និស្សិតស្រីវ័យក្មេងម្នាក់ខណៈកំពុងជួយលក់ផាក់ឡូវ ស្រាប់តែ…
រាជធានីភ្នំពេញ ៖ និស្សិតស្រីវ័យក្មេងស្រស់ស្អាតម្នាក់ ខណៈទំនេរពីការសិក្សាបានទៅជួយលក់សាច់ផាក់ឡូវក្រុមគ្រួសារជាមួយបងប្រុស ស្រាប់តែបុរស៣នាក់ជិះម៉ូតូមក …
រាជធានីភ្នំពេញ ៖ និស្សិតស្រីវ័យក្មេងស្រស់ស្អាតម្នាក់ ខណៈទំនេរពីការសិក្សាបានទៅជួយលក់សាច់ផាក់ឡូវក្រុមគ្រួសារជាមួយបងប្រុស ស្រាប់តែបុរស៣នាក់ជិះម៉ូតូមកដល់យកដុំថ្មគប់បង្កឲ្យមានការភ្ញាក់ផ្អើលកាលពីវេលាម៉ោង៧ និង៣០នាទីយប់ ថ្ងៃទី១៦ ខែមករា ឆ្នាំ២០១៧ នៅជិតច្រកចូលផ្សារប៉េសេចាស់ ផ្លូវលេខ៣៧១ ភូមិក្បាលទំនប់ សង្កាត់បឹងទំពុន ខណ្ឌមានជ័យ ។
នារីរងគ្រោះឈ្មោះ សាំង ស៊ីវ៉ា ហៅ ធូង អាយុ២១ឆ្នាំ ជានិស្សិតឆ្នាំទី៤ នៅវិទ្យាស្ថាន PSE ស្នាក់នៅផ្ទះលេខ២៧១ ផ្លូវលេខ៥០BT ភូមិក្បាលទំនប់២ សង្កាត់បឹងទំពុន ខណ្ឌមានជ័យ ចំណែកជនបង្កត្រូវបានបងប្អូននារីរងគ្រោះឃាត់ខ្លួនបានម្នាក់ឈ្មោះ ទេព វាសនា ភេទប្រុស អាយុ២០ឆ្នាំ ជានិស្សិតឆ្នាំទី២ នៅវិទ្យាស្ថាន PSE ស្នាក់នៅផ្ទះជួលភូមិទ្រា សង្កាត់ស្ទឹងមានជ័យ ខណ្ឌមានជ័យ ។
បើតាមសម្តីនារីរងគ្រោះបានឲ្យដឹងថា ឆ្លៀតពេលទំនេរពីការសិក្សានាងបានមកជួយលក់សាច់ផាក់ឡូវក្រុមគ្រួសារនៅកន្លែងកើតហេតុខាងលើជារៀងរាល់ថ្ងៃ ។ មុនពេលកើតហេតុ នាងកំពុងតែឈរកាប់សាច់ផាក់ឡូវលក់អស់គេ ស្រាប់តែមានជនបង្ក៣នាក់ ជិះម៉ូតូមិនស្គាល់ម៉ាក១គ្រឿងបានធ្វើដំណើរតាមផ្លូវលេខ៣៧១ ក្នុងទិសដៅពីកើតទៅលិច ខណៈមកដល់ចំណុចកើតហេតុស្រាប់តែបុរសដែលអង្គុយខាងក្រោយគេបានយកដុំថ្មគប់សំដៅមកទូកញ្ចក់ដែលដាក់ផាក់ឡូវលក់បណ្ដាលឲ្យបែកខ្ទាតអំបែងកញ្ចក់ទូមកចំពីមុខនាងចំហៀងខាងស្ដាំរយះហូរឈាមដោយមិនដឹងខ្លួន ហើយក៏ត្រូវបានបងប្អូនដែលនៅក្បែរនោះដឹកតាមម៉ូតូយកទៅព្យាបាលរបួសនៅមន្ទីរពហុព្យាបាលបញ្ញាសក្តិ ដោយមិនបានដេរមុខរបួសទេ ព្រោះខ្លាចមានស្នាមមុខ ។
ប្រភពដដែលបន្តទៀតថា ភ្លាមៗនោះជនបង្កទាំង៣នាក់បានព្យាយាមជិះម៉ូតូបន្ថែមល្បឿនបើករត់រហូតដល់ជិតសាលាអង្គការភាពញញឹមនៃកុមារកម្ពុជា ក៏ត្រូវបងប្អូនរបស់នារីរងគ្រោះជិះម៉ូតូដេញតាមឃាត់ខ្លួនបានម្នាក់ក្នុងចំណោមបក្សពួក៣នាក់យកទៅប្រគល់ឲ្យសមត្ថកិច្ចប៉ុស្តិ៍បឹងទំពុន ដើម្បីធ្វើការសាកសួរ ។
នៅពេលសមត្ថកិច្ចសាកសួរជនបង្កបានសារភាពថា រូបគេ និងបក្សពួកពិតជាបានយកដុំថ្មគប់សំដៅទៅកន្លែងលក់សាច់ផាក់ឡូវមែន តែពួកគេគប់នោះមិនមែនមានបំណងចង់ឲ្យត្រូវនារីរងគ្រោះនោះទេ គឺពួកគេមានបំណងចង់គប់ឲ្យចំបងប្រុសនារីរងគ្រោះ ព្រោះអីពួកគេនិងបងប្រុសរបស់នារីរងគ្រោះបានមានទំនាស់គ្នាជាមួយកាលពីល្ងាចនៅឯសាលារៀនជាមួយគ្នា ។ ជនបង្កបាននិយាយបន្តទៀតថា រូបគេមិនមែនជាអ្នកគប់នោះទេ គឺគេគ្រាន់តែអ្នកបើកម៉ូតូតែប៉ុណ្ណោះ ចំណែកអ្នកគប់បានរត់គេខ្លួនបាត់អស់ហើយ ។
ក្រោយពេលសាកសួររួច ជនរងគ្រោះបានមកដាក់ពាក្យបណ្តឹងនៅប៉ុស្តិ៍នគរបាលបឹងទំពុន ដើម្បីឲ្យសមត្ថកិច្ចធ្វើតាមនីតិវិធី គឺគ្មានសំណងជាលុយនោះទេ ។ ចំណែកជនបង្កត្រូវបានសមត្ថកិច្ចកសាងសំណុំរឿងដើម្បីបញ្ជូនខ្លួនទៅអធិការដ្ឋាននគរបាលខណ្ឌមានជ័យ ដើម្បីចាត់ការបន្ត ៕
ចែករំលែកព័តមាននេះ