ខេត្តបន្ទាយមានជ័យ ៖ មន្ទីរសម្រាកព្យាបាល និងសម្ភព សែនសុខសាន្ត ដែលត្រូវបានក្រសួងសុខាភិបាលសម្រេចបិទទ្វារកាលពីរសៀលថ្ងៃទី១០ មករា កន្លងមក បន្ទាប់ពីទទួលព្យាបាលអ្នកជម្ងឺពស់វែកចឹកម្នាក់បណ្តាលឲ្យនោះ បានបើកទ្វារវិញឲ្យចូលរស់នៅជាធម្មតាវិញហើយ នៅម៉ោង៣រសៀលថ្ងៃទី១៧ មករានេះ ប៉ុន្តែមិនអនុញ្ញាតឲ្យបើកជាមន្ទីរសម្រាកព្យាបាល និងសម្ភព តទៅទៀតទេ ។
ការបើកទ្វារផ្ទះឲ្យម្ចាស់គ្លីនិកខាងលើ គេឃើញមានវត្តមានលោក សុខ កែវបណ្ឌិត ព្រះរាជអាជ្ញារងអមសាលាដំបូងខេត្ត និងលោកវេជ្ជបណ្ឌិតទេស ស៊ីម៉ន អនុប្រធានមន្ទីរសុខាភិបាល រួមជាមួយលោកព្រំ ពិសិដ្ឋ អធិការរងនៃអធិការដ្ឋាននគរបាលក្រុងប៉ោយប៉ែត ព្រមទាំងតំណាងអាជ្ញាធរក្រុងសង្កាត់ចូលរួមផងដែរ ។
សូមរម្លឺកថា នៅវេលាម៉ោងជិត៤រសៀលថ្ងៃទី១០ មករានេះ សមត្ថកិច្ចចម្រុះដឹកនាំដោយមន្ត្រីមន្ទីរសុខាភិបាលខេត្តបន្ទាយមានជ័យ បានចុះទៅបិទគ្លីនិក«សម្រាកព្យាបាល-សម្ភព សែនសុខសាន្ត» ដែលមានទីតាំងនៅជាប់ខាងត្បូងផ្លូវជាតិលេខ៥ ស្ថិតក្នុងភូមិស្ទឹងបត់ សង្កាត់ផ្សារកណ្តាល ក្រុងប៉ោយប៉ែត ដែលមានម្ចាស់ឈ្មោះ ឈុំ ប៊ុនឆេង ជាគ្រូពេទ្យ ។ ការចុះបិទគ្លីនិកខាងលើបានធ្វើឡើងបន្ទាប់ពីគ្លីនិក«សម្រាកព្យាបាល-សម្ភព សែនសុខសាន្ត» បានកើតមានអ្នកជំងឺស្លាប់ជាបន្តបន្ទាប់ ពិសេសចុងក្រោយនេះស្ត្រីម្នាក់ដែលបានបាត់បង់ជីវិតក្រោយពស់វែកចឹក ។ ស្ត្រីរងគ្រោះឈ្មោះ ម៉ា សុធា អាយុ២៤ឆ្នាំ មានទីលំនៅភូមិកូនដំរី សង្កាត់និមិត្ត ក្រុងប៉ោយប៉ែត មានមុខរបរលក់ដូរនៅអាងទឹក អូរខៃដន ក្នុងភូមិកូនដំរី ។ ដំណើររឿង ជនរងគ្រោះត្រូវពស់វែកក្របីចឹក កាលពីវេលាម៉ោងជាង២រសៀលថ្ងៃទី១៧ ធ្នូ ២០១៦ និងត្រូវសាច់ញាតិដឹកទៅកាន់គ្លីនិកឯកជនខាងលើ ។
សូមបញ្ជាក់ថា ក្រុមគ្រួសារជនរងគ្រោះ ក្រោយហេតុការណ៍បាននាំគ្នាទៅដាក់ពាក្យបណ្តឹងនៅអធិការដ្ឋាននគរបាលក្រុងប៉ោយប៉ែតឲ្យជួយអន្តរាគមន៍រកយុត្តិធម៍ ពីឈ្មោះឈុំ ប៊ុនឆេង ជាគ្រូពេទ្យ ម្ចាស់គ្លីនិកឯកជន ដោយទាមទារសំណងជំងឺចិត្តចំនួន៣ម៉ឹនដុល្លារ ប៉ុន្តែមកដល់រសៀលថ្ងៃ១០ មករា ២០១៧នេះ មិនទាន់មានដំណោះស្រាយនៅឡើយទេ បើទោះបីជាក្រុមគ្រួសារស្ត្រីរងគ្រោះបាននាំគ្នាមកជួបក្រុមអ្នកសារព៌ត័មាន នៅហាងកាហ្វេ មួយកន្លែងឈ្មោះអ៊ូខុង នៅម្តុំផ្សារអគ្គថ្មី ដើម្បីធ្វើសន្និសីទកាសែត និងបានអំពាវនាវដល់អាជ្ញាធរមានសមត្ថកិច្ចគ្រប់លំដាប់ថ្នាក់ និងស្ថាប័នក្រសួងសុខាភិបាល ពិសេសសម្តេចតេជោហ៊ុន សែន ជាប្រមុខថ្នាក់ដឹកនាំ មេត្តាអន្តរាគមន៍ជួយរកយុត្តិធម៍ដល់ពួកគាត់ជាគ្រួសារជនរងគ្រោះនោះក្តី ៕
ចែករំលែកព័តមាននេះ