ខេត្តកំពង់ឆ្នាំង ៖ រយៈពេលប៉ុន្មានថ្ងៃនេះ ក្នុងបណ្តាញសង្គម ហ្វេសប៊ុក បានចាប់អារម្មណ៍ជាខ្លាំង ដោយសារតែមានការបង្ហោះរូបភាព ពីជីវិតកុមារកំព្រា២នាក់បងប្អូនតូចៗ
ខេត្តកំពង់ឆ្នាំង ៖ រយៈពេលប៉ុន្មានថ្ងៃនេះ ក្នុងបណ្តាញសង្គម ហ្វេសប៊ុក បានចាប់អារម្មណ៍ជាខ្លាំង ដោយសារតែមានការបង្ហោះរូបភាព ពីជីវិតកុមារកំព្រា២នាក់បងប្អូនតូចៗ រស់ដោយឯកោ ចញ្ចឹមជីវិត ធ្វើអំបោសលក់ ក្នុងនោះកូនប្រុសបងអាយុទើបតែ៩ឆ្នាំ និងកូនស្រីប្អូនអាយុ៧ ឆ្នាំប៉ុណ្ណោះ ពួកគេរស់នៅភូមិទឹកចេញ ឃុំជើងគ្រាវ ស្រុករលាប្អៀរ។ បន្ទាប់ការផុសរូបដ៏គួឲ្យអាណិតនេះមក ក៏មានសប្បុរជនជាច្រើននាំគ្នាយកអំណោយទៅផ្តល់ឲ្យកុមារកំព្រាខាងលើនេះ ជាបន្តបន្ទាប់។
ជាមួយនឹងក្តីអាណិតអាសូរ ដល់កុមារកំព្រាពីរនាក់បងប្អូននេះ ក៏លេចចេញជាសំណួរសួរថា តើកុមារតូចៗនេះរស់នៅដោយរបៀបម៉េច បើបងទើបតែអាយុ៩ឆ្នាំ ហើយចុះអាជ្ញាធរភូមិឃុំយ៉ាងម៉េចក៏បណ្តោយឲ្យក្មេងទាំងពីររស់ត្រមង់ត្រមោច តែពីរនាក់បងប្អូនបែបនេះ។ ដោយចង់ដឹងច្បាស់ភ្នាក់ងារយើងបាន ចុះទៅដល់ទីកន្លែងរបស់កុមារកំព្រាខាងលើ ដើម្បីយកការពិតមកបង្ហាញជូនមិត្តអ្នកអាន។ តាមពិតពេលទៅដល់ គឺបានដឹងជាស្រេចទៅហើយថា ក្មេងទាំងពីរនាក់នេះពិតជាកំព្រាពិតមែន តែពួកគេរស់ក្រោមការគ្រប់គ្រងរបស់ជីដូន ជីតា មិនមែនឯកោនោះទេ។
ស្ត្រីឈ្មោះ ឃុន នីម អាយុ៥៨ឆ្នាំ ដែលត្រូវជាជីដូន របស់កុមារទាំងពីខាងលើបានរៀបរាប់ថា ចៅប្រុសច្បងរបស់គាត់ឈ្មោះ ធា សារិទ្ធ អាយុ៩ឆ្នាំ ចៅស្រីឈ្មោះ ធា រតនា អាយុ៧ឆ្នាំ ឪពុកពួកគេ ឈ្មោះ ធា ចំណែកម្តាយឈ្មោះ ប៉េស នីន ។ ឪពុកម្តាយពួកគេបានលែងលះគ្នា ជាង៧ឆ្នាំមកហើយ ។ ក្រោយពេលលែងលះគ្នា ម្តាយពួកគេដែលកូនស្រីគាត់ បានមកផ្ទះនៅជិតគាត់ ក្រោយមក បានទៅធ្វើការនៅថៃបាត់ដំណឹងឈឹង មិនដឹងថាយ៉ាងម៉េចមិនដែលមានទំនាក់ទំនងអ្វីសោះ សង្ស័យថៃចាប់ទេ ព្រោះទៅធ្វើការអត់ច្បាប់។
