រាជធានីភ្នំពេញ ៖ សម័យបច្ចុប្បន្ននេះ រឿងដែលគួរឱ្យព្រួយបារម្ភខ្លាំងទាក់ទងនឹងអក្សរសាស្ត្ររបស់ខ្មែរយើង គឺសរសេរមានការភ្លាំងភ្លាត់ ហើយការសរសេរទៀតសោត គឺសរសេរឱ្យតែបានៗ។ នៅសម័យបច្ចេកវិទ្យាទំនើបនេះផងដែរ យើងឃើញថា បងប្អូនអ្នកប្រើប្រាស់បណ្តាញសង្គមមានការកើនឡើង និងបានប្រើប្រាស់បណ្តាញសង្គម ដូចជា ហ្វេសប៊ុក អ៊ីនស្តាក្រាម និងធ្វីតទ័រ (Twitter) ជាដើម សម្រាប់ធ្វើការចែករំលែកនូវទស្សនៈ និងរូបភាពជារូបថត ជារូបវីដេអូផ្សេងៗនៅលើគណនីបណ្តាញសង្គមរបស់គាត់។
ជាមួយគ្នានោះ អ្នកប្រើប្រាស់បណ្តាញសង្គមក៏អាចផ្សព្វផ្សាយ និងសរសេរនូវអ្វីដែលគាត់យល់ឃើញ ក៏ប៉ុន្តែអ្វីដែលគួរឱ្យកត់សម្គាល់ គឺការសរសេរអក្សរសាស្ត្រជាតិ គឺមានការខុសច្រើន ដោយបងប្អូនខ្លះគឺសរសេរប៉ាតណាប៉ាតណី ខុសអក្ខរាវិរុទ្ធ ឬក៏យកភាសានិយាយ យកមកសរសេរជាភាសាសរសេរជាដើម។
តួយ៉ាងដូចជាពាក្យ «ខ្ញុំ» តែបច្ចុប្បន្ននេះ បងប្អូនយើងខ្លះយកអក្សរសាស្ត្រជាតិមួយពាក្យនេះ មកសរសេរ «ញុំ» ឬ «ញ៉ុម» មកប្រើប្រាស់ជំនួសពាក្យ ដែលត្រឹមត្រូវតាមក្បូនច្បាប់អក្សរសាស្ត្រទៅវិញ ហើយការសរសេរខុសអក្ខរាវិរុទ្ធបែបនេះ ក៏សបញ្ជាក់ថា ជាទង្វើមួយមិនល្អ ដែលប៉ះពាល់ដល់អក្សរសាស្ត្ររបស់ជាតិ ។
សំណួរចោទសួរថា ហេតុអ្វីបងប្អូនយើងសរសេរខ្មែរខុសអក្ខរាវិរុទ្ធ0x017d7 បើនៅតែសរសេរតៗគ្នាដូច្នេះទៀត លើបណ្តាញសង្គម តើអក្សរសាស្ត្រជាតិខ្មែរ អាចនឹងបាត់បង់ដែរឬទេ នាពេលអនាគត?។
ជុំវិញរឿងរ៉ាវនៃការសរសេរខ្មែរខុសអក្ខរាវិរុទ្ធ ឬការយកភាសានិយាយ យកមកសរសេរនាំឱ្យខុសក្បួនច្បាប់អក្សរសាស្ត្រនេះ ក៏ទទួលបានការចាប់អារម្មណ៍យ៉ាងខ្លាំងពីលោក ហម ឈរ៉ា ដែលជាសិល្បករជើងចាស់មួយរូប។
ថ្មីៗនេះ លោក ហម ឈរ៉ា ដែលជាតារាភាពយន្តខ្មែរល្បីឈ្មោះមួយដួង បានបញ្ចេញទស្សនៈរបស់លោកលើបញ្ហាអក្សរសាស្ត្រជាតិខ្មែរ។ លោក ហម ឈរ៉ា ដែលតែងស្រលាញ់ចូលចិត្ត ការពារ និងអភិរក្សជានិច្ចនូវវប្បធម៌ អរិយធម៌ខ្មែរ និងអក្សសាស្ត្រជាតិខ្មែរ ត្រូវបានមហាជនអ្នកគាំទ្រ ស្រលាញ់ចូលចិត្តនូវទង្វើល្អរបស់លោកជាខ្លាំង ចាប់តាំងពីឈានជើងប្រឡូកក្នុងវិស័យសិល្បៈ រហូតមកដល់ពេលបច្ចុប្បន្ននេះ លោក ហម ឈរ៉ា មិនដែលលេចធ្លាយ ឬមានរឿងអាស្រូវម្ដងណាឡើយ ពោលគឺមិនដូចអ្នកសិល្បៈមួយចំនួនតូចដែលតែងតែអួតហ៊ឺហារ ឡូយឆាយ តែចុងក្រោយទឹកភ្នែករហាម ព្រោះជំពាក់បំណុលគេ រួចស្រែករកជំនួយនោះឡើយ។
លោក ហម ឈរ៉ា ជាថ្មីម្តងទៀត កាលពីថ្ងៃទី១៥ ខែសីហា ក៏បានប្រើប្រាស់បណ្តាញសង្គម បង្ហាញនូវកង្វល់ថា តើអក្សរសាស្ត្រជាតិមួយចំនួនអាចនឹងបាត់បង់នាពេលអនាគតដែរឬទេ? នៅពេលបងប្អូនយើងខ្លះបានទម្លាប់យកភាសានិយាយ មកសរសេរទៅវិញនោះ។
តារាសម្ដែងជើងចាស់ លោក ហម ឈរ៉ា បានចេញមុខប្រតិកម្មជាខ្លាំងទៅលើរឿងលុបបំបាត់អក្សរសាស្ត្រជាតិដែលដូនតាខ្មែរបានបន្សល់ទុក ដោយនាំគ្នាប្រើពាក្យផ្សេងជំនួសពាក្យដើមទៅវិញ។ លោក ហម ឈរ៉ា តួកុនជើងចាស់អំឡុងទសវត្ស៩០ បានចោទជាសំណួរសួរនៅលើបណ្ដាញសង្គមថា «តើអក្សរជាតិដូនតាប៉ុន្មានពាក្យនេះ អាចនឹងបាត់បង់ទៅថ្ងៃក្រោយទេ?» ។
លោកបន្តថា បច្ចុប្បន្ននេះ បងប្អូនខ្មែរមួយចំនួនបានប្រើប្រាស់ពាក្យកាត់មកជំនួសភាសាដើមអស់បាត់ទៅហើយ តួយ៉ាងដូចជាពាក្យ «កំពុង» ជំនួសដោយ «ពុង» ។ ពាក្យ «ខ្ញុំ» ត្រូវបានសរសេរជំនួសដោយ «ញុំ» ឬ «ញុម»។ ឥឡូវជំនួសដោយ «ឡូវ» ឬ «លូវ»។ ពាក្យ «និយាយ» ត្រូវបានសរសេរជំនួសដោយ «យាយ» ។ ពាក្យ «អង្គុយ» ជំនួសដោយ «គុយ» ។ «ភ្នំពេញ» ជំនួសដោយ «ពេញ»។ ពាក្យថា «ប៉ុន្មាន» ជំនួសដោយ «ម៉ាន» ។ ថ្ងៃជំនួសដោយ ងៃ ….។ល។
លោកបានលើកឡើងថា «នេះក៏ព្រោះតែទម្លាប់យកភាសានិយាយមកសរសេរ ឬក៏សរសេរកាត់។ កាត់យូរៗទៅដាច់បានសម្រេចហើយ កូនចៅសុំទោសដូនតាផង ដែលកូនចៅមិនអាចថែរក្សាអក្សរដូនតាប៉ុន្មានពាក្យនេះឱ្យត្រឹមត្រូវបាន»។ ហើយចំពោះទស្សនរបស់តារាសម្ដែងជើងចាស់រូបនេះ ក៏បានធ្វើអោយមហាជនពេញចិត្តជាខ្លាំងទៅលើរូបលោក ដែលតែងតែកែតម្រូវ និងអោយតម្លៃទៅលើអក្សរសាស្ត្រជាតិ និងតែងតែរំលឹកលើកយកនូវអ្វីដែលជាវប្បធម៌ អរិយធម៌ខ្មែរ មកអោយកូនខ្មែរជំនាន់ក្រោយបានដឹង និងចងចាំទុក។
សូមរំលឹកថា តារាសម្ដែងជើងចាស់លោក ហម ឈរ៉ា ចូលសម្តែងជាតួឯកក្នុងខ្សែភាពយន្តលើកដំបូងនៅអំឡុងទសវត្ស៩០ ។ ខ្សែភាពយន្តដែលលោកសម្តែងលើកទី១ គឺរឿង «សំឡេងទ្រខ្មែរ» ដោយសាច់រឿងនេះ ទទួលបានការគាំទ្រដូចទឹកបាក់ទំនប់ ហើយសាច់រឿងនេះ ក៏បានធ្វើឲ្យលោកចាប់មានឈ្មោះបោះសំឡេងក្នុងពិភពសិល្បៈផងដែរ។
អ្វីដែលជាការកត់សម្គាល់របស់មហាជន និងគិតថា លោកជាបុគ្គលគំរូនោះ គឺចាប់ពីឈានជើងចូលវិស័យសិល្បៈមក លោក ហម ឈរ៉ា មិនដែលលេចធ្លាយ ឬមានរឿងអាស្រូវផ្ទាល់ខ្លួនម្ដងណាឡើយ។ ទន្ទឹមនោះ លោក ហម ឈរ៉ា ហាក់ដូចជានៅរក្សាទីតាំងជាតារាសម្តែងដែលមានប្រជាប្រិយភាព មិនចាញ់តារាសម្តែងល្បីឈ្មោះ លោក ទេព រិនដារ៉ូ ឡើយ ។ មួយវិញទៀត តារាសម្ដែងជើងចាស់រូបនេះ ក៏មានជីវភាពធូរធាសមប្រកប និងរស់នៅពេញដោយសេចក្ដីសុខ សុភមង្គលជាមួយភរិយារបស់លោកផងដែរ ៕
ចែករំលែកព័តមាននេះ