ឌុច លីដា ត្រូវផលិតករប្ដូរចេញកណ្ដាលទី
រាជធានីភ្នំពេញ ៖ តារាសម្តែងកញ្ញាឌុច លីដាបែកធ្លាយរឿងមានជម្លោះជាមួយផលិតករគ្រាដែលនាងសហការសម្តែង ។ ផលិតករនោះដូរតួអង្គលីដាចេញ ហើយយកអ្នកផ្សេងមកជំនួសខណៈការសម្តែងមិនទាន់ចប់
រាជធានីភ្នំពេញ ៖ តារាសម្តែងកញ្ញាឌុច លីដាបែកធ្លាយរឿងមានជម្លោះជាមួយផលិតករគ្រាដែលនាងសហការសម្តែង ។ ផលិតករនោះដូរតួអង្គលីដាចេញ ហើយយកអ្នកផ្សេងមកជំនួសខណៈការសម្តែងមិនទាន់ចប់សាច់រឿងនៅឡើយ ។ ចំពោះលីដាយល់ថា ជម្លោះនេះមិនធ្វើឲ្យប៉ះពាល់ដល់អាជីពសម្តែងរបស់នាងទេ ។
នេះជាលើកទីមួយហើយដែលកញ្ញាឌុច លីដា កើតរឿងរកាំរកូសជាមួយចាងហ្វាងផលិតកម្មគ្រាដែលនាងសម្តែងឲ្យក្នុងចំណងកិច្ចសន្យា ហើយត្រូវបញ្ចប់ទាំងកណ្តាលទី ។ មូលហេតុចម្រូងចម្រាសនេះត្រូវបានទម្លាយចេញដោយផលិតកម្មបដិហាភាពយន្ត ។ ផលិតកម្មនេះបានផ្អិបរឿងរ៉ាវនោះយូរមកហើយដោយមិនចង់ឲ្យមានរឿងវែងឆ្ងាយ ។ ផលិតករបានទម្លាក់កំហុសលើឌុច លីដា ថា ជាតួអង្គពិបាកហៅសម្តែងដូច្នេះហើយទើបសម្រេចចិត្តមិនទទួលនាងថតបន្តខណៈរឿងកំពុងថត ដោយត្រូវផ្លាស់ប្តូរនាងចេញ។
ទាក់ទងនឹងរឿងរ៉ាវនេះឌុច លីដា បកស្រាយក្នុងពេលចូលរួមសម្ពោធភាពយន្តរឿង«ស្នេហ៍ស្វ័យគុណ៤»កាលពីល្ងាចថ្ងៃទី១១ មករា ឆ្នាំ២០១៧ថា «ត្រង់ចំណុចរឿងរ៉ាវនេះនាងខ្ញុំសុំជម្រះឲ្យអស់ចម្ងល់ ហើយនេះជាលើកទី១ហើយដែលនាងខ្ញុំប៉ះរឿងរ៉ាវជម្លោះ ខ្លះៗជាមួយផលិតកម្ម ។ តាំងពីនាងខ្ញុំចេះថតកុនតាមផលិតកម្មមក មានតែផលិតកម្មមួយនេះទេ ដែលនាងខ្ញុំមានបញ្ហាជាមួយ ។ ការកើតរឿងនេះឡើងទី១មកពីផលិតករ ឬផលិតកម្មនិយាយអត់ច្បាស់ ពេលចុះកុងត្រានិយាយ ផ្សេងពេលថតនិយាយផ្សឹង នេះជាបញ្ហាទី១ ។ បញ្ហាមួយទៀតនៅពេលនាងខ្ញុំព្រមព្រៀងថតជាមួយគាត់ នាងខ្ញុំស្រាប់តែមានជំងឺ ហើយនាងខ្ញុំពិតជាឈឺមែន ហើយត្រង់ចំណុចនេះឲ្យនាងខ្ញុំបកស្រាយបែបណាបើមនុស្សឈឺពិត និងឲ្យនាងខ្ញុំព្យាយាមទៅថតរបៀបណា។ ប៉ុន្តែចំណុចសំខាន់គាត់មិនបានមើលកំហុសខ្លួនគាត់នោះទេ និយាយមិនច្បាស់លាស់ជាមួយជំនួយការរបស់គាត់ ។ នៅពេលដែលខាងគាត់សម្រេចផ្លាស់ប្តូរតួនាងខ្ញុំពាក់កណ្តាលទី ហើយដាក់អ្នកផ្សេង និយាយរួមគឺនេះជាលើកទី១បំផុត ដែលនាងខ្ញុំបានជួបមនុស្សដែលនិយាយការងារក្រឡិចក្រឡុចបែបនេះ និងជាលើកទី១ដែលនាងខ្ញុំឈឺចំពេលសម្តែងរឿងនោះពិតជាចៃដន្យមែន ។
សម្រាប់នាងខ្ញុំមិនបារម្ភចំពោះការប៉ះពាល់ទីផ្សារសម្រាប់អាជីពសម្តែងនោះទេ ព្រោះអ្នកដែលធ្លាប់ធ្វើការជាមួយនាងខ្ញុំក៏ដូចជាមួយបណ្តាផលិតកម្មជាច្រើនទៀត គាត់នឹងយល់ច្បាស់ថាចរិតធ្វើការ ឬរបៀបធ្វើការរបស់នាងខ្ញុំបែបណា បើមិនដូចនេះនាងខ្ញុំគ្មានការងារធ្វើលើវិស័យកុននេះបានយូរនោះឡើយ ។ នាងខ្ញុំជាមនុស្សទទួលខុសត្រូវការងារដូចគេឯង មិនអាចឱ្យសម្តីគាត់ ឬក្រុមការងារគាត់មួយក្រុមនិយាយអ្វីលើនាងខ្ញុំបាននោះទេ ព្រោះអ្នកធ្លាប់ធ្វើការជាមួយនាងខ្ញុំគាត់ស្គាល់ចរិតលក្ខណៈរបស់នាងខ្ញុំរួចហើយ ។
សម្រាប់នាងខ្ញុំដើម្បីបានស្ថិរភាពក្នុងការសម្តែងក្នុងតួអង្គ សំខាន់ៗនាងខ្ញុំបានព្យាយាមខំធ្វើការឲ្យបានល្អ និងនៅតែរក្សាប្រជាប្រិយរបស់យើងជាមួយអ្នកដទៃ ។ ទម្លាប់នាងខ្ញុំពេលថតនាងខ្ញុំប្រាប់គេថា ក្នុងខែនេះនាងខ្ញុំរវល់អាចទទួលនាងខ្ញុំបានអត់ ពេលនិយាយគ្នាត្រូវទើបយើងទទួលយករឿងផ្សេងទៀតគ្រាកំពុងមានការងារ ពោលគឺឈ្លោះគ្នាឲ្យហើយ ទើបសហការគ្នាធ្វើការ។ ដូចនេះកន្លងមកនាងខ្ញុំគ្មានបញ្ហាទាក់ទងជាមួយថ្ងៃថតអ្វីនោះទេ ហើយ មុនៗនាងខ្ញុំក៏ទទួលការងារច្រើនមិនដែលមានរឿងនោះទេ គឺខាងផលិតករគាត់យល់ និងអធ្យាស្រ័យរហូតដែរ» ។
កញ្ញាឌុច លីដា អំឡុងឆ្នាំ២០១៦ ជាតារាស្រីមួយដួងដែលទទួលបានការងារសម្តែងឱ្យផលិតកម្មនានាច្រើន ។ សម្រាប់ឆ្នាំ២០១៧នេះលីដាមានស្នាដៃភាពយន្តបីរឿងកំពុងត្រៀមចាក់បញ្ចាំង និងពីររឿងទៀតកំពុងសម្តែង ។ បណ្តារឿងរបស់នាងដែលត្រៀមបង្ហាញតាមរោងកុន រួមមានរឿង «ស្នេហ៍ស្វ័យគុណ៤», រឿង«ទឹកចិត្តម្តាយសម័យថ្មី» និងរឿង«Jaibreak ឬការពារឧក្រិដ្ឋជន»៕
ចែករំលែកព័តមាននេះ