ប្រទេសឥណ្ឌូណេស៊ី ៖ រដ្ឋាភិបាលឥណ្ឌូណេស៊ីមានសង្ឃឹមយ៉ាងខ្ពស់ថា ប្រទេសជប៉ុននឹងជួយជំរុញដល់ការអភិវឌ្ឍក្នុងវិស័យជាច្រើនរួមមាន ហេដ្ឋារចនាសម្ព័ន្ធ កិច្ចការផ្ទៃទឹក និងទេសចរណ៍ជាដើម ។
រដ្ឋមន្ត្រីសម្របសម្រួលកិច្ចការផ្ទៃទឹករបស់ឥណ្ឌូណេស៊ី លោក Luhut Pandjaitan បានថ្លែងក្នុងកិច្ចសន្ទនាអាជីវកម្មរវាងជប៉ុន និងឥណ្ឌូណេស៊ីក្នុងទីក្រុងហ្សាការតា កាលពីថ្ងៃអាទិត្យកន្លងមកថា ៖ « ដើម្បីរក្សាស្ថិរភាពរបស់ប្រទេស វាពិតជាសំខាន់ណាស់សម្រាប់ពួកយើងក្នុងការបង្កើតឲ្យមានសមភាព ។ ដូច្នេះហើយ ពួកយើងចង់ជំរុញដល់ការអភិវឌ្ឍហេដ្ឋារចនាសម្ព័ន្ធក្នុងផ្នែកខាងកើតនៃប្រទេស ដែលការអភិវឌ្ឍនៅមានកម្រិត បើធៀបនឹងប៉ែកខាងលិច » ។
លោកបន្តថា ៖ « ពួកយើងចាត់ទុកប្រទេសជប៉ុនជាគំរូដ៏ល្អ ។ ដូច្នេះ ពួកយើងចង់ពន្លឿនការអភិវឌ្ឍហេដ្ឋារចនាសម្ព័ន្ធរបស់ឥណ្ឌូណេស៊ី ហើយសង្ឃឹមថា នឹងមានអាជីវករជនជាតិជប៉ុនកាន់តែច្រើនចូលរួមក្នុងការអភិវឌ្ឍនេះ » ។
លោកបន្ថែមថា ឥណ្ឌូណេស៊ីកំពុងតែស្វែងរកឱកាសសហការជាមួយជប៉ុនក្នុងវិស័យជាច្រើនទៀតដូចជា កិច្ចការផ្ទៃទឹក នេសាទ និងទេសចរណ៍ ។
លោក Hiroto Izumi ទីប្រឹក្សាពិសេសរបស់លោកប្រធានាធិបតីជប៉ុន ស៊ីនហ្សូ អាបេ ថ្លែងថា ៖ « ក្នុងអំឡុងកិច្ចសន្ទនានេះ ពួកយើងបានប្រមូលផ្តុំអ្នកតំណាងរបស់ក្រុមហ៊ុនជប៉ុនជាច្រើនមកកាន់ប្រទេសឥណ្ឌូណេស៊ី ។ ដូច្នេះ ពួកយើងចាត់ទុកប្រទេសឥណ្ឌូណេស៊ី គឺជាដៃគូដ៏សំខាន់មួយ ហើយពួកយើងពិតជាមានចំណាប់អារម្មណ៍ក្នុងការអភិវឌ្ឍអាជីវកម្មរបស់ពួកយើងក្នុងឥណ្ឌូណេស៊ីណាស់ » ។
ក្នុងចំណោមសមាជិកនៃក្រុមប្រតិភូរបស់ជប៉ុន រួមមានអ្នកតំណាងក្រុមហ៊ុនជាច្រើនដូចជា Tokyo Gas, Mitsubishi Corporation, Asahi Glass និង Inpex ៕
ចែករំលែកព័តមាននេះ