បើតាមការអះអាងរបស់លោកវេជ្ជបណ្ឌិត Dr. Boonlert Imraporn និងវេជ្ជបណ្ឌិត Dr. Sukprasert Jutaghokiat វេជ្ជបណ្ឌិតនៅមជ្ឈមណ្ឌល ផ្នែកក្រពះពោះវៀននិងថ្លើម របស់មន្ទីរពេទ្យវេជ្ជថានីនៃប្រទេសថៃបានឲ្យដឹង
បើតាមការអះអាងរបស់លោកវេជ្ជបណ្ឌិត Dr. Boonlert Imraporn និងវេជ្ជបណ្ឌិត Dr. Sukprasert Jutaghokiat វេជ្ជបណ្ឌិតនៅមជ្ឈមណ្ឌល ផ្នែកក្រពះពោះវៀននិងថ្លើម របស់មន្ទីរពេទ្យវេជ្ជថានីនៃប្រទេសថៃបានឲ្យដឹងថា ការទល់លាមកភាគច្រើនត្រូវបានប្រទះឃើញនៅលើមនុស្សវ័យចំណាស់ តែបច្ចុប្បន្នបែរជាប្រទះឃើញនៅលើមនុស្សដែលមានអាយុតិចទៅវិញ នេះអាចមកពីកត្តាជាច្រើនដូចជា៖
-ការចូលចិត្តទទួលទានអាហារលឿនពេក (Fast Food)
-ការប្រើប្រាស់ជីវិតបែបប្រញាប់ មិនមានពេលវេលា សូម្បីសម្រាប់បន្ទោបង់
-ខកខានការបន្ទោបង់ជាញឹកញាប់
-រួមទាំងការស្ត្រេសជាដើម។
ទាំងអស់នេះបានធ្វើឲ្យកើតមានការទល់លាមកបាន ហើយពេលដែលមានបញ្ហានេះកើតឡើង ភាគច្រើនលោកអ្នកតែងតែប្រើប្រាស់ថ្នាំជួយបន្ទន់លាមកឲ្យស្រួលបន្ទោបង់ ការធ្វើបែបនេះញឹកញាប់យូរៗទៅ នឹងអាចនាំមកនូវលទ្ធផលធ្ងន់ធ្ងរបានដែលធ្វើឱ្យពោះវៀន និងរន្ធទ្វារធំមិនធ្វើការ និងអាចធ្វើឲ្យពោះវៀនធ្លុះបាននៅដំណាក់កាលចុងក្រោយ ។
លោកវេជ្ជបណ្ឌិតថ្លែងបញ្ជាក់ថា មូលហេតុចម្បងនៃការទល់លាមករ៉ាំរ៉ៃចែកជាក្រុមសំខាន់បីយ៉ាង ៖
១-ពោះវៀនធំចាប់ផ្តើមធ្វើការយឺតជាងមុន ភាគច្រើនមានអាការឈឺបន្ទោបង់ចុះខ្សោយ ឬ អាចមិនមានអារម្មណ៍ចង់បន្ទោបង់ជាច្រើនថ្ងៃ
២-ជំងឺរលាកពោះវៀន បច្ចុប្បន្នគេរកឃើញថាការទល់លាមករ៉ាំរ៉ៃអាចពាក់ព័ន្ធនឹងបាក់តេរីប្រភេទខ្លះក្នុងពោះវៀនដែលផលិតមេតាន។ មេតានធ្វើឲ្យពោះវៀនធ្វើការយឺតជាងមុន និងធ្វើឲ្យមានការទល់លាមក
៣-រន្ធទ្វាធំមិនព្រមបើកនៅពេលបន្ទោបង់ តែងមានអាការបន្ទោបង់មិនអស់ ហើយយើងតែងតែប្រើប្រាស់វិធីផ្សេងៗដើម្បីជួយឲ្យងាយស្រួលក្នុងការបន្ទោបង់។ ការប្រើប្រាស់ថ្នាំបន្ទន់លាមកជាវិធីងាយស្រួលក្នុងការបត់ជើងធំ ប៉ុន្តែការបើប្រើប្រាស់ថ្នាំប្រភេទនេះយូរៗទៅអាចធ្វើឱ្យពោះវៀនធំមិនធ្វើការ ហើយនៅពេលនោះការប្រើប្រាស់ថ្នាំកាន់តែកើនឡើង ព្រោះការទល់លាមកចេះតែធ្ងន់ធ្ងរទៅៗ ។
ការព្យាបាលជំងឺទល់លាមកដែលខុសវិធីសាស្ត្របែបនេះអាចជះឥទ្ធិពលអាក្រក់ដល់រាងកាយដូចជា ៖
-អាចធ្វើឲ្យពោះវៀនធ្លុះ
-រលាករន្ធទ្វារធំ
-ពោះវៀនមិនធ្វើការ ឬអាចកើតឫសដូងបាត ។ ការទល់លាមកក៏អាចបណ្តាលមកពីលោកអ្នក ទទួលទានអាហារដែលខ្វះជាតិសរសៃ, ផឹកទឹកមិនបានគ្រប់គ្រាន់, មិនហាត់ប្រាណ, អង្គុយធ្វើការពេញមួយថ្ងៃ, ទទួល ទានវីតាមីនឬធាតុរ៉ែដែលធ្វើឲ្យពោះវៀនធ្វើការយឺតជាងមុន និងជំងឺមួយចំនួនដូចជា ជំងឺក្រពេញទីរ៉ូអីុតធ្វើការថយចុះ និងមហារីកពោះវៀនផងដែរ។ ដូច្នេះដើម្បីការពារអាការទល់លាមក លោកអ្នកអាចអនុវត្តតាមគោលការណ៍ដូចខាងក្រោម ៖
-ទទួលទានអាហារដែលមានជាតិសរសៃ
-ផឹកទឹកឲ្យបានគ្រប់គ្រាន់
-ហាត់ប្រាណឲ្យបានទៀងទាត់ ពេលនោះសាច់ដុំរន្ធទ្វារធំ និងពោះវៀនមានចលនាក្នុងការបន្ទោបង់បានប្រសើរឡើង
-ព្យាយាមបន្ទោបង់ឱ្យបានទៀងពេល
-មិនគួរអានសៀវភៅឬលេងទូរស័ព្ទខណៈកំពុងបន្ទោបង់
-មិនគួរប្រើថ្នាំជួយក្នុងការបន្ទោបង់ញឹកញាប់ពេកទេ គួរជ្រើសរើសវិធីប្រើថ្នាំនេះជាជម្រើសចុងក្រោយទៅបានហើយ ៕
ចែករំលែកព័តមាននេះ