សហរដ្ឋអាមេរិក ៖ ប្រធានាធិបតីជាប់ឆ្នោតលោក Donald Trump បានព្រមានថា សហរដ្ឋអាមេរិកនឹងដាក់ពន្ធ៣៥% លើរថយន្តដែលក្រុមហ៊ុនផលិតរថយន្តអាល្លឺម៉ង់ BMW មានគម្រោងសាងសង់រោងចក្រថ្មីក្នុងប្រទេសម៉ិកស៊ិក និងនាំចេញកាន់ទីផ្សារអាមេរិក គ្រាដែលក្រុមហ៊ុនមួយនេះបានប្ដេជ្ញាកាលពីសប្ដាហ៍កន្លងទៅថា នឹងដំឡើងរោងចក្រនៅប្រទេសនេះឲ្យខាងតែបាន ។
លោក Trump បាននិយាយដូច្នេះក្នុងបទសម្ភាសន៍មួយជាមួយកាសែតរបស់ប្រទេសអាល្លឺម៉ង់ ដោយសម្តីរបស់លោកត្រូវបានចេញផ្សាយកាលពីថ្ងៃអាទិត្យកន្លងមក ។
អ្នកនាំពាក្យរបស់ BMW ម្នាក់និយាយថា រោងចក្រមួយរបស់ BMW Group ក្នុងទីក្រុងSan Luis Potosi ប្រទេសម៉ិកស៊ិក នឹងផលិតរថយន្តស៊េរី BMW 3 ដោយគ្រោងនឹងចាប់ផ្តើមពីឆ្នាំ២០១៩តទៅ ដែលផលិតផលសម្រេច គឺសម្រាប់ចែកចាយដល់ទីផ្សារទូទាំងពិភពលោក ។ រោងចក្រនៅម៉ិកស៊ិកនេះគឺគ្រាន់តែជាខ្សែផលិតកម្មបន្ថែមនៃប្រភេទរថយន្តនេះរបស់ខ្សែផលិតកម្មក្នុងអាល្លឺម៉ង់ និងចិនប៉ុណ្ណោះ ។
លោក Trump និយាយថា BMW គួរតែសាងសង់រោងចក្រផលិតរថយន្តរបស់ពួកគេក្នុងសហរដ្ឋអាមេរិក ព្រោះវានឹងល្អប្រសើរសម្រាប់ក្រុមហ៊ុន ។
លោកបន្តថា ប្រទេសអាល្លឺម៉ង់ គឺជាអ្នកផលិតរថយន្តដ៏ល្អមួយដូចដែលបានឃើញថារថយន្ត Mercedes Benz ត្រូវបានបើកបរជាច្រើនក្នុងទីក្រុងញូវយ៉ក ប៉ុន្តែផលប្រយោជន៍ គឺគ្មានលក្ខណៈទៅវិញទៅមកឡើយ ។
លោកនិយាយថា ជនជាតិអាល្លឺម៉ង់មិនបានទិញរថយន្ត Chevrolets ក្នុងចំនួនស្មើគ្នាទេ ធ្វើឲ្យទំនាក់ទំនងអាជីវកម្មក្លាយជាមិនយុត្តិធម៌ ។ លោកបន្តថា លោកគឺជាអ្នកគាំទ្រដល់ការធ្វើពាណិជ្ជកម្មសេរីម្នាក់ ប៉ុន្តែលោកមិនគាំទ្រទេ បើគ្មានការចំណេញ ។
អ្នកនាំពាក្យរបស់ BMW និយាយថា ក្រុមហ៊ុនចាត់ទុកសហរដ្ឋអាមេរិកដូចនឹងអាល្លឺម៉ង់អីចឹង ដោយមានការផ្តល់ការងារដោយផ្ទាល់ និងមិនផ្ទាល់ដល់មនុស្សជិត៧ម៉ឺននាក់ក្នុងប្រទេសនេះ ។
គួររំឭកថា កាលពីសប្ដាហ៍មុន ក្រុមហ៊ុន BMW បានបញ្ជាក់ថា ខ្លួននៅតែប្រកាន់គោលជំហរសាងសង់រោងចក្រថ្មីមួយនៅប្រទេសម៉ិកស៊ិក ក្នុងឆ្នាំ២០១៩ខាងមុខ ទោះបីជាមានការព្រមានពីសំណាក់ប្រធានាធិបតីជាប់ឆ្នោត លោក Donald Trump ថា នឹងដាក់ពន្ធយ៉ាងធ្ងន់ទៅលើរថយន្តដែលនាំចូលពីប្រទេសម៉ិកស៊ិកក្តី ។
ប្រធានផ្នែកលក់ និងទីផ្សាររបស់ក្រុមហ៊ុនអាល្លឺម៉ង់ លោក Ian Robertson ឲ្យដឹងថា ក្រុមហ៊ុន BMW ប្រកាន់ខ្ជាប់នូវគោលគំនិតសាងសង់រោងចក្រនៅម៉ិកស៊ិក ។
លោកពន្យល់ថា ក្រុមហ៊ុនត្រូវការពង្រីកផលិតកម្មលើសពីអ្វីដែលកំពុងមាននៅរោងចក្ររបស់ខ្លួននៅសហរដ្ឋអាមេរិក ក្នុងរដ្ឋសំខាន់ៗ ដូចជា Spartanburg និង South Carolina ដែលទាំងអស់នេះសុទ្ធតែបានក្លាយជារោងចក្រយ៉ាងសំខាន់ស្រាប់ហើយ ។ លោកមានប្រសាសន៍ថា ៖ « ពួកយើងត្រូវបន្ថែមសមត្ថភាពផលិត ។ ដូចនេះ ទើបយើងសាងសង់រោងចក្រនៅម៉ិកស៊ិកបន្ថែមទៀត » ។
គួរបញ្ជាក់ថា រោងចក្រនៅ Spartanburg អាចផលិតរថយន្តបាន៤៥ម៉ឺនគ្រឿងក្នុងមួយឆ្នាំ ៕
ចែករំលែកព័តមាននេះ