រាជធានីភ្នំពេញ ៖ ដើម្បីការពារអ្នកប្រើប្រាស់ប្រេងឥន្ធនៈ និងលុបបំបាត់ភាពមន្ទិលសង្ស័យដែលកើតមានជាយូរមកហើយលើបញ្ហាចាក់សាំងមិនគ្រប់លីត្រ និងលាយសាំងបន្លំអតិថិជននោះ អគ្គនាយកដ្ឋានកាំកុងត្រូលគ្រោងរៀបចំច្បាប់ និង
រាជធានីភ្នំពេញ ៖ ដើម្បីការពារអ្នកប្រើប្រាស់ប្រេងឥន្ធនៈ និងលុបបំបាត់ភាពមន្ទិលសង្ស័យដែលកើតមានជាយូរមកហើយលើបញ្ហាចាក់សាំងមិនគ្រប់លីត្រ និងលាយសាំងបន្លំអតិថិជននោះ អគ្គនាយកដ្ឋានកាំកុងត្រូលគ្រោងរៀបចំច្បាប់ និងដាក់ឧបករណ៍ត្រួតពិនិត្យសាំងនៅតាមស្ថានីយនីមួយៗ ដើម្បីបញ្ឈប់ការឆ្លៀតឱកាសកេងចំណេញ និងបន្លំពីម្ចាស់ស្ថានីយប្រេងឥន្ធនៈ ។
ថ្លែងក្នុងសន្និបាតបូកសរុបការងារប្រចាំឆ្នាំ២០១៦ និងទិសដៅការងារឆ្នាំ២០១៧ លោក ម៉ក់ ពេជ្ជរិទ្ធ អគ្គនាយកនៃអគ្គនាយកដ្ឋានកាំកុងត្រូល បានលើកឡើងថា ដោយសារតែគ្មានអ្នកត្រួតពិនិត្យច្បាស់លាស់ជូនអតិថិជន ជួនកាល គេទិញសាំងមួយលីត្រ ប៉ុន្តែមិនបានគ្រប់មួយលីត្រនោះទេ ពោលគឺបានតែ០,៨០លីត្រ គឺបាត់តិចៗមិនគ្រប់ចំនួន។ លើសពីនេះ ពេលអតិថិជនចាក់សាំងស៊ុបពែរ បើអ្នកចាក់ដាក់សាំងធម្មតាឲ្យ ក៏អ្នកទិញមិនដឹងដែរ ។
លោកបញ្ជាក់ថា ៖ « ការចុះតាមស្ថានីយមើលបរិមាណរង្វាស់អត់គ្រប់ទេ កុំថាគ្រប់នោះ។ មានរថយន្ដទៅចាក់សាំង ពេលខ្លះចាក់ហើយចាំតែហុចលុយឲ្យគេទេ អត់មានត្រួតពិនិត្យអីទេ ដោយសារឃើញកុងទ័រវាចេញមកអីចឹង ប៉ុន្តែតាមពិតបាត់ គឺបាត់តិចៗ ។ ចាក់មួយលីត្របាត់តិច ដល់ចាក់១០លីត្របាត់ច្រើន ហើយបើចាក់១០០លីត្រ កាន់តែបាត់ច្រើនទៀត ហើយនេះជាការបាត់បង់ដែលយើងត្រូវតែមើលរឿងហ្នឹង » ។
ទាក់ទងនឹងការមន្ទិលសង្ស័យរឿងចាក់សាំងមិនគ្រប់លីត្រនេះ លោក សុខ សាកា អ្នករត់ម៉ូតូឌុបប្រាប់ថា លោកសង្ស័យដែរ ព្រោះមិនដឹងលេខដែលគេដាក់លើកុងទ័រពេលចាក់នោះសុក្រឹតត្រឹមត្រូវមែនឬអត់ ។ លោកថា ៖ « ពេលខ្លះចាក់២លីត្រអី ជិះបានមួយភ្លែតក៏អស់ មិនដឹងថាអ្នកចាក់ហ្នឹងគេចាក់ឲ្យយើងគ្រប់ឬអត់ទេ ។ ពេលចាក់សាំងរាល់ដង មើលតែលេខកុងទ័រនៅកន្លែងចាក់សាំង បើវាលោតគ្រប់២លីត្រ គឺគិតថាគ្រប់២លីត្រ ហើយឲ្យលុយគេតែម្តង ប៉ុន្តែមិនដឹងពិតជាគ្រប់ដូចលេខវាលោតហ្នឹងឬអត់ទេ»។