ស្ត្រីចំណាស់រូបនោះបានបញ្ជាក់ថា ដីស្រែរបស់ម្តាយពួកគេទាំងពីរ ត្រូវបានម្តាយគេយកទៅបញ្ចាំគេអស់ហើយ ចំណែកសព្វថ្ងៃ ចៅគាត់ទាំងពីរមិនបានរៀនសូត្រអ្វីទេ ព្រោះសាលានៅឆ្ងាយ។ នៅព្រឹកថ្ងៃទី១៨ ខែមករា នេះខណៈដែលភ្នាក់ងារ យើងបានទៅដល់ទីនោះ ក៏មានសប្បុរជនជាច្រើន បាននាំអំណោយ យកទៅឲ្យកុមារកំព្រាខាងលើនេះជាបន្តបន្ទាប់ ក្នុងនោះសប្បុរជនម្នាក់បានចំណាប់អារម្មណ៍ថា គាត់ពិតជាសង្វេគខ្លាំងណាស់ ពេលបានឃើញគេបង្ហោះក្នុងហ្វេសបុកថា កុមារកំព្រាខាងលើនៅតូចៗ ចេះរស់ដោយខ្លួនឯង លើការធ្វើអំបោសលក់ ពិតជាគួរកោតសសើរមែនទែន ។ ជាមួយគ្នានោះផងដែរ លោក ផូ យ៉ាន មេភូមិទឹកចេញថ្មី បានឲ្យដឹងថា កុមារទាំងពីរពិតជាកំព្រាពិតមែន ប៉ុន្តែពួកគេរស់ក្រោមការគ្រប់គ្រងរបស់តា យាយ និងឪពុកមា ដែលមានជីវភាពធម្មតា។
ឪពុកម្តាយពួកគេបានលែងលះគ្នាជាង៧ឆ្នាំហើយ តាំងពីរនៅតូចៗម្លេះ។ ចំណែកម្តាយបានទៅធ្វើការនៅថៃត្រង់ថា បានផ្ញើប្រាក់កាសមកម្តាយដើម្បីចិញ្ចឹមចៅទាំងពីរនេះ គាត់មិនច្បាស់ទេតែចាំថា កាលពីខែមីនា ឆ្នាំ២០១៦ ឃើញម្តាយមកលេងផ្ទះមួយរយៈ ហើយក៏ត្រឡប់ទៅវិញ រហូតមកដល់ពេលនេះ មិនឃើញមកទៀតទេ។ លោកបានបញ្ជាក់ថា តាមលោកបានដឹង មេភូមិចាស់បានប្រាប់គាត់ជាមេភូមិថ្មីថា ម្តាយកុមារទាំងពីរ បានទទួលចំណែកដីស្រែ និងដីភូមិមួយកន្លែងដែរ។
ទោះយ៉ាងណាក្តី កុមារទាំងពីរនាក់ពិតជារស់នៅក្រោមការគ្រប់គ្រងរបស់ជីដូន ជីតា និងឪពុកមា ពិតមែន មិនដល់ថ្នាក់រស់ដោយឯកាតែពីរនាក់បងប្អូនឡើយ ហើយការចុះទៅយកព័ត៌មានដើម្បីបញ្ជាក់ការពិតនេះ គ៏គ្មានន័យចង់បង្អាក់ការផ្តល់ជំនួយដល់កុមារខាងលើនេះដែរ ការជួយជនក្រីក្រ ពិសេសកុមារកំព្រា គឺជាទឹកចិត្តរបស់ខ្មែរ យើងដែលកាន់ព្រះពុទ្ធសាសនា ហើយ ចំណែកការច្នៃព័ត៌មានឲ្យកាន់តែកម្សត់បន្ថែមទៀត ដោយបំណងអ្វីផ្សេងនោះ ទុកឲ្យមិត្តអ្នកអានពិចារណាចុះ៕
ចែករំលែកព័តមាននេះ