រាជធានីភ្នំពេញ ៖ ក្នុងចំណោមប្រទេសជាង១០០ កម្ពុជាបានជាប់ចំណាត់ថ្នាក់លេខ២ ក្នុងការប្រយុទ្ធប្រឆាំងជំងឺកូវីដ១៩ ខណៈប្រទេសប៉ារ៉ែនជាប់ចំណាក់ថ្នាក់លេខ១ ។ នេះបើតាមលោកជំទាវឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល។
តាមរយៈសារតេឡេក្រាមនៅថ្ងៃទី១៤ ខែសីហា លោកជំទាវបានណែនាំដល់ប្រជាពលរដ្ឋគ្រប់រូបកុំធ្វេសប្រហែសឱ្យ ទោះបីប្រទេសកម្ពុជាជាប់ចំណាត់ថ្នាក់លេខ២ ក្នុងការប្រយុទ្ធប្រឆាំងជំងឺកូវីដ-១៩ ក៏ដោយ។
លោកជំទាវឱ វណ្ណឌីន បានថ្លែងឱ្យដឹងថា ក្រសួងសុខាភិបាល បានចេញសេចក្តី ជូនព័ត៌មានប្រចាំថ្ងៃ ដោយបង្ហាញថា កូវីដ-១៩ កំពុងតែនៅមានការឆ្លងនៅក្នុងប្រទេសនៅឡើយ ជាពិសេសពួកអូមីក្រុង ដែលជាវីរុសកូវីដ-១៩ បម្លែងថ្មី ហើយនៅតាមបណ្តាប្រទេសនៅក្នុងតំបន់ និងនៅលើសាកលលោក ក៏នៅតែមានការឆ្លងបន្ត និងមានករណីស្លា.ប់បន្ថែមទៀតផងដែរ។
លោកជំទាវបញ្ជាក់ថា «ដូច្នេះ សូមបងប្អូនកុំធ្វេសប្រហែសឱ្យសោះ ដោយត្រូវបន្តអនុវត្តន៍វិធានការពាការពារ និង៣កុំ រួមជាមួយនឹងការចាក់វ៉ាក់សាំងកូវីដ-១៩ ដូសជំរុញឱ្យបានទាន់ពេល នៅពេលដល់វេន នឹងជួយលោកអ្នកដល់ការការពារពីភាពធ្ងន់ធ្ងរបង្កឡើងដោយជំងឺនេះ កាត់បន្ថយអត្រាចូលសម្រាកពេទ្យ និងកាត់បន្ថយជាអតិប្បរិ មានូវការស្លា.ប់បាតបង់ជីវិត ។ អ្វីដែលយើងចង់បាននៅពេលនេះ គឺការរស់នៅប្រកបដោយ អាយុវែង និងការថែទាំយកចិត្តទុកដាក់ ក្រុមគ្រួសារឱ្យមានសុខសុភមង្គល និងសុខភាពល្អ»។
លោកជំទាវបន្ថែមថា ដើម្បីធ្វើដូច្នេះបាន គឺអាស្រ័យទៅលើការសម្រេចចិត្តដ៏ត្រឹមត្រូវរបស់បុគ្គល និងគ្រួសារ ដោយត្រូវនាំគ្នាទៅ ចាក់វ៉ាក់សាំងកូវីដ-១៩ ដូសជំរុញជាបន្តទៀត រួមនិងការអនុវត្តន៍វិធាន «៣ការពារ និង៣កុំ» ព្រមទាំងកុំភ្លេចអនុវត្តការបរិភោគអាហារឆ្អិនល្អ ហើយកុំឱ្យប្រៃពេកកុំផ្អែមពេក កុំខ្លាញ់ពេក និងធ្វើលំហាត់ប្រាណទៀងទាត់។
ជាមួយគ្នានោះដែរលោកជំទាវ រដ្ឋលេខាធិការ ក៏បានរំលឹកថា តាមការវាយតម្លៃរបស់ Neikki Asia សម្រាប់ COVID-19 Recovery Index គិតត្រឹមថ្ងៃទី៣១ ខែកក្កដា ឆ្នាំ២០២២ កម្ពុជា ឈរនៅលើចំណាត់ថ្នាក់លេខ២។ លោកជំទាវ ថា «សុខភាពរបស់លោកអ្នក គឺស្ថិតនៅក្នុងកណ្ដាប់ដៃរបស់លោក អ្នកផ្ទាល់ ដើម្បីឈាន់ទៅរកការរស់នៅប្រកបដោយផាសុខភាព និងអាយុយឺនយូរ»៕
ចែករំលែកព័តមាននេះ