សេតវិមានប្រកាសនាថ្ងៃទី១៧ មករា ថា លោកបារ៉ាក់ អូបាម៉ា បានសម្រាលទោសដល់មនុស្ស២០៩នាក់ ហើយឱ្យមានការដោះលែងអ្នកទោស៦៤នាក់ ក្នុងនោះមានអតីតសហការីរបស់ WIKILEAKS នាង CHELSEA MANNING ដែលនឹងទទួលបានសេរីភាពថ្ងៃទី១៧ ឧសភា ឆ្នាំ២០១៧ ខាងមុខនេះ ។
នារីជាទាហានវះកាត់ប្តូរភេទរូបនេះ ដែលពីមុនមានឈ្មោះថា BRADLEY MANNING ទទួលការកាត់ទោសកាលពីខែសីហា ឆ្នាំ២០១៣ ពីបទបញ្ជូនឯកសារសម្ងាត់ដល់ទៅ៧០០.០០០ឱ្យដល់វ៉េបសាយ WIKILEAKS ហើយពុំមានសង្ឃឹមចេញពីគុកមុនឆ្នាំ២០៤៥ ឡើយ ។
កាលពីខែវិច្ឆិកា កន្លងមកនេះ នាង CHELSEA MANNING បានផ្ញើសារលិខិតមួយច្បាប់ជូនប្រធានាធិបតី លោកបារ៉ាក់ អូបាម៉ា ដើម្បីពន្យល់ប្រាប់ថា នាងពុំស្នើការសុំលើកលែងទោសឡើយ តែនាងសង្ឃឹមលើការកាត់បន្ថយទោស ។ នាងសរសេរថា បំណងតែមួយដែលខ្ញុំស្នើ គឺឱ្យបានចាកចេញពីពន្ធនាគារយោធាក្រោយការជាប់នៅទីនោះរយៈពេល៦ឆ្នាំ ។ នាងគូសបញ្ជាក់ថា ដាច់ខាតនាងគ្មានចេតនាធ្វើឱ្យប៉ះពាល់ដល់ផលប្រយោជន៍របស់សហរដ្ឋអាមេរិក ឬរបស់បណ្តាសមាជិកកងទ័ពឡើយ ។
មានអាយុ២៩ឆ្នាំ នាង CHELSEA MANNING ធ្លាប់ប៉ុនប៉ងសម្លាប់ខ្លួនកាលពីខែតុលា បន្ទាប់ពីការប៉ុនប៉ងធ្វើអត្ថឃាតដំបូងកាលពីខែកក្កដា ។ នាងក៏ប្រកាសផងដែរ កាលពីខែកញ្ញា ធ្វើកូដកម្មអត់អាហារក្នុងពន្ធនាគារយោធា FORT LEAVENWORTH រដ្ឋកាន់សាស់ ដើម្បីឱ្យទទួលបានការព្យាបាលចាំបាច់សម្រាប់ការវះកាត់ប្តូរភេទរបស់នាង ។
ត្រូវបានពួកអ្នកគាំទ្រចាត់ទុកថា ជាវីរនារី ព្រោះហ៊ានលាតត្រដាងពីការរំលោភបំពានរបស់សហរដ្ឋអាមេរិកនៅអីុរ៉ាក់ និងនៅអាហ្វហ្គានីស្ថាននោះ នាង MANNING ត្រូវបានតុលាការយោធាអាមេរិកកាត់ទោសពីបទក្បត់ជាតិដោយធ្វើឱ្យប្រទេស និងបណ្តាមិត្តជាទាហានរបស់នាងជួបគ្រោះថ្នាក់ ៕
ចែករំលែកព័តមាននេះ