ខេត្តកំពត ៖ រោងចក្រផលិតស្បែកជើងដ៏ធំមួយជាការវិនិយោគរបស់ក្រុមហ៊ុនចិន គ្រោងនឹងដាក់ឲ្យដំណើរការនៅពេលឆាប់ៗខាងមុខ ដែលមានទីតាំងនៅស្រុកកំពង់ត្រាច ខេត្តកំពត ។ រោងចក្រនេះនឹងផ្ដល់ការងារដល់ប្រជាពលរដ្ឋក្នុងមូលដ្ឋាន និងពលរដ្ឋទូទៅរាប់ម៉ឺននាក់ ពិសេសផ្ដល់នូវចំណូលបន្ថែមសម្រាប់ផ្គត់ផ្គង់ជីវភាពគ្រួសារ និងចូលរួមកាត់បន្ថយការចំណាកស្រុកទៅធ្វើការខេត្តផ្សេង ឬទៅធ្វើពលករនៅក្រៅប្រទេសរបស់ពលរដ្ឋក្នុងខេត្តកែប និងខេត្តកំពតផងដែរ ។
លោក អ៊ុម ស៊ីណាត អភិបាលស្រុកកំពង់ត្រាច បានឲ្យដឹងតាមទូរស័ព្ទថា រោងចក្រនេះសាងសង់ជិតរួចរាល់ហើយ អាចនិយាយថា សាងសង់បាន៩៨ទៅ៩៩% និងចាប់ផ្ដើមរើសបុគ្គលិកបណ្ដើរៗដែរសម្រាប់បុគ្គលិកបង្គោល។ លោកថា ៖ « តាមរបាយការណ៍ដែលខ្ញុំទទួលបានឃើញថា គេសង់ជិតរួចហើយ នៅតែការងារសម្អាតផ្ទៃខាងក្នុងរោងចក្រ និងដាក់សម្ភារសម្រាប់ដំណើរការប៉ុណ្ណោះ ។ ពេលនេះគេចាប់ផ្ដើមរើសបុគ្គលិកមកបង្រៀនវគ្គទី១ ហើយនៅអំឡុងខែកុម្ភៈ ខ្ញុំគិតថា រោងចក្រនេះអាចនឹងដំណើរការ ។ រីឯបុគ្គលិក កម្មករ ក៏នឹងអាចចូលបម្រើការបានដែរ » ។
លោកបន្តថា រោងចក្រនេះនឹងផ្ដល់អត្ថប្រយោជន៍សំខាន់ណាស់សម្រាប់ប្រជាពលរដ្ឋនៅក្នុងមូលដ្ឋាន ។ ជាក់ស្ដែង ប្រជាពលរដ្ឋ មានការងារនៅជិតផ្ទះ អាចសន្សំសំចៃការចំណាយបានច្រើន មិនចាំបាច់ធ្វើចំណាកស្រុកដូចមុនៗ ទៅធ្វើការនៅភ្នំពេញ ឬខេត្តផ្សេងៗ ឡើយ ។ ក្រៅពីធ្វើជាបុគ្គលិក កម្មករនៅក្នុងរោងចក្រ ប្រជាពលរដ្ឋដែលនៅក្បែរនោះ ក៏អាចរកចំណូលបន្ថែមទៀតដូចជា លក់ដូរជូនកម្មករដែលបម្រើការនៅក្នុងរោងចក្រនោះជាដើម ។
លោកអភិបាលស្រុកបន្ថែមថា ៖ « បើតាមគេ [តំណាងរោងចក្រ] ជួបជាមួយខ្ញុំ បានប្រាប់ថា រោងចក្រគេត្រូវការបុគ្គលិកប្រមាណ១២ម៉ឺននាក់នៅពេលដែលរោងចក្រនោះចាប់ផ្ដើមដំណើរការដោយរលូន ។ ដូចនេះ វាផ្ដល់ឱកាសការងារច្រើនណាស់សម្រាប់ប្រជាពលរដ្ឋក្នុងខេត្តកំពត និងខេត្តកែប ជាពិសេសកម្មករនិយោជិតដែលជាកូនៗពេញកម្លាំងរបស់ប្រជាពលរដ្ឋនៅក្នុងខេត្តកំពត និងខេត្តកែប ហើយក៏អាចផ្ដល់ឱកាសដល់យុវជនមកពីក្រៅមូលដ្ឋានផងដែរ » ។
បុគ្គលិកមួយរូបបម្រើការនៅក្នុងរោងចក្រផ្នែកអគ្គិសនី បានឲ្យដឹងថា រោងចក្រចាប់ផ្ដើមរើសបុគ្គលិករយៈពេលប៉ុន្មានថ្ងៃមកហើយ ក្នុងនោះក៏មានប្រជាពលរដ្ឋជាច្រើនផងដែរ បានទៅដាក់ពាក្យដើម្បីធ្វើការ តែជាជំហានដំបូងរោងចក្រប្រកាសរើសអ្នកដែលធ្លាប់មានបទពិសោធន៍ក្នុងវិស័យហ្នឹងសិន ដើម្បីបង្រៀនដល់បុគ្គលិកកម្មករដែលនឹងចូលមកតាមក្រោយ ។
គួរបញ្ជាក់ថា រោងចក្រផលិតស្បែកជើងនេះ ត្រូវបានវិនិយោគដោយក្រុមហ៊ុនចិនឈ្មោះ «ពូ ចិន» ដែលបានបើកការដ្ឋានសាងសង់កាលពីថ្ងៃទី២៩ មីនា ឆ្នាំ២០១៦កន្លងមក នៅលើផ្ទៃដីចំនួន៨៣ហិកតា ។ តំណាងក្រុមហ៊ុនធ្លាប់បាននិយាយថា ជាជំហានដំបូង ក្រុមហ៊ុនត្រូវការបុគ្គលិកប្រមាណ៧ពាន់នាក់សម្រាប់បម្រើការងារ ហើយនៅពេលបន្តបន្ទាប់ នឹងជ្រើសរើសបុគ្គលិក កម្មករជាច្រើននាក់បន្ថែមទៀត ៕
ចែករំលែកព័តមាននេះ