មនុស្សយ៉ាងតិច៥២នាក់ស្លាប់ និង១២០នាក់ទៀតរងរបួស ដោយសារការទម្លាក់គ្រាប់បែកច្រឡំរបស់កងទ័ពអាកាសនីហ្សេរីយ៉ា ត្រូវចំជំរំជនភៀសខ្លួនមួយនៅទីក្រុង RANN រដ្ឋប័រណូភាគឦសាននីហ្សេរីយ៉ា ។
ក្នុងសេចក្តីប្រកាសមួយអង្គការគ្រូពេទ្យគ្មានព្រំដែន MSF ថ្លែងថា ការវាយប្រហារនេះ ប្រឆាំងបណ្តាមនុស្សដែលជួបប្រទះភាពយ៉ាប់យ៉ឺនស្រាប់ ដោយការរត់ភៀសខ្លួនចេញពីអំពើហិង្សារបស់ពួកជ្រុលនិយមជារឿងគួរឱ្យក្តុកក្តួលបំផុត និងមិនអាចទទួលយកបាន ។ លោក JEAN CLEMENT CABROL នាយកប្រតិបត្តិការរបស់ MSF ថ្លែងតាមរយៈសេចក្តីប្រកាសនេះថា សន្តិសុខរបស់ជនស៊ីវិលត្រូវតែគោរព ។ យើងអំពាវនាវយ៉ាងទទូចបំផុតដល់គ្រប់ភាគីឱ្យជួយសម្រួលដល់ការជម្លៀសចេញតាមផ្លូវអាកាស ឬតាមផ្លូវគោក បណ្តាអ្នកនៅរស់រានមានជីវិតដែលត្រូវការនូវការសង្គ្រោះបន្ទាន់ ។
កងទ័ពអាកាសនីហ្សេរីយ៉ាចាត់ទុកការទម្លាក់គ្រាប់បែកនេះ ច្រឡំត្រូវចំជំរំជនភៀសខ្លួន កាលពីថ្ងៃទី១៧ មករា នៅទីក្រុង RANN ថា ជារឿងគួរឱ្យសោកសៅ និងគួរឱ្យសោកស្តាយខ្លាំងបំផុត ។
អ្នកនាំពាក្យកងទ័ពអាកាសនីហ្សេរីយ៉ា លោក AYODELE FAMUYIWA ថ្លែងថា កងទ័ពអាកាសសម្តែងការក្រៀមក្រំចំពោះការវាយប្រហារច្រឡំរបស់កងយន្តហោះប្រដេញរបស់ខ្លួននៅទីក្រុង RANN តំបន់ KALA BELGE រដ្ឋប័រណូ ដែលបណ្តាលឱ្យបាត់បង់ជីវិតជនស្លូតត្រង់យ៉ាងច្រើន ។
ម្យ៉ាងវិញទៀត អាជ្ញាធររដ្ឋប័រណូ បានបញ្ជាដល់គ្រប់មន្ទីរពេទ្យ និងគ្រប់ភ្នាក់ងារសុខាភិបាលឱ្យទទួលជួយការសង្គ្រោះបន្ទាន់ដល់បណ្តាអ្នករបួស ព្រោះការវាយប្រហារតាមអាកាសនេះ ៕
ចែករំលែកព័តមាននេះ