ខេត្តពោធិ៍សាត់ ៖ រថភ្លើងនិងរថយន្ដបានបុកគ្នា សំណាងល្អហើយមិនបណ្ដាលឲ្យមានមនុស្សណាម្នាក់ត្រូវរងគ្រោះថ្នាក់ ហេតុការណ៍កើតឡើងវេលាម៉ោងប្រមាណ១០ព្រឹកថ្ងៃទី១៥ សីហានេះ ស្ថិតនៅភូមិបំណក់ ឃុំឈើតុំ ស្រុកក្រគរ ខេត្តពោធិ៍សាត់ ។
បើតាមប្រភពបឋមពីអ្នកស្រុកនៅទីនោះបានប្រាប់ឲ្យដឹងថា មុនពេលកើតហេតុ គេឃើញបុរសម្នាក់បើករថយន្ដកាមរីឆ្លាម ពណ៌ត្រីឆ្លូញ ធ្វើដំណើរពីស្រុកក្រគរ ទៅឃុំឈើតុំ(ជើងទៅត្បូង) ដែលក្នុងរថយន្ដជិះតែម្នាក់ឯងប៉ុណ្ណោះ ។ គាត់បើករថយន្ដមិនបានចាប់អារម្មណ៍អំពីរថភ្លើងដែលកំពុងធ្វើដំណើរពីបាត់ដំបងទៅភ្នំពេញនោះទេ ដោយសារតែមានបាំងព្រៃ និងផ្ទះប្រជាពលរដ្ឋ។
លុះពេលមកដល់ចំណុចផ្លូវដែក ក៏ងាកស្ដាំឃើញរថភ្លើងមកដល់កៀកបាត់ទៅហើយនោះ បុរសរូបនោះភ័យស្រឡាំងកាំង ក៏បើកទ្វារហក់ចេញពីក្នុងរថយន្ដតែម្តង ។
ខណៈនោះ ក៏ត្រូវរថភ្លើងបុកចំពាក់កណ្ដាលរុញទៅមុខអូសចម្ងាយប្រមាណ១០០ម៉ែត្រទើបឈប់ បណ្ដាលឲ្យរថយន្ដខូចខាតមួយចំហៀងយ៉ាងដំណំ ប៉ុន្តែមិនបណ្ដាលឲ្យរថភ្លើងក្រឡាប់គ្រោះថ្នាក់ដល់អ្នកធ្វើដំណើរនៅក្នុងរថភ្លើងនោះទេ ។ បច្ចុប្បន្ន សមត្ថកិច្ចកំពុងធ្វើការ ដើម្បីរកខុសត្រូវទៅតាមនីតិវិធី ៕
ចែករំលែកព័តមាននេះ