ខ្លោចចិត្ត ! ក្មេងស្រីម្នាក់ខណៈកំពុងជិះកង់ ស្រាប់តែ…
ខេត្តពោធិ៍សាត់ ៖ ក្មេងស្រីអាយុ៦ឆ្នាំម្នាក់ខណៈជិះកង់តែម្នាក់ឯងស្រាប់តែម៉ូតូបើកមកប៉ះដៃចង្កូតឲ្យដួល ស្របពេលនោះស្រាប់តែរថយន្តមកដល់កិនចំក្បាលបែកធ្លាយខួរ …
ខេត្តពោធិ៍សាត់ ៖ ក្មេងស្រីអាយុ៦ឆ្នាំម្នាក់ខណៈជិះកង់តែម្នាក់ឯងស្រាប់តែម៉ូតូបើកមកប៉ះដៃចង្កូតឲ្យដួល ស្របពេលនោះស្រាប់តែរថយន្តមកដល់កិនចំក្បាលបែកធ្លាយខួរស្លាប់យ៉ាងអាណោចអាធ័ម ។ ហេតុការណ៍ដ៏រន្ធត់នេះកើតឡើងកាលពីវេលាម៉ោង១១ និង៣០នាទីព្រឹក ថ្ងៃទី១៦ ខែមករា ឆ្នាំ២០១៧ នៅលើផ្លូវកៅស៊ូឆ្ពោះទៅកាន់ស្រុកភ្នំក្រវាញ ត្រង់ចំណុចផ្លូវបំបែក ស្ថិតក្នុងភូមិទួលគ្រួស សង្កាត់ចំរើនផល ក្រុងពោធិ៍សាត់ ។
ប្រភពពីនគរបាលប៉ុស្ដិ៍រដ្ឋបាលចំរើនផល បានឲ្យដឹងថា ក្មេងស្រីរងគ្រោះឈ្មោះ ឯក សំណាង អាយុ៦ឆ្នាំ រស់នៅភូមិទួលគ្រួស សង្កាត់ចំរើនផល ក្រុងពោធិ៍សាត់ ។
ប្រភពបន្តទៀតថា នៅថ្ងៃកើតហេតុ ខណៈក្មេងស្រីកំពុងជិះកង់ម្នាក់ឯងស្រាប់តែមានម៉ូតូ១គ្រឿងធ្វើដំណើរពីជើងទៅត្បូងបានជិះមកប៉ះដៃកង់ឲ្យដួល ស្របពេលនោះរថយន្ដ១គ្រឿងដែលកំពុងបោះពួយយ៉ាងលឿនពីត្បូងទៅជើងមកដល់ ហើយកិនចំក្បាលក្មេងស្រីបណ្ដាលឲ្យបែកក្បាលធ្លាយខួរស្លាប់ភ្លាមៗនៅនឹងកន្លែងកើតហេតុតែម្ដង ។
អ្នកឃើញហេតុការណ៍គ្រោះថ្នាក់ចរាចរណ៍នេះបានប្រាប់នគរបាលប៉ុស្តិ៍រដ្ឋបាលចំរើនផលថា ម៉ូតូដែលជិះមកប៉ះកង់ និងរថយន្ដបង្កជារថយន្ដដឹកថ្ម ប៉ុន្តែមិនដឹងម៉ាក មិនចាំស្លាកលេខ បានបើករត់គេចខ្លួនបាត់ ។
ក្រោយពេលកើតហេតុ សមត្ថកិច្ចកំពុងព្យាយាមស្រាវជ្រាវរកអ្នកជិះម៉ូតូ និងរថយន្តបង្កគ្រោះថ្នាក់ ដើម្បីឲ្យមកទទួលខុសត្រូវចំពោះមុខច្បាប់ ៕
ចែករំលែកព័តមាននេះ