គ្រោះធម្មជាតិក្នុងរដូវវស្សាស្របពេលដែលទឹកទន្លេមេគង្គកំពុងហក់ឡើងធ្វើឲ្យច្រាំងទន្លេនៅភូមិទួលគរឃុំទន្លេបិទស្រុកត្បូងឃ្មុំ បានបាក់អស់
ខេត្តត្បូងឃ្មុំ ៖ គ្រោះធម្មជាតិក្នុងរដូវវស្សាស្របពេលដែលទឹកទន្លេមេគង្គកំពុងហក់ឡើងធ្វើឲ្យច្រាំងទន្លេនៅភូមិទួលគរឃុំទន្លេបិទស្រុកត្បូងឃ្មុំ បានបាក់អស់បណ្ដោយប្រវែង៦៥ម៉ែត្រ និងជម្រៅចូលមកក្នុងពី៥ទៅ១០ម៉ែត្រ ជាហេតុធ្វើឲ្យលំនៅឋានប្រជាពលរដ្ឋចំនួន១០ខ្នង រងផលប៉ះពាល់ធ្ងន់ធ្ងរក្នុងនោះរុះរើទាំងស្រុងចេញពីទីតាំងដែលអាចបាក់ចូលទន្លេ ចំនួន៨ខ្នង ដោយមានកម្លាំងមូលដ្ឋាន និងកម្លាំងស្នងការដ្ឋាននគរបាលខេត្ត ចំនួន៣០នាក់ សរុប៦០នាក់ បានសស្រាក់សស្រាំនាំគ្នាជួយរុះរើ ។
លោក សេង សុខឿន អភិបាលស្រុកត្បូងឃ្មុំប្រាប់ឲ្យដឹងនារសៀលថ្ងៃទី១៤ ខែសីហាឆ្នាំ២០២២ថា ច្រាំងទន្លេបានចាប់ផ្ដើមបាក់បន្តិចម្ដងៗនៅល្ងាចថ្ងៃទី ១២សីហា ហើយរហូតមកដល់ថ្ងៃទី១៣ ខែសីហា កម្លាំងអាជ្ញាធរមូលដ្ឋានរួមនិងកម្លាំងខេត្តជាច្រើននាក់បាននាំគ្នាចុះមកជួយអន្តរាគមន៍ រុះរើលំនៅឋានដែលប៉ះពាល់ ។ ព្រោះថាច្រាំងទន្លេ បានបាក់គៀកមដល់លំនៅឋានរបស់ពួកគាត់ ។ ដោយត្រូវតែរុះរើទៅកាន់កន្លែងថ្មីដែលមានចម្ងាយពីកន្លែងចាស់ ប្រមាណពី១០០ទៅ១៥០ម៉ែត្រ ។
អភិបាលស្រុកត្បូងឃ្មុំ បានប្រាប់បន្តថា នេះជាគ្រោះធម្មជាតិដែលតែងតែកើតឡើងនៅក្នុងរដូវវស្សាដោយមិនមាននរណាម្នាក់ដឹងមុននោះទេ ។ រហូតមកដល់ថ្ងៃទី១៤ ខែសីហា នៅសល់តែលំនៅឋានចំនួនពីរខ្នងប៉ុណ្ណោះ ដែលមិនទាន់បានរុះរើ ព្រោះថានៅឆ្ងាយពីច្រាំងទន្លេ ។ ស្របពេលដែលមានហេតុការណ៍បែបនេះកើតឡើង ទទួលបានពីលោកមេឃុំទន្លេបិទ រូបលោកបានរាយការណ៍បន្តទៅឯកឧត្តមអភិបាលខេត្ត ដើម្បីសុំកម្លាំងចុះមកជួយអន្តរាគមន៍ ។
ពេលកំពុងតែជួបការលំបាកបែបនេះត្រូវបាន លោក ជីវ ស៊ីវផេង អនុប្រធានក្រុមការងារគណបក្សចុះមូលដ្ឋានឃុំទន្លេបិទ បានចុះសួរសុខទុក្ខ និងនាំយកថវិកាឧបត្ថម្ភដល់គ្រួសារដែលទទួលរងគ្រោះ និងផលប៉ះពាល់ដោយសារការបាក់ច្រាំងទន្លេ នៅភូមិទួលគរ ឃុំទន្លេបិទចំនួន១០គ្រួសារ ដោយក្នុង១គ្រួសារទទួលបានប្រាក់ ១០ម៉ឺនរៀល ។
