រាជធានីភ្នំពេញ ៖ យោងតាមការទម្លាយឱ្យដឹងពីសមាជិករួមក្រុម កីឡាករកម្ពុជា ចាន់ វឌ្ឍនាកា ក្នុងជំហានទៅលេងឱ្យក្លិបល្បីឈ្មោះរបស់ជប៉ុនពេញមួយឆ្នាំក្នុងពេលខាងមុខនោះ គឺទទួលបានតម្លៃខ្ពស់មិនក្រោមកីឡាករល្បីឈ្មោះ
រាជធានីភ្នំពេញ ៖ យោងតាមការទម្លាយឱ្យដឹងពីសមាជិករួមក្រុម កីឡាករកម្ពុជា ចាន់ វឌ្ឍនាកា ក្នុងជំហានទៅលេងឱ្យក្លិបល្បីឈ្មោះរបស់ជប៉ុនពេញមួយឆ្នាំក្នុងពេលខាងមុខនោះ គឺទទួលបានតម្លៃខ្ពស់មិនក្រោមកីឡាករល្បីឈ្មោះនៅក្នុងតំបន់អាស៊ីនោះឡើយ ។ ទោះបីយ៉ាងណា ទិន្នន័យលម្អិតត្រូវបានបិទជិតឈឹង ដោយមានត្រឹមតែការអះអាងថា តម្លៃខ្លួនរបស់កីឡាកររូបនេះ គឺមិនធម្មតាប៉ុណ្ណោះ ។
ប្រភពក្លិបបឹងកេតអង្គរ ដែលកីឡាករ ចាន់ វឌ្ឍនាកា ជ្រកកោនបានអះអាងថា បើទោះជាភាគីជប៉ុន គឺលោក Jun Koyama ប្រធានក្លិបបាល់ទាត់ Fujieda MYFC បានត្រឹមតែជ្រើសរើសកីឡាកររូបនេះ ក្នុងលក្ខខណ្ឌខ្ចីជើង ដោយមិនបានកុងត្រាទិញយកទៅលេងផ្ដាច់មុខរយៈពេលមួយកំណត់ដូចគ្នានឹងកីឡាករដែលលេងនៅក្នុងក្លិបជប៉ុនផ្សេងទៀត ក៏តម្លៃខ្លួនរបស់គេត្រូវបានបង្ហើបថា មិនក្រោមម៉ឺនដុល្លារទម្រាំតែចប់កុងត្រាមួយឆ្នាំ ។ តម្លៃនេះ នឹងបន្តឈានឡើងសម្រាប់ការព្រមព្រៀងក្នុងឆ្នាំទី២ និងពេលកីឡាករចាន់ វឌ្ឍនាកា អាចឈានទៅលេងក្នុងក្លិបលំដាប់អឺរ៉ុប និងពិភពលោកក្រោយការអភិវឌ្ឍសមត្ថភាពនោះផង ទើបអ្នកណាៗក៏ចាត់ទុកវត្តមានទៅបង្ហាញខ្លួនក្នុងក្លិបជប៉ុនរបស់ជើងខ្លាំងកម្ពុជារូបនេះ បង្ហាញយ៉ាងច្បាស់ថា វិស័យបាល់ទាត់កម្ពុជារីកចម្រើន និងបង្ហាញថា កីឡាករកម្ពុជាមិនធម្មតាលើឆាកអន្តរជាតិ ។
