រាជធានីភ្នំពេញ ៖ ស្របពេលដែលគម្រោងអគារខុនដូ កាសាមេរីឌាន នៅទីក្រុងកោះពេជ្រ រៀបនឹងបញ្ចប់គម្រោងទាំងស្រុង និងត្រៀមប្រគល់កូនសោជូនអតិថិជនដែលមានទិញគម្រោងនោះ ម្ចាស់គម្រោងនេះក៏បានប្រកាសផងដែរ ដល់អ្នកដែលចង់ស្នាក់ក្នុងខុនដូបែបស៊ីវិល័យ តែគ្មានលទ្ធភាពទិញ ឬមិនចង់ទិញដោយទុកវិនិយោគផ្សេង អាចជួលបន្ទប់ខុនដូស្នាក់នៅបាន ហើយនៅពេលខ្លួនមានលទ្ធភាពអាចទិញដាច់ក៏បាន ។
លោក កូ សេកយ៉ាន នាយកប្រតិបត្តិ និងជាសហស្ថាបនិកក្រុមហ៊ុន MIH ថ្លែងនៅក្នុងសន្និសីទសារព័ត៌មានស្តីពីការប្រកាសជួលខុនដូ នៅការិយាល័យលក់របស់កាសាមេរីឌាន បានឱ្យដឹងថា ដោយសារតែក្រុមហ៊ុនបានយល់ពីការលំបាករបស់អតិថិជនដែលមានបំណងចង់ក្លាយជាម្ចាស់គេហដ្ឋាន (ខុនដូ) តែមិនទាន់មានលទ្ធភាព ដូចនេះហើយទើបក្រុមហ៊ុនបង្កើតគម្រោងជួលនេះ ដើម្បីបង្កភាពងាយស្រួលនិងផ្ដល់ឱកាសជូនអតិថិជនឱ្យមានអាទិភាពក្លាយជាម្ចាស់ខុនដូ ដែលស្ថិតនៅទីតាំងដ៏មានកុត្យានុភាពនៃទីក្រុងកោះពេជ្រ ។
លោកបន្តថា ការបង្កើតគម្រោងជួលអគារនេះ ដើម្បីឱ្យឱកាសដល់អតិថិជនដែលទិញហើយ ជួលមកវិញ ដើម្បីទទួលបានប្រាក់ចំណេញមកវិញ ហើយក៏ដើម្បីឱ្យគម្រោងអគារខុនដូនេះ មានអ្នកស្នាក់នៅកាន់តែច្រើន ។
លោកបន្ថែមថា ចំពោះគម្រោងកាសាមេរីឌានទាំងមូល នឹងប្រគល់ផ្ទះជូនអតិថិជនមុនកាលកំណត់ ដូចនេះវាជាគម្រោងមួយដ៏ល្អ និងធ្វើឱ្យអតិថិជនកាន់តែមានជំនឿទុកចិត្តជាមួយនឹងគម្រោងមួយនេះ ។ លោកថា ៖ «ការប្រគល់ផ្ទះនឹងចាប់ផ្ដើមធ្វើឡើងជាបន្តបន្ទាប់ នៅអំឡុងពេលចូលឆ្នាំចិនរួច ហើយយ៉ាងយូរនៅអំឡុងខែមេសា ឆ្នាំ២០១៧ នេះ គម្រោងអគារខុនដូរបស់យើងនឹងប្រគល់ជូនអតិថិជនទាំងអស់តែម្ដង ដោយសារតែការរចនាអាងទឹក និងសួនច្បារជាដើមនោះ នឹងបញ្ចប់នៅអំឡុងខែមីនា ឆ្នាំ២០១៧ដូចនេះការសន្យារបស់យើងជាមួយអតិថិជន វានឹងធ្វើមុនការកំណត់ទៅទៀត» ។
តាមសេចក្តីប្រកាសព័ត៌មានរបស់ក្រុមហ៊ុន Casa Meridian បានឱ្យដឹងថា គម្រោងជួលខុនដូក្លាយជាម្ចាស់នេះ នឹងអនុញ្ញាតឱ្យបុគ្គល ក្រុមគ្រួសារ ឬម្ចាស់ក្រុមហ៊ុនជួលរយៈពេល៣ឆ្នាំដំបូង ហើយបន្ទាប់មកទៀតពួកគាត់នឹងមានជំរើសទិញខុនដូក្នុងតម្លៃទីផ្សារបច្ចុប្បន្ន ។ ចំណែកប្រាក់ថ្លៃជួលកន្លងមក នឹងត្រូវបានប្រើប្រាស់ជាផ្នែកមួយនៃប្រាក់បង់សម្រាប់ទិញខុនដូនោះ ។ បើសិនតម្លៃខុនដូលើទីផ្សារឡើងថ្លៃ ពួកគាត់នឹងរក្សាតម្លៃនៅពេលបច្ចុប្បន្ន ។
ចែករំលែកព័តមាននេះ