ចំពោះបញ្ហាប្រើសាំងប្រភេទតែមួយ តែបន្លំជាសាំងច្រើនប្រភេទយកតម្លៃខុសគ្នាវិញ លោក ថៃ ហៃអាវ បានបញ្ចេញមតិថា រឿងនេះលោកធ្លាប់សង្ស័យដែរ ព្រោះបើម្ចាស់ស្ថានីយគេលេងខូចអីចឹងមែន យើងអ្នកចាក់គឺពិតជាមិនដឹងនោះទេ ព្រោះពេលចាក់សាំងស៊ុបពែរ អ្នកចាក់គ្រាន់តែទាញទុយោពីសាំងស៊ុបពែរមក តែមិនប្រាកដថា សាំងនោះជាស៊ុបពែរមែន ឬមិនមែនទេ ដោយសារគ្មានអ្វីអះអាង ។ លោកបន្ថែមថា ៖ « បើគេយកសាំងធម្មតា ហើយមកបន្លំថាជាសាំងស៊ុបពែរ ក៏យើងមិនដឹងដែរ តែបើខាងក្រសួងគេមានចំណាត់ការលើរឿងនេះ គឺលោកគាំទ្រ » ។
អគ្គនាយកពាណិជ្ជកម្មនៃស្ថានីយប្រេងឥន្ធនៈ PTT លោក បិន ម៉ៃមាលា បានថ្លែងថា បើទោះជាខាងកាំកុងត្រូលមិនមកចុះត្រួតពិនិត្យ ក៏ខាងPTT មានប្រព័ន្ធត្រួតពិនិត្យលម្អិតលើផ្នែកនេះ៦ខែម្តងដែរ ដើម្បីចៀសវាងម៉ាស៊ីនដែលប្រើសម្រាប់ចាក់ជូនអតិថិជននោះវាដំណើរការមិនប្រក្រតី ។ យ៉ាងណាក៏ដោយ លោកបានសម្ដែងក្តីរីករាយ ប្រសិនបើមានវិធានការបែបនេះមែន លោកស្វាគមន៍ និងគាំទ្រ ដើម្បីចៀសវាងមានការមន្ទិលសង្ស័យពីប្រជាពលរដ្ឋ ។
ចំពោះករណីថា ចាក់សាំងស៊ុបពែរ តែបន្លំចាក់សាំងធម្មតាវិញ លោកបិន ម៉ៃមាលា អះអាងថា ក្រុមហ៊ុន PTTមិនធ្លាប់ធ្វើបែបនេះឡើយ។ លោកថា ៖ « នៅស្ថានីយគឺមានដាក់ពណ៌ខុសគ្នាតាមប្រភេទសាំង ហើយរឿងចាក់សាំងធម្មតា មកថាចាក់សាំងស៊ុបពែរគឺមិនអាចកើតឡើងនោះទេ ។ សម្រាប់ហ្គារាសផ្សេងយ៉ាងណា គឺមិនហ៊ានសន្មតបែបណាទេ តែសម្រាប់PTTវិញគឺមិនប្រើវិធីអីចឹងដាច់ខាត » ។
លោក ម៉ក់ ពេជ្ជរិទ្ធ អគ្គនាយកនៃអគ្គនាយកដ្ឋានកាំកុងត្រូលថ្លែងថា ការប្រិតព្រៀងលើតម្លៃប្រេងកុំឲ្យឡើងថ្លៃខ្លាំង គឺជារឿងល្អ ហើយបើមានឧបករណ៍ត្រួតពិនិត្យនៅតាមស្ថានីយបន្ថែមទៀតនោះ គឺកាន់តែល្អប្រសើរថែមទៀត ព្រោះកុំឲ្យមានការសង្ស័យពីអ្នកប្រើប្រាស់លើបញ្ហាបន្លំនេះ ។ ដូច្នេះហើយ លោកគ្រោងបង្កើតឲ្យមានការត្រួតពិនិត្យទៅលើគុណភាពប្រេងថែមទៀត ដោយត្រៀមនឹងធ្វើច្បាប់៣ រួមមាន ត្រួតពិនិត្យទំនិញ បង្ក្រាបការក្លែងបន្លំ ការពារអ្នកប្រើប្រាស់ និងមានកិច្ចការពារប្រកួតប្រជែងថែមទៀត៕
ចែករំលែកព័តមាននេះ