ខេត្តកំពង់ធំ ៖ ប្រជាពលរដ្ឋនាំគ្នារិះគន់ថា អាជ្ញាធរស្រុក ខេត្ត មន្ទីរជំនាញ និងមន្ទីរសុខាភិបាល ខេត្តកំពង់ធំ បានឃុបឃិតគ្នាជាប្រព័ន្ធ បណ្តែតបណ្តោយឲ្យលោកវេជ្ជបណ្ឌិត លឹម ស្រ៊ុន មានឋានៈជាប្រធានមណ្ឌលសុខភាព សាលាវិស័យសាងសង់ផ្ទះថ្ម២ល្វែង និងផ្ទះឈើ២ល្វែង បើកគ្លីនីក រំលោភយកដីមណ្ឌល១ផ្នែក និងរំលោភលើដីចំណីផ្លូវជាតិ បែរជាម្នាក់ៗឆ្លើយយករួចខ្លួនថាមិនដឹង រហូតទាល់តែផ្ទះថ្មសង់រួចរាល់ មិនខុសពីពាក្យថា មន្ត្រីកាន់ជើងតែគ្នាឯងនោះទេ។
ទោះបីជាខុសច្បាប់ក៏ដោយក៏នៅតែកាន់ជើងតែគ្នាឯង តើមានខុសអីជាមួយនឹងអ្នកប្រព្រឹត្តល្មើសនោះទៅ។ ពាក់ព័ន្ធនឹងករណីខាងលើនេះ លោក អៀងស៊ីណាត ប្រធានការិយាល័យភូមិបាល ស្រុកប្រាសាទបល្ល័ង្ក បានប្រាប់ កោះសន្តិភាព នៅរសៀលថ្ងៃទី១៧ ខែមករា ឆ្នាំ២០១៧ នេះថា សំណង់ខាងលើនេះ គ្មានច្បាប់អនុញ្ញាតទេ កាលពីកំពុងតែសាងសង់លោកបានទៅឃាត់ពីរបីដងមកហើយ តែលោក លឹម ស្រ៊ុន មិនស្តាប់ លោកក៏បានរាយការណ៍ទៅស្រុក ក៏គ្មានចំណាត់ការរហូតទាល់តែសាងសង់រួច។
ក្រោយមកបន្ទាប់ពីសាព័ត៌មានចុះផ្សាយអភិបាលខេត្តរងទទួលបន្ទុកខាងសុខាភិបាលក៏បានឲ្យពួកលោកចុះវាស់វែងសារជាថ្មី រួចប្រគល់របាយការណ៍នេះជូនគាត់អស់ហើយស្រាប់តែស្ងាត់ឈឹង លោកក៏មិនដឹងជាធ្វើយ៉ាងដូចម្តេចទៀតនោះដែរ មានតែរង់ចាំចំណាត់ការរបស់ខេត្តតែប៉ុណ្ណោះ។ ហើយរឿងប៉ះពាល់ដីចំណីផ្លូវចាប់ពីអាក់ចូលប្រហែលជា៣ម៉ែត្រ ចំណែកដីមណ្ឌលសុខភាព ដែលលោក លឹម ស្រ៊ុន សាងសង់ផ្ទះនោះក៏វាស្ថិតនៅក្នុងដីចំណីផ្លូវ។
លោក ទូច សុខា អភិបាលស្រុក ប្រសាទបល្ល័ង្ក ប្រាប់ថា រឿងសាងសង់ផ្ទះលោក លឹម ស្រ៊ុន នេះ លោកក៏មិនបានចាប់អារម្មណ៍ពីមុនមកនោះទេ ឥឡូវធ្វើរួចហើយវាយចោលដូចជាមិនសម ពីព្រោះគាត់ក៏ជាមន្ត្រីរាជការមួយរូបដែរ ហើយម្ចាស់បានសន្យាថា នៅពេលណាមន្ទីរសុខាភិបាល និងរដ្ឋត្រូវការដីពេលណាលោកនឹងវាចោល ហើយប្រគល់ដីឲ្យវិញ។ លោក ស្រី ស៊ីន ប្រធានមន្ទីរសុខាភិបាលខេត្ត កោះសន្តិភាពព្យាយាមទំនាក់ទំនងមិនអាចសុំការបំភ្លឺបានទេពីព្រោះទូរស័ព្ទដៃរបស់លោកខលមិនចូល។
ចំណែកលោក ប្រាក់ សារ៉ាត់ អភិបាលរងខេត្តកំពង់ធំ ទទួលបន្ទុកខាងសុខាភិបាលនៅរសៀលថ្ងៃទី១៧ មករា ដដែលនេះ ក៏ពុំអាចសុំការបំភ្លឺបានដែរ ពីព្រោះទូរស័ព្ទដៃរបស់លោកខលចូលជាច្រើនដងតែគ្មានអ្នកទទួល។ ជុំវិញបញ្ហានេះដែរ លោកវេជ្ជបណ្ឌិត លឹម ស្រ៊ុន បានប្រាប់ កោះសន្តិភាព តាមទូរស័ព្ទនៅល្ងាចថ្ងៃទី១៧ ខែមករា នេះថា រឿងផ្ទះរបស់លោកនេះលោកបានធ្វើកិច្ចសន្យាជាមួយអាជ្ញាធរហើយថា នៅពេលណាដែលរដ្ឋត្រូវការដីនេះលោកនឹងប្រគល់ឲ្យវិញ ហើយក៏មិនបានកំណត់ថាប្រគល់នៅពេលណានោះដែរ។
បញ្ហានេះហើយដែលជាហេតុធ្វើឲ្យមហាជនរិះគន់ថា នេះហើយច្បាប់ធ្វើបាបបានតែប្រជាពលរដ្ឋក្រីក្រតូចតាចទេ ចំណែកមន្ត្រីរាជការដែលមានឋានៈមានលុយ ដូចជាលោកវេជ្ជបណ្ឌិតខាងលើនេះ មានតែឆ្លើយដោះសារយករួចខ្លួនអ៊ីចឹងទៅ។ បើមិនពុករលួយទេហៅថាស្អីវិញទៅ នេះហើយអ្នកអនុវត្តច្បាប់ពុករលួយកាន់ជើងតែគ្នាឯង ផ្ទះសាងសង់អត់ច្បាប់ដល់ទៅ៤ល្វែងបែរជាមើលមិនឃើញ៕
ចែករំលែកព័តមាននេះ