សាខាកាកបាទក្រហមកម្ពុជាខេត្តត្បូងឃ្មុំ បាននាំយកជំនួយសង្គ្រោះបន្ទាន់ផ្តល់ជូនគ្រួសាររងគ្រោះដោយគ្រោះមហន្តរាយបាក់ច្រាំងទន្លេ កំពុងរុះរើផ្ទះនៅភូមិទួលគរ ឃុំទន្លេបិទ ចំនួន៨គ្រួសារ ដោយក្នុង១គ្រួសារទទួលបាន ប្រាក់២០ម៉ឺនរៀល អង្ករ៥០គីឡូក្រាម មីជាតិ១កេស ត្រីខ១យួរ ទឹកត្រី១យួរ និងទឹកស៊ីអ៊ីវ១យួរ ។
ដោយឡែកម្លាំងសមត្ថកិច្ចចំនួន៦០នាក់ (កម្លាំងស្នងការដ្ឋាននគរបាលខេត្ត ចំនួន៣០នាក់ និងកម្លាំងអធិការដ្ឋាននគរបាលស្រុកចំនួន៣០នាក់) បានចុះជួយរុះរើផ្ទះប្រជាពលរដ្ឋរងគ្រោះដោយការបាក់ច្រាំងទន្លេ និងប្រចាំការនៅកន្លែងកើតហេតុ ដើម្បីជួយរុះរើផ្ទះក្នុងករណីបាក់ច្រាំងបន្តទៀត ។
គួររំឭកថា កាលពីឆ្នាំ២០២១កន្លងទៅនៅភូមិទួលគរ នេះគឺមានលំនៅដ្ឋានប្រជាពលរដ្ឋចំនួន២ខ្នង ត្រូវបានរុះរើជាបន្ទាន់ដោយសារតែច្រាំងទន្លេបានបាក់មកកៀកដល់លំនៅឋានរបស់ពួកគាត់ តែមិនមានអ្នករងគ្រោះទេ ។
លោកឧត្តមសេនីយ៍ត្រី ម៉ុន មាគ៌៌ា ស្នងការនគរបាលខេត្តមានប្រសាសន៍ឱ្យដឹងដែរថា ក្នុងរដូវវស្សា ទឹកទន្លេបានហក់ឡើងធ្វើឲ្យលិចតាមបឹង បួរ ព្រែកមួយចំនួនជាប់ដងទន្លេទទួលបានបញ្ជាពីអគ្គស្នងការនគរបាលជាតិក៏ដូចជាឯកឧត្តមបណ្ឌិត ជាម ច័ន្ទសោភ័ណ អភិបាលខេត្តឱ្យកម្លាំងនគរបាលគឺត្រៀមចុះជួយដល់ប្រជាពលរដ្ឋងាយរងគ្រោះដោយបាក់ច្រាំងទន្លេមិនថាយប់ឬថ្ងៃនោះទេ ។
ជាក់ស្ដែងនៅក្នុងឃុំទន្លេបិទស្រុកត្បូងឃ្មុំរូបលោកបានដឹកនាំកម្លាំងចុះបញ្ជាដោយផ្ទាល់ជួយដល់ប្រជាពលរដ្ឋ ធ្វើឲ្យពួកគាត់មានភាពកក់ក្តៅគឺបានជួយរុះរើលំនៅឋាន ដោយមិនបានចំណាយប្រាក់ ជាមួយនោះកម្លាំងនគរបាលត្រៀមចាំជួយជានិច្ចមិនថាយប់ ឬថ្ងៃចាប់ពីស្រុកក្រូចឆ្មារ ចុះតាមបណ្ដោយច្រាំងរហូតមកដល់ស្រុកត្បូងឃ្មុំ ។ ជាមួយនោះក៏បានត្រៀមទីទួលសុវត្ថិភាពរួចជាស្រេចចាំទទួលពលរដ្ឋដែលរងគ្រោះលិចលង់លំនៅឋាន ។
យោងតាមស្ថានីយជលសាស្ត្រទន្លេមេគង្គសម្រាប់ខេត្តកំពង់ចាម នៅថ្ងៃទី១៣ ខែសីហា ឆ្នាំ២០២២ វេលាម៉ោង៦ព្រឹក ទឹកមានកម្ពស់ ១២.២១ម៉ែត្រ ខ្ពស់ជាងថ្ងៃម្សិលមិញ +០.១៧ម៉ែត្រ ដែលកម្រិតកម្ពស់ទឹកប្រកាសអាសន្នគឺ ១៥.២០ម៉ែត្រ ៕
ចែករំលែកព័តមាននេះ