ខេត្តកំពត ៖ ក្រុមហ៊ុនផលិតម្សៅបៀកខ្នាតតូចមួយបានដាក់រំសេវបំផ្ទុះយកថ្មភ្នំច្រលួញ ក្នុងឃុំទូកមាសខាងលិច ស្រុកបន្ទាយមាស បានធ្វើឲ្យធ្លាក់បិទផ្លូវចូលទៅទីអារាម និងប៉ះពាល់ដល់ផ្ទះប្រជាពលរដ្ឋរស់ជាប់ជើងភ្នំច្រលួញនោះ ត្រូវបានខាងមន្ទីររ៉ែ និងថាមពលខេត្តកំពត ចុះមកពិនិត្យ និងឲ្យក្រុមហ៊ុនខ្នាតតូចនេះផ្អាកជាបណ្ដោះអាសន្នកាលពីដើមខែមករា២០១៧។ ទោះបីខាងមន្ទីរ៉ែ និងថាមពលខេត្តឲ្យផ្អាកជាបណ្ដោះអាសន្នសិនក៏ដោយ។
នៅពេលថ្មីៗនេះខាងជំនាញបានហៅតំណាងក្រុមហ៊ុនម្សៅបៀកនោះ និងប្រជាពលរដ្ឋភូមិច្រកឃ្លៃ ឃុំទូកមាស ចំនួន២៥គ្រួសារ ចូលរួមស្ដាប់ការសំណេះសំណាលថា តើក្រុមហ៊ុនបានធ្វើអ្វីខ្លះប៉ះពាល់ដល់ផលប្រយោជន៍ប្រជាពលរដ្ឋ។ ហើយប្រជាពលរដ្ឋបានសំណូមពរអ្វីខ្លះឲ្យក្រុមហ៊ុនធ្វើ ក្នុងនោះក៏មានលោក ប៉ោ វី អភិបាលរងស្រុកបន្ទាយមាសចូលរួមផងដែរ។ លោក ជី សំអុលតំណាងក្រុមហ៊ុនម្សៅបៀកខ្នាតតូចនេះ បានសុំទោសដល់ពលរដ្ឋដែលមានការប៉ះពាល់កន្លងមកដោយខ្លួនមិនបានមកពិនិត្យគ្រប់ម៉ោងទេ បណ្ដោយឲ្យតែមេការ។
លោក ជី សំអុល និយាយថា ផ្លូវដែលបានរមៀលថ្មបាំងនោះត្រូវបានគ្រឿងចក្រកាយបានផ្លូវល្អដូចមុន ហើយលោកនឹងសន្យាជាមួយប្រជាពលរដ្ឋក្នុងភូមិច្រកឃ្លៃថា មិនឲ្យមានបញ្ហាអាក្រក់ដូចមុនបានទេ។ លោក ជី សំអុល បានធ្វើតាមការសំណូមពររបស់ពលរដ្ឋគឺបំផ្ទុះថ្មពីរូបភាពធំមករូបភាពតូចវិញ និងទិញដីដែលមានថ្មធ្លាក់លើ។ លោក សន ឌី ពលរដ្ឋម្នាក់ធ្លាប់បានចេញមកជំទាស់ខាងក្រុមហ៊ុន បានត្រេកអរ និងសាទរដែលក្រុមហ៊ុនបានទទួលសំណើរអ្នកភូមិចង់បានដូចជាក្រុមហ៊ុនជួយចាក់គ្រោះនៅតាមផ្លូវ និងការបំផ្ទុះត្រូវមានពេលវេលាច្បាស់លាស់ និងបំផ្ទុះទ្រង់ទ្រាយធំមកនៅត្រឹមតូចវិញ។
លោក ប៉ោ វី អភិបាលរងស្រុកបន្ទាយមាស បានប្រាប់ថា ពាក់ពន្ធ័រឿងរ៉ាវក្រុមហ៊ុនបំផ្ទុះថ្មភ្នំច្រលួញ និងពលរដ្ឋភូមិច្រកឃ្លៃ ត្រូវបានដោះស្រាយបញ្ចប់ហើយ ដោយក្រុមហ៊ុនបានទទួលសំណើដែលអ្នកភូមិចង់បាន ដូចជាបំផ្ទុះថ្មពីធំមកត្រឹមតូចវិញ៕
ចែករំលែកព័តមាននេះ