៌នានា ។ ក្នុងឆ្នាំថ្មីនេះតម្លៃខ្លួននៃការចូលរួមច្រៀងរបស់នាងឡើងខ្ពស់ជាងមុនបន្តិច ព្រោះតែការចំណាយ និងផ្គត់ផ្គង់ក្រុមរាំរបស់នាងក៏មានកំណើនដែរ ។
ទទួលស្គាល់ថាតម្លៃខ្លួនអាចប្រហាក់ប្រហែលទៅនឹងការលើកឡើងនោះមែន ប៉ុន្តែនាងសុំមិនបញ្ជាក់លម្អិតទេ ។ «នាងខ្ញុំមិនសម្លឹងមើលឃើញតែប្រាក់ជាធំទេ ប៉ុន្តែសម្រាប់ការងារប្រគំតន្ត្រីមនុស្សធម៌នាងខ្ញុំនៅតែជួយទៅតាមលទ្ធភាព និងពេលវេលាអំណោយផល» ។
អ្នកផលិតកម្មវិធីប្រគំតន្ត្រីដដែលនោះលើកឡើងថា ការដំឡើងថ្លៃខ្លួនរបស់តារាចម្រៀងសុខ ពិសី មិនធ្វើឲ្យប៉ះពាល់ដល់ទីផ្សារការងារសិល្បៈរបស់នាងទេ ប៉ុន្តែនាងកាន់តែមានឱកាសច្រើនជាមួយនឹងគូប្រជែងទៅវិញ ព្រោះសុខ ពិសីបង្ហាញពីគំនិតច្នៃប្រឌិតថ្មីជាមួយការច្រៀង និងក្រុមរាំរបស់នាង ។
តារាលំដាប់ជួរមុខនៅផលិតសាន់ដេកញ្ញាសុខ ពិសីបានវិវឌ្ឍការសម្តែងជាបន្តបន្ទាប់ដោយគេសង្កេតឃើញនាងប្តូររបៀបសម្តែង គឺក្រៅពីច្រៀងបែបមនោសញ្ចេតនាតែម្នាក់ឯង នាងកែប្រែមកច្រៀងមានអមដោយក្រុមរាំជាប្រចាំ ។ មូលហេតុនេះហើយកាន់តែជួយជំរុញឲ្យតារាស្រីម្នាក់នេះស្ថិតនៅក្នុងការតាមដានយ៉ាងខ្លាំងពីអ្នកគាំទ្ររបស់នាង ។ រាល់ពេលសុខ ពិសី សម្តែងនៅទីណា អ្នកគាំទ្ររបស់នាងតែងតែនាំគ្នាទៅអបអរសាទរជាប្រចាំ ៕
ចែករំលែកព័តមាននេះ