ប្រភពដែលគួរឱ្យទុកចិត្តបានអះអាងថា ចាន់ វឌ្ឍនាកា ស៊ីថ្លៃមួយចប់កុងត្រារាប់ម៉ឺនដុល្លារ ដោយលោកត្រូវភាគីជប៉ុនផ្ដល់កម្រៃឡើងទៅលេងមួយលើកៗបន្ថែមទៀត ជាពិសេសក្នុងដំណាក់កាលហ្វឹកហាត់ និងពេលប្រកួត ហើយទទួលបានលទ្ធផលល្អ ។ ចាន់ វឌ្ឍនាកា នឹងអាចបង្ហាញខ្លួននៅក្នុងប្រទេសជប៉ុនច្រើនជាងនៅកម្ពុជា ចាប់ពីដើមឆ្នាំ២០១៧ នេះទៅ ដោយសារតែគេត្រូវប្រើពេលច្រើនស្វែងយល់បច្ចេកទេសតាមទម្រង់ជប៉ុន និងអឺរ៉ុប ដែលត្រូវបង្វឹកដោយភាគីជប៉ុន ។
យ៉ាងណាមិញ គេនៅតែបង្ហាញខ្លួនលេងឱ្យក្រុមជម្រើសជាតិកម្ពុជា សម្រាប់ព្រឹត្តិការណ៍ធំៗ បើទោះជាគេត្រូវជាប់ភារៈចេញទៅលេងនៅក្នុងប្រទេសជប៉ុនជាលក្ខណៈខ្ចីជើងរហូតដល់ទៅមួយឆ្នាំក្តី ។ ក្នុងនោះភាគីជប៉ុន ក៏បានប្រកាសថា កម្ពុជានឹងមិនមានតែកីឡាកររូបនេះម្នាក់ ដើម្បីចេញទៅលេងនៅក្នុងប្រទេសជប៉ុននោះទេ ដោយខាងជប៉ុន នឹងអាចសម្លឹងមើលកីឡាករល្អៗផ្សេងទៀត ដើម្បីផ្ដល់ឱកាស និងដើម្បីឱ្យជប៉ុនប្រមូលបានកីឡាករដែលមានជើងល្អនៅក្នុងតំបន់អាស៊ី ទៅលេងនៅក្លិបរបស់ខ្លួន ។
លោក Jun Koyama ប្រធានក្លិបបាល់ទាត់ Fujieda MYFC ធ្លាប់បញ្ជាក់ថា ក្លិបជប៉ុនពេញចិត្តទម្រង់លេងរបស់កីឡាករខ្សែប្រយុទ្ធដ៏ឆ្នើមរបស់កម្ពុជា ចាន់ វឌ្ឍនាកា ទើបសម្រេចចុះកុងត្រាខ្ចីជើងឱ្យទៅលេងនៅក្លិបរបស់ខ្លួន បើទោះមិនទាន់ពិចារណារឿងទិញផ្ដាច់មុខក្នុងរយៈពេលមួយកំណត់ ដើម្បីទៅលេងនៅក្នុងប្រទេសជប៉ុនក្ដី ។ លោកថា សមត្ថភាពរបស់កីឡាកររូបនេះ មិនពិបាកក្នុងការបង្វឹកបន្ថែមឱ្យក្លាយជាកីឡាករដែលអាចឈានឡើងទៅកាន់ក្រុមលំដាប់របស់អាស៊ី និងអឺរ៉ុបនោះទេ ប្រសិនបើកីឡាកររូបនេះ មានការប្រឹងប្រែងឱ្យបានខ្លាំងក្លាតាមការបណ្ដុះបណ្ដាលរបស់ក្រុមជប៉ុន ។
អីុចឹងហើយទើបលោកបញ្ជាក់ថា ចាន់ វឌ្ឍនាកា ទទួលបានតម្លៃខ្ពស់មិនខុសពីកីឡាករលំដាប់កំពូលនៅក្នុងតំបន់អាស៊ី ដែលជប៉ុនទិញទៅលេងនោះទេ ដោយតម្លៃខ្លួននោះលោកថា មានកម្រិតខ្ពស់ដាច់ឆ្ងាយពីតម្លៃខ្លួនរបស់កីឡាករនៅកម្ពុជា និងនៅបណ្ដាប្រទេសមួយចំនួននៅក្នុងតំបន់នោះផង ដោយលោកបានអះអាងថា សប្បាយចិត្តដែលអាចឆក់បានកីឡាករល្អ ចាន់ វឌ្ឍនាកា ឱ្យទៅលេងនៅប្រទេសជប៉ុនក្នុងក្លិបរបស់ខ្លួន។ លោកថា មិនមែនជារឿងងាយទេ ដែលកីឡាករកម្ពុជាបានចូលទៅលេងក្នុងក្លិបរបស់ជប៉ុន ប៉ុន្តែវានឹងក្លាយជាសញ្ញាណបោះជំហានបន្តសម្រាប់កីឡាកររូបនេះ ដែលចង់ក្លាយខ្លួនជាខ្សែប្រយុទ្ធល្បីឈ្មោះនៅក្នុងប្រទេសជប៉ុន នៅទ្វីបអាស៊ី ទ្វីបអឺរ៉ុប និងពិភពលោក ។
យ៉ាងណាមិញ លោកថា អ្វីៗដែលអាចទៅបាន គឺមិនអាចខ្វះបាននូវការផ្ដល់កម្លាំងចិត្តពីសំណាក់ពលរដ្ឋកម្ពុជានោះទេ ដោយសារតែ ចាន់ វឌ្ឍនាកា ដ្បិតថា ឈានឡើងដោយសមត្ថភាពខ្លួន តែក៏ត្រូវការការលើកទឹកចិត្តពីជនជាតិដើមរបស់ខ្លួនដែរ ។ លោក Jun Koyama បាននិយាយថា៖ «ខ្ញុំសន្យាថា នឹងបណ្ដុះបណ្ដាល វឌ្ឍនាកា ឱ្យកាន់តែរីកចម្រើន ដែលអាចនិយាយបានថា រីកចម្រើនរហូតបានឡើងទៅលេងលីកកំពូលជប៉ុន (J-League) ឬតំបន់អឺរ៉ុប និងពិភពលោកជាដើម ។ តែយ៉ាងណា ខ្ញុំសូមសំណូមពរដល់អ្នកគាំទ្រកម្ពុជា សូមបន្ដគាំទ្រ វឌ្ឍនាកា ដើម្បីជំរុញសមត្ថភាពរបស់គេឱ្យកាន់តែរីកចម្រើនបន្ថែមទៀត» ។ លោកថា កីឡាករកម្ពុជាបន្តបន្ទាប់ នឹងមានលទ្ធភាពតាមលំនាំកីឡាករកម្ពុជារូបនេះ ដោយតម្លៃខ្លួនក្នុងការដោះដូរក៏មិនទាបនោះដែរ ដោយសារតែខាងភាគីជប៉ុនបានផ្ដល់តម្លៃខ្លួនដល់កីឡាករក្នុងចំនួនមួយដែលកីឡាករម្នាក់ៗទទួលយកបាន ។
លោក បែ មករា តំណាងក្លិបបឹងកេតអង្គរ ក៏បានបញ្ជាក់ថា តម្លៃខ្លួនរបស់ ចាន់ វឌ្ឍនាកា មានកម្រិតមិនខុសគ្នានឹងតម្លៃកីឡាករល្បីៗនៅក្នុងតំបន់អាស៊ីនោះទេ បើទោះជាលោករក្សាសិទ្ធិមិនប្រាប់ឱ្យដឹងតាមគោលការណ៍របស់ក្លិបជប៉ុន Fujieda MYFC ។ លោកថា ក្រោយចុះកុងត្រាខ្ចីជើងរយៈមួយឆ្នាំ (២០១៧) ចាន់ វឌ្ឍនាកា នឹងមានសមត្ថភាពកាន់តែខ្ពស់លើឆាកអន្តរជាតិ ដើម្បីយកបច្ចេកទេសទាំងនោះមកបង្ហាត់បង្ហាញដល់កីឡាករកម្ពុជាក្នុងវិស័យកីឡាបាល់ទាត់ ៕
ចែករំលែកព័តមាននេះ