ខេត្តប៉ៃលិន ៖ ក្រោយពេលទទួលបានដីការបស់លោក គឹម ម៉េង ចៅក្រមស៊ើបសួរនៃសាលាដំបូងខេត្តប៉ៃលិន ប្រជាពលរដ្ឋជាង២០នាក់ ក្នុងចំណោមជាង១០០គ្រួសារ រស់នៅចំណុចសំបុកចាប ក្នុងភូមិផ្សារព្រំ…
ខេត្តប៉ៃលិន ៖ ក្រោយពេលទទួលបានដីការបស់លោក គឹម ម៉េង ចៅក្រមស៊ើបសួរនៃសាលាដំបូងខេត្តប៉ៃលិន ប្រជាពលរដ្ឋជាង២០នាក់ ក្នុងចំណោមជាង១០០គ្រួសារ រស់នៅចំណុចសំបុកចាប ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន បានលើកគ្នាទៅសុំកិច្ចអន្តរាគមន៍ពីលោកជំទាវ បាន ស្រីមុំ អភិបាលខេត្តប៉ៃលិន ។
ហេតុការណ៍ប្រជាពលរដ្ឋលើកគ្នាតវ៉ាសុំកិច្ចអន្តរាគមន៍ពីអភិបាលខេត្តប៉ៃលិននេះ បានកើតឡើងនៅវេលាម៉ោង៨ និង៣០នាទីព្រឹកថ្ងៃទី១៦ ខែសីហា ឆ្នាំ២០២២ ស្ថិតនៅមុខសាលាខេត្តប៉ៃលិន។
ប្រភពព័ត៌មានពីប្រជាពលរដ្ឋ ទី១- ឈ្មោះ នូ ខេមរ៉ា ភេទប្រុស អាយុ៣៣ឆ្នាំ ជាតិខ្មែរ ទី២- ឈ្មោះ ចន កូលាប ភេទស្រី ទី៣- ឈ្មោះ ហ៊ុន សីហា ភេទប្រុស ទី៤- ឈ្មោះ ស ចេក ភេទប្រុសបានរៀបរាប់ឱ្យដឹងដូចៗគ្នាថា ៖ ក្រោយពីបានឃើញដីកា ដែលគេយកទៅប្រគល់ជូនពួកគាត់ដល់មុខផ្ទះ ធ្វើឱ្យម្នាក់ៗ ស្រឡាំងកាំង មានការព្រួយបារម្ភយ៉ាងខ្លាំង ចំពោះសុវត្ថិភាព ដោយសរសេរថា ក្រមនីតិវិធីព្រហ្មទណ្ឌ ដែលប្រកាសឲ្យ ប្រើតាមព្រះរាជក្រិត្យលេខ នស/រក០២៤ ចុះថ្ងៃទី១០ ខែសីហា ឆ្នាំ២០០៧ ជាសំណុំរឿងព្រហ្មទណ្ឌលេខ៧៥ ចុះថ្ងៃទី០១ ខែមេសា ឆ្នាំ២០១៦ របស់អយ្យការអមសាលាដំបូងខេត្តប៉ៃលិន ។
លិខិតបញ្ជាក់ថា ដីកាសន្និដ្ឋានបញ្ជូនរឿងឲ្យស៊ើបសួរលេខ ១៤៦ ព,ស/២០ ចុះថ្ងៃទី១២ ខែសីហា ឆ្នាំ២០២០របស់អយ្យការអមសាលាដំបូងខេត្តប៉ៃលិន ដែលសម្រេចចោទប្រកាន់លើពួកគាត់ និងបក្សពួក២៤នាក់ពីបទ ហិង្សាទៅលើអ្នកកាន់កាប់អចលនវត្ថុដោយសុចរិត ប្រព្រឹត្តនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន កាលពីអំឡុងឆ្នាំ២០១០ រហូតមកដល់អំឡុងឆ្នាំ២០១៦ បទល្មើសព្រហ្មទណ្ឌ ដែលមានចែងឱ្យផ្តន្ទាទោសតាមបញ្ញត្តិមាត្រា២៥៣ នៃច្បាប់ភូមិបាល ។ ក្នុងដីកាក៏បង្គាប់មក ឈ្មោះ កែ សុវណ្ណ ភេទប្រុស មានទីលំនៅបច្ចុប្បន្ននៅភូមិផ្សារព្រំ ឃុំស្ទឹងកាច់
ស្រុកសាលាក្រៅ ខេត្តប៉ៃលិន ឲ្យចូលទៅកាន់សាលាដំបូងខេត្តប៉ៃលិននៅថ្ងៃទី២៥ ខែសីហា ឆ្នាំ២០២២ វេលាម៉ោង ០៩និង៣០នាទីព្រឹក នៅបន្ទប់ស៊ើបសួរ “ក” ។
ដើម្បីសួរយកចម្លើយពីដំណើររឿងពាក់ព័ន្ធនឹងសំណុំរឿងខាងលើ សាមីខ្លួនត្រូវយកឯកសារដែលពាក់ព័ន្ធទៅជាមួយផងប្រសិនបើមាន ។ ក្នុងករណីរឹងទទឹងមិនចូលខ្លួនតាមការកំណត់ខាងលើនេះទេ ឬរត់គេចខ្លួន ខាងតុលាការនឹងចេញដីកាបង្គាប់ឲ្យនាំខ្លួនតែម្តង ។ ពួកគាត់បញ្ជាក់ថា ប្រជា ពលរដ្ឋរស់នៅអាស្រ័យផល លើដីក្នុងភូមិខាងលើនេះអស់រយៈពេលជាង២០ឆ្នាំមកហើយ ដោយអាជ្ញាធរមូលដ្ឋានតែងតែសន្យាធ្វើប្លង់កម្មសិទ្ធិជូនពួកគាត់ នៅមុនពេលបោះឆ្នោតឃុំ/សង្កាត់ តែមិនទទួលបានផលនោះទេ លុះរហូតមកដល់ពេលនេះ ស្រាប់តែទទួលបានដីកាកោះហៅឱ្យចូល ខ្លួន ដែលធ្វើឱ្យពួកគាត់មានការព្រួយបារម្ភពីសុវត្ថិភាពយ៉ាងខ្លាំង ជាពិសេសដេកមិនលក់ បក់មិនល្ហើយឡើយ។
ពាក់ព័ន្ធទៅនឹងបញ្ហានេះ ឯកឧត្តម ឃ្លោក នួយ អភិបាលរងខេត្ត បានដឹកនាំក្រុមការងាររដ្ឋបាលខេត្ត ចេញមកសម្របសម្រួល ដោយស្រង់យកឈ្មោះរបស់ពួកគាត់ខាងលើទៅជូនលោកជំទាវអភិបាលខេត្ត ដើម្បីធ្វើការដោះស្រាយនៅពេលក្រោយ៕
ចែករំលែកព័តមាននេះ