ប្រធានាធិបតីរុស្ស៊ី លោក វ្ល៉ាឌីមៀរ ពូទីន កាលពីថ្ងៃទី១៧ មករា សម្តែងជាថ្មីពីបំណងស្តារទំនាក់ទំនងធម្មតាឡើងវិញជាមួយសហរដ្ឋអាមេរិក ក្រោយការចូលកាន់កា.ប់សេតវិមានរបស់លោក ដូណាល់ ត្រាំ ។
ប្រធានាធិបតីរុស្ស៊ី លោក វ្ល៉ាឌីមៀរ ពូទីន កាលពីថ្ងៃទី១៧ មករា សម្តែងជាថ្មីពីបំណងស្តារទំនាក់ទំនងធម្មតាឡើងវិញជាមួយសហរដ្ឋអាមេរិក ក្រោយការចូលកាន់កាប់សេតវិមានរបស់លោក ដូណាល់ ត្រាំ ។
ដោយគូសបញ្ជាក់ថា លោកពុំធ្លាប់ជួបសោះជាមួយអនាគតប្រធានាធិបតីអាមេរិក លោកពូទីន ក៏លើកឡើងជាថ្មីដែរ ក្នុងសន្និសីទសារព័ត៌មានមួយថា ពាក្យចចាមអារ៉ាមនានាពីការមានវីដេអូប៉ះពាល់លោកត្រាំ ដែលក្រុងមូស្គូអាចប្រើ ដើម្បីធ្វើការគាបសង្កត់លើលោកដូណាល់ ត្រាំ នោះសុទ្ធតែជាការប្រឌិតទាំងអស់។
លោកពូទីន បន្តថា ពេលលោកត្រាំ មកកាន់ក្រុងមូស្គូ ខ្ញុំពុំទាំងនឹកឃើញកាលបរិច្ឆេទផង ព្រោះលោកពេលនោះពុំមែនជាឥស្សរជននយោបាយ ។ យើងទាំងអស់គ្នាក៏មិនដឹងថា លោកត្រាំ មានមហិច្ឆិតានយោបាយផងដែរ ។ តើមនុស្សមួយចំនួនគិតថា ពួកភ្នាក់ងារពិសេសរុស្ស៊ីរត់ដេញតាមពីក្រោយគ្រប់មហាសេដ្ឋីអាមេរិកទាំងអស់ឬ ? ប្រាកដជាគ្មានទេ ដូច្នេះគេនិយាយបែបនោះគ្មានន័យអីទាំងស្រុង ។
ចំណែករដ្ឋមន្ត្រីការបរទេសរុស្ស៊ី លោកស័រ ហ្គេយ ឡាវរ៉ូវ វិញគូសបញ្ជាក់ថា ក្រុងមូស្គូត្រៀមចរចាជាមួយអនាគតរដ្ឋាភិបាលអាមេរិកពិសេស ស្តីពីបញ្ហាទាំងឡាយទាក់ទិននឹងស៊ីរី ឬអាវុធនុយក្លេអ៊ែរ ។
លោកបន្តថា ទោះបីវាជាការប្រញាប់ប្រញាល់ពេក ដើម្បីដឹងថា តើក្រុងវ៉ាស៊ីនតោននឹងមាននយោបាយបែបណា តែលោកពោលថា មានការលើកទឹកចិត្តតាមរយៈសេចក្តីថ្លែងការណ៍នានារបស់បណ្តាអនាគតសមាជិករដ្ឋការលោកត្រាំ ដែលចង់ឱ្យមានការពិនិត្យឡើងវិញ លទ្ធភាពនៃទំនាក់ទំនងទ្វេភាគីល្អប្រសើរមួយ ។
លោកឡាវរ៉ូវ គូសបញ្ជាក់ថា លោកត្រាំ មានទស្សនៈពិសេសនានាដែលខុសស្រឡះច្រើនពីអ្នកកាន់អំណាចមុនលោក ។ ដោយផ្តោតលើការស្វែងរកផលប្រយោជន៍ទៅវិញទៅមក យើងអាចដោះស្រាយបញ្ហាមួយចំនួនធំ ។ ពិសេសបំផុតករណីស៊ីរីតាមដែលយើងស្តាប់សម្តីលោកត្រាំ និងក្រុមរបស់លោកបង្ហាញពីពួកគេមានទស្សនៈខុសគ្នាស្រឡះពីទស្សនៈរបស់លោកបារ៉ាក់ អូបាម៉ា ៕
ចែករំលែកព័តមាននេះ