រាជធានីភ្នំពេញ ៖ លោកម៉ែន អម្រុងរត្ន័ ជាតារាសម្តែង និងជាអ្នកបង្ហាញម៉ូដ ធ្លាប់មានការចេញមុខគ្រប់សកម្មភាពសិល្បៈ និងការថតស្ពត ព្រមជាមួយផលិតកម្មខារ៉ាអូខេក្នុងស្រុកមួយចំនួន ។
ខណៈដែលវិថីសិល្បៈមានការហក់ឡើងបន្តបន្ទាប់ លោកបានដកថយទៅពង្រឹងការសិក្សា រហូតមកទល់ពេលនេះ លោកបានបញ្ចប់ការសិក្សា ផ្នែកអនុបណ្ឌិតត្រៀមខ្លួនច្បាមយកសិល្បៈសារជាថ្មីវិញ។
បើទោះពេលនេះ លោកម៉ែន អម្រុងរត្ន័ ហាក់មានកិច្ចការល្អក្រៅអាជីពសិល្បៈ ក៏តារាវ័យក្មេងរាងខ្ពស់រូបនេះ នៅមិនទាន់ចិត្តដាច់ទៅណាឆ្ងាយពីដងវិថី ដែលលោកមាននិស្ស័យ ក្នុងខ្លួនតាំងពីវ័យក្មេងចោលដែរ ។ លោកតាំងចិត្តមកសម្តែងឡើងវិញ បន្ទាប់ពីឃ្លាតឆ្ងាយទៅពង្រឹងចំណេះដឹង ដែលជាអនាគតល្អបន្ទាប់ពីការសម្តែង ។
បច្ចុប្បន្ន តារាប្រុសម្នាក់នេះ ទើបតែជាប់ជាមន្ត្រីបម្រើការងារនៅក្នុងក្រសួងសង្គមកិច្ច និងទើបតែទទួលបានការតែងតាំងថ្មីៗបន្ថែមពីការបញ្ចប់ថ្នាក់អនុបណ្ឌិតដែលធ្វើឲ្យលោកសប្បាយចិត្តមានភាពនឹងថឹងចំពោះប្រាក់ខែរដ្ឋរហូតចាត់ទុកថាជារឿងស្មានមិនដល់។
បញ្ជាក់ប្រាប់អ្នកយកព័ត៌មានយើង លោកម៉ែន អម្រុងរត្ន័ ពីមុនក្នុងពេលដែលលោករៀនផងសម្តែងផង គឺហាក់មានភាពលំបាកលំបិនខ្លាំង ទាំងភាពជាតារាពន្លកថ្មី និងការប្រើប្រាស់ថវិកាមួយចំនួន ចំណាយលើការតុបតែងខ្លួនការស្លៀកពាក់ និងហូបចុក។
គ្រាមុន លោកស្ទើរតែអស់សង្ឃឹមក្នុងសិល្បៈ ដែលត្រូវពុះពារច្រើនក្នុងរូបភាពមិនទទួលបានផលចំណេញអ្វីក្រៅពីការធ្លាប់មិនឲ្យតម្លៃពីផលិតករមួយចំនួនម៉ាក់ងាយតួថ្មី និងការចំណាយពេលរាប់ម៉ោងទំរាំថតបានសម្រេច គឺគេទុកថ្លង់ចោលយូរៗដាក់តែតួជាបក្សពួកសម្តែងរបស់គេ ។
លោកថា យ៉ាងណាមិញលោកមិនបោះបង់ចោលឡើយ ព្រោះការស្រឡាញ់ត្រូវពុះពារដោយរំពឹងថា ពេលណាមួយនឹងមានពន្លឺខ្លះរះដូចតារារៀមច្បង ។ ក្រៅពីយល់ថា ខ្លួនស្រឡាញ់ពេញចិត្តសិល្បៈលោកចង់បានចំណេះដឹងដូចតារាស្រុកគេ ក៏ខិតខំរៀនរហូតបញ្ចប់ថ្នាក់បរិញ្ញាបត្រ និងបញ្ចប់ថ្នាក់អនុបណ្ឌិត ដើម្បីបន្ថែមការយល់ដឹងឱ្យបានច្រើន ក្នុងការរស់នៅរកស៊ី ក៏ដូចជាការចូលមកវិញក្នុងដងវិថីសិល្បៈមួយនេះសារជាថ្មី។
លោកពិតជាមានមោទនភាពខ្លាំង ដែលស្របពេលចប់ថ្នាក់បរិញ្ញាបត្រភ្លាមប្រឡងជាប់ជាស្ថាពរ ក្នុងនាមជាមន្ត្រីបម្រើការងារពេញសិទ្ធិរបស់ក្រសួងសង្គមកិច្ច ដោយទទួលបានប្រាក់ខែជាប់លាប់ ដែលជាការប៉ងរបស់លោកយូរមកហើយ ចំពោះអាជីពការងាររដ្ឋព្រោះថេរក្នុងឱកាសទទួលបានប្រាក់ខែ និងឡើងប្រាក់ខែបន្តបន្ទាប់ ។
មូលហេតុបែបនេះហើយ លោកនិងតស៊ូវិលមកប្រឡូកសិល្បៈឡើងវិញ គ្រាដែលោកមានការចូលចិត្តតាំងពីយូរមកហើយដើម្បីពង្រីកកេរ្តី៍ឈ្មោះនិងសាងស្នាដៃបន្តទៀតទុកឲ្យបងប្អូនបានស្គាល់គ្រាដែលនេះជាជីវិតយុវវ័យរបស់លោកគ្រាន់ចាស់ទៅបានរំលឹកឃើញស្នាដៃឡើងវិញខ្លះ។
គួរបញ្ជាក់ផងដែរថា លោកមែន អម្រុងរត្ន័ បានប្រឡូកសិល្បៈតាំងពីអំឡុងឆ្នាំ២០១៥ នៅពេលលោកបានចូលរួមប្រកួតកម្មវិធីបង្ហាញម៉ូដមួយ ។ ទោះមិនបានជាប់ជ័យលាភីទឹកចិត្តស្រឡាញ់ ទើបលោកបន្តការងារសិល្បៈ ដោយត្រូវបានអ្នកផលិតកម្មវិធីមួយចំនួនផ្តល់ការងារឲ្យលោកហើយការមានសមត្ថភាពរូបសម្បត្តិរបស់លោក ទើបត្រូវបានផលិតកម្មមួយចំនួនអញ្ជើញទៅសម្តែង
អឹមវី និងស្ពតពាណិជ្ជកម្មជាច្រើនផងដែរដែលជាបច្ច័យមួយឲ្យមហាជនបានស្គាល់ ។
ចែករំលែកព័តមាននេះ