ខណៈការបោះឆ្នោតក្នុងប្រទេសអាល្លឺម៉ង់ កាន់តែជិតចូលមកដល់នោះ Facebook បានចាប់ផ្តើមដាក់ការព្រមានលើព័ត៌មានក្លែងក្លាយដែលបានប្រទះឃើញដោយអ្នកប្រើប្រាស់ជនជាតិអាល្លឺម៉ង់ ។
ការខិតខំប្រឹងប្រែងប្រឆាំងនឹងការផ្សព្វផ្សាយព័ត៌មានក្លែងក្លាយនេះ បានចាប់ផ្តើមក្នុងសហរដ្ឋអាមេរិកកាលពីខែមុន ហើយបច្ចុប្បន្ននេះ វាកំពុងរីកសាយដល់ប្រទេសដទៃ ។
ការជ្រើសយកប្រទេសអាល្លឺម៉ង់នេះ គឺគួរឲ្យកត់សម្គាល់ ព្រោះភ្នាក់ងារស៊ើបអង្កេតរបស់ប្រទេសនេះបានលើកឡើងពីយុទ្ធនាការទាក់ទិននឹងការផ្តល់ព័ត៌មានមិនពិតប្រាកដ និងក្លែងក្លាយ ដោយមានគោលបំណងជះឥទ្ធិពលដល់ការបោះឆ្នោត ។
គួរបញ្ជាក់ថា ការបោះឆ្នោតនៅអាល្លឺម៉ង់ ត្រូវបានគិតថា នឹងប្រារព្ធឡើងក្នុងខែកញ្ញាខាងមុខ ។ ការសាកល្បងដាក់ការព្រមានរបស់ Facebook នេះ រួមមានជំនួយពីអង្គការត្រួតពិនិត្យការពិតខាងក្រៅក្រុមហ៊ុនផងដែរ ។
នៅពេលអ្នកប្រើប្រាស់ណាម្នាក់បង្ហោះពីអាសយដ្ឋាន (Link) ដែលត្រូវបានកត់សម្គាល់ដោយអ្នកត្រួតពិនិត្យទាំងនោះ ការព្រមាននឹងត្រូវបានបង្ហាញឡើងនៅក្រោមព័ត៌មាននោះ ។ ការធ្វើតេស្តនេះនឹងចាប់ផ្តើមក្នុងប្រទេសអាល្លឺម៉ង់ នារយៈពេលប៉ុន្មានសប្តាហ៍ខាងមុខ ។
អ្នកនាំពាក្យរបស់ Facebook និយាយផងដែរថា ៖ « ពេលដែលពួកយើងចាប់ផ្តើមវាក្នុងសហរដ្ឋអាមេរិក ពួកយើងនិយាយថា នឹងពង្រីកទៅកាន់ប្រទេសដទៃ ។ ពួកយើងបានស្តាប់សហគមន៍របស់ពួកយើង និងចាប់ផ្តើមការចរចាជាមួយដៃគូទូទាំងពិភពលោក ហើយការត្រៀមខ្លួនរួចរាល់របស់ដៃគូក្នុងប្រទេសអាល្លឺម៉ង់ នឹងអនុញ្ញាតឲ្យយើងចាប់ផ្តើមការធ្វើតេស្តក្នុងប្រទេសនោះ ។ ពួកយើងនឹងប្រកាសពីការធ្វើតេស្តនេះក្នុងប្រទេសបន្ថែមនាពេលឆាប់ៗនេះ » ៕
ចែករំលែកព័តមាននេះ