រាជធានីភ្នំពេញ ៖ តំណាងក្រុមហ៊ុនល្បីៗរបស់សហព័ន្ធស្វ៊ីសបានប្រាប់ប្រមុខរាជរដ្ឋាភិបាលកម្ពុជាថា មានវិនិយោគិនស្វ៊ីសជាច្រើនមានបំណងមកបណ្តាក់ទុននៅប្រទេសកម្ពុជា ព្រោះពួកគេមានទំនុកចិត្ត និងមើលឃើញ
រាជធានីភ្នំពេញ ៖ តំណាងក្រុមហ៊ុនល្បីៗរបស់សហព័ន្ធស្វ៊ីសបានប្រាប់ប្រមុខរាជរដ្ឋាភិបាលកម្ពុជាថា មានវិនិយោគិនស្វ៊ីសជាច្រើនមានបំណងមកបណ្តាក់ទុននៅប្រទេសកម្ពុជា ព្រោះពួកគេមានទំនុកចិត្ត និងមើលឃើញយ៉ាងច្បាស់ពីស្ថិរភាពនយោបាយ ការរីកចម្រើន ជាពិសេស សក្តានុពលសេដ្ឋកិច្ចកម្ពុជានាពេលបច្ចុប្បន្ន ។ ការលើកឡើងបែបនេះ នៅក្នុងឱកាសដែលសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អញ្ជើញពិសាអាហារពេលល្ងាចជាមួយតំណាងក្រុមហ៊ុនល្បីៗរបស់សហព័ន្ធស្វ៊ីសទាំងនោះនៅភោជនីយដ្ឋាន Club of the Restaurant ក្នុងសណ្ឋាគារ Park Hyatt Zurich ក្នុងទីក្រុង Zurich ប្រទេសស្វ៊ីស ។
តំណាងវិនិយោគិនស្វ៊ីស ក៏បានថ្លែងអំណរគុណយ៉ាងជ្រាលជ្រៅបំផុតជូនសម្តេចតេជោ នាយករដ្ឋមន្ត្រី ដែលបានផ្តល់កិត្តិយសអញ្ជើញចូលរួមពិសាអាហារ និងផ្តល់ព័ត៌មានសំខាន់ៗមួយចំនួនអំពីឱកាសវិនិយោគនៅកម្ពុជា ។
សម្តេចតេជោនាយករដ្ឋមន្ត្រី បានស្វាគមន៍យ៉ាងកក់ក្តៅចំពោះវត្តមានវិនិយោគិនស្វ៊ីសទាំងអស់ដែលមានបំណងទៅបណ្តាក់ទុននៅកម្ពុជា។ ទន្ទឹមនឹងនោះ សម្តេចតេជោ ក៏បានអញ្ជើញវិនិយោគិនស្វ៊ីសទាំងអស់មកចូលរួមក្នុងវេទិកាសេដ្ឋកិច្ចពិភពលោកឆ្នាំ២០១៧ ដែលកម្ពុជាធ្វើជាម្ចាស់ផ្ទះផងដែរ ។
នៅក្នុងវេទិកានេះ គឺនឹងផ្តល់ឱកាសឲ្យវិនិយោគិនស្វ៊ីសបានឃើញកាន់តែច្បាស់អំពីឱកាសមាស និងសក្តានុពលទាំងឡាយក្នុងការ បណ្តាក់ទុនវិនិយោគ ។ ទន្ទឹមនឹងនោះដែរ កម្ពុជាក៏ចង់បាននូវការចូលរួមជាគំនិតយោបល់ពីថ្នាក់ដឹកនាំនានា និងវិស័យឯកជនផ្សេងៗដែលនាំមកនូវការរីកចម្រើនរួមគ្នាសម្រាប់ពិភពលោកទាំងមូល ។
នៅក្នុងពិធីទទួលទានអាហារ និងសំណេះសំណាលនោះ គឺបានផ្តល់ឱកាសដល់តំណាងក្រុមហ៊ុនស្វ៊ីសទាំងអស់បានស្តាប់ និងពិភាក្សាដោយផ្ទាល់ជាមួយសម្តេចតេជោនាយករដ្ឋមន្ត្រី អំពីបញ្ហាជាច្រើនដែលទាក់ទងទៅនឹងការពង្រឹង និងពង្រីកពាណិជ្ជកម្ម សេដ្ឋកិច្ច និងការរិះរកនូវវិធីសាស្ត្រ ល្អៗជាច្រើនដើម្បីពង្រីកទំហំពាណិជ្ជកម្មនៃប្រទេសទាំងពីរកម្ពុជា-ស្វ៊ីស ឲ្យកាន់តែមានទំហំធំឡើងថែមទៀត ដែលផ្តល់ផលប្រយោជន៍ដល់ប្រជាជាតិនៃប្រទេសទាំងពីរ ៕
ចែករំលែកព័តមាននេះ