សម្តេច ស ខេង យល់ព្រមជួបលោក កឹម សុខា នៅថ្ងៃទី២៥ មករា
រាជធានីភ្នំពេញ ៖ បើគ្មានការប្រែប្រួលទេ ប្រធានថ្នាក់ដឹកនាំតំណាងរាស្ត្រគណបក្សប្រជាជនកម្ពុជា និង ប្រធានថ្នាក់ដឹកនាំតំណាងរាស្ត្រគណបក្សសង្គ្រោះជាតិ
រាជធានីភ្នំពេញ ៖ បើគ្មានការប្រែប្រួលទេ ប្រធានថ្នាក់ដឹកនាំតំណាងរាស្ត្រគណបក្សប្រជាជនកម្ពុជា និង ប្រធានថ្នាក់ដឹកនាំតំណាងរាស្ត្រគណបក្សសង្គ្រោះជាតិ គ្រោងនឹងជួបគ្នានៅវិមានរដ្ឋសភាជាតិ វេលាម៉ោង៩ព្រឹកថ្ងៃទី២៥ មករា ២០១៧ ។
នេះបើយោងតាមលិខិតរបស់ខុទ្ទកាល័យសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ជម្រាបជូនខុទ្ទកាល័យលោក កឹម សុខា ប្រធានស្តីទីគណបក្សសង្គ្រោះជាតិ ។
បើតាមលិខិតដដែលចុះថ្ងៃទី១៦ មករានិងដែលទើបបង្ហាញជាសាធារណៈនៅព្រឹកថ្ងៃទី១៧ មករានេះ បានបញ្ជាក់ថា សមាសភាពខាងគណបក្សប្រជាជនកម្ពុជាដែលត្រូវចូលរួមក្នុងជំនួបនេោះរួមមាន៖ សម្តេចក្រឡាហោម ស ខេង ប្រធានថ្នាក់ដឹកនាំតំណាងរាស្ត្រគណបក្សប្រជាជនកម្ពុជា លោក សក់ សេដ្ឋា រដ្ឋលេខាធិការក្រសួងមហាផ្ទៃ និង លោក កើត រិទ្ឋ រដ្ឋលេខាធិការក្រសួងយុត្តិធ៌ម ។ ចំណែកខាងគណបក្សសង្គ្រោះជាតិវិញ បើតាមប្រភពពីមន្ត្រីជាន់ខ្ពស់គណបក្សនេះគឺមានលោក កឹម សុខា , លោក យឹម សុវណ្ណ និង លោក យ៉ែម បុញ្ញប្ញទ្ឋិ ។
យ៉ាងណាក៍ដោយ លិខិតរបស់ខុទ្ទកាល័យសម្តេចក្រឡាហោម មិនបានបញ្ជាក់ពីរបៀបវារៈដែលភាគីទាំងពីរនឹងត្រូវធ្វើការពិភាក្សាគ្នានៅសប្តាហ៍ក្រោយនោះទេ ខណៈដែលកាលពីថ្ងៃទី១៦ មករាម្សិលមិញ សម្តេចតេជោ ហ៊ុន សែន ពីប្រទេសស្វីសបានស្នើឲ្យមានការធ្វើវិសោធនកម្មបទបញ្ជាផ្ទៃក្នុងរដ្ឋសភា ដើម្បីលុបចោលវិញនូវមាត្រា៤៨ថ្មី(៣) ដែលចែងអំពីសិទ្ឋិអំណាចរបស់ប្រធានក្រុមមតិភាគតិចសភា ។
បើតាមសម្តេចតេជោនាយករដ្ឋមន្ត្រីដែលកំពុងចូលរួមវេទិកាសេដ្ឋកិច្ចពិភពលោកនៅប្រទេសស្វីស «បើយន្តការដែលទើបបង្កើតឡើងតាមរយៈប្រការ ៤៨ថ្មី (បី) នៃបទបញ្ជាផ្ទៃក្នុងរដ្ឋសភា ពិបាកក្នុងការធ្វើការរួមទាំងប៉ុនប៉ងចរចាដោះលែងអ្នកទោស ដែលបំពានដល់អំណាចតុលាការផងនោះ សម្តេចស្នើឲ្យធ្វើវិសោធនកម្មបទបញ្ជាផ្ទៃក្នុងរដ្ឋសភា ដើម្បីលុបចោល «ប្រធានក្រុមមតិភាគតិច និងប្រធានក្រុមថ្នាក់ដឹកនាំតំណាងរាស្ត្រ»។
ដោយឡែកបើតាមលោកអគ្គលេខាធិការរដ្ឋសភា ឡេង ប៉េងឡុង បានឲ្យដឹងថា របៀបវារៈដែលគណបក្សទាំងពីរបានធ្វើលិខិតឆ្លើយឆ្លងកាលពីថ្ងៃទី១៣-១៤ មករា ២០១៧នេះ គឺគណបក្សប្រជាជនបានដាក់របៀបវារៈស្តីពីតួនាទីនិងសិទ្ឋិអំណាចរបស់ប្រធានក្រុមមតិភាគច្រើននិងប្រធានក្រុមមតិភាគតិចក្នុងសភា ។ ចំណែកលិខិតរបស់គណបក្សសង្គ្រោះជាតិបានដាក់របៀបវារៈចំនួនពីរ គឺទី១-ការធ្វើវិសោធនកម្មច្បាប់បោះឆ្នោតតំណាងរាស្ត្រដើម្បីឲ្យពលរដ្ឋនៅក្រៅប្រទេសអាចបោះឆ្នោតបាន និងទី២- សភាពការណ៍មុនការបោះឆ្នោតក្រុមប្រឹក្សាឃុំ-សង្កាត់ ៕
ចែករំលែកព័តមាននេះ