កម្មកររោងចក្រ ហ្គ្រេតអននើរ ដែលថៅកែរត់ចោល សុំការអន្តរាគមន៍ពីសម្តេចតេជោ
ខេត្តកណ្ដាល ៖ កម្មករ កម្មការិនី រោងចក្រតម្បាញ ហ្គ្រេតអនើរ ថេកស្តាយហ្វេកធើរី លីមីធីត (Great Honour Texttile Factory Limited) រាប់រយនាក់ តំណាងឱ្យកម្មករ
ខេត្តកណ្ដាល ៖ កម្មករ កម្មការិនី រោងចក្រតម្បាញ ហ្គ្រេតអនើរ ថេកស្តាយហ្វេកធើរី លីមីធីត (Great Honour Texttile Factory Limited) រាប់រយនាក់ តំណាងឱ្យកម្មករ ៩៧១នាក់ បាននាំគ្នាប្រមូលផ្តុំនៅក្នុងរោងចក្រកាលពីព្រឹកថ្ងៃទី១៦ មករានេះ ដើម្បីស្នើសុំដល់សម្តេចតេជោ ហ៊ុន សែន ជួយធ្វើអន្តរាគមន៍២ចំណុច បន្ទាប់ពីថៅកែរត់ចោលរោងចក្រ ហើយសំណុំរឿងបានជាប់គាំងនៅតុលាការរយៈពេល៦ខែមកហើយ ជាពិសេសសុំថវិកាបុរេប្រទាន។
សហព័ន្ធសហជីពចំនួន៧ ត្រូវបានកម្មករនៅក្នុងរោងចក្រទាំងមូល ពឹងពាក់ជាតំណាងដើម្បីជួយជម្រុញ និងជួយដោះស្រាយតាមនីតិវិធីជាបន្តបន្ទាប់ ដោយអហិង្សា គឺ១-សហព័ន្ធសហជីព សំឡេងយុវជនខ្មែរ ដឹកនាំដោយលោក ឡុង សុផាត ២- សហព័ន្ធសហជីព យុវជនខ្មែរ ដឹកនាំដោយលោក យឹង ឈុន ៣-សហព័ន្ធសហជីព មោទនភាពកម្មករខ្មែរ ដឹកនាំដោយលោក នៅ ទិត្ថា ៤-សហព័ន្ធសហជីព ការងារដើម្បីកម្ពុជា ដឹកនាំដោយលោក សៀ សន ៥-សម្ព័ន្ធសហជីព បេះដូងកម្មករខ្មែរ ដឹកនាំដោយលោក សាន់ ផាន ៦-សហព័ន្ធសហជីព ស្មារតីកម្មករខ្មែរ ដឹកនាំដោយលោក មុំ សៀក និង៧-សហព័ន្ធសហជីព កម្មករកម្ពុជា ដឹកនាំដោយលោក សោម អូន។
លោក សោម អូន តំណាងសហជីពទាំង៧ នៅក្នុងការចុះពិនិត្យ និងជួបពិភាក្សាជាមួយកម្មករ កម្មការិនី នៅរោងចក្រ ហ្គ្រេត អនើរ ដែលមានទៅតាំងនៅក្នុងភូមិលេខ៤ ឃុំស្វាយរលំ ស្រុកស្អាង ខេត្តកណ្តាល នៅព្រឹកថ្ងៃទី១៦ ខែមករា ឆ្នាំ២០១៧ បានថ្លែងថា ខណៈដែលថៅកែរោងចក្របានរត់ចោលកម្មករ កម្មការិនី ដែលមានកម្មករសរុប៩៧១នាក់កន្លងមកនេះ បានធ្វើឱ្យកម្មករ កម្មការិនី ដែលមានជីវភាពពឹងផ្អែកនៅលើមុខរបរនេះ ពួកគាត់កំពុងជួបនូវស្ថានភាពលំបាក ដោយថៅកែមិនបាន ចេញមុខទូទាត់ ប្រាក់បំណាច់ផ្សេងៗ សរុបជាទឹកប្រាក់មានចំនួន ២.៨៧៨.៧០៩ ដុល្លារអាមេរិក ។
លោក សោម អូន បានបន្តថា បច្ចុប្បន្នសំណុំរឿងនេះ បានផុតចេញពីដៃអាជ្ញាធរខេត្ត ហើយកំពុងស្ថិតនៅក្នុងដៃតុលាការខេត្តកណ្តាល ដែលកំពុងអូស បន្លាយការងារនេះយ៉ាងយូររហូតដល់៦ខែ បង្កឱ្យមានផលប៉ះពាល់យ៉ាងធ្ងន់ធ្ងរដល់ជីវភាពប្រចាំថ្ងៃ និងសតិអារម្មរណ៍ របស់បងប្អូនកម្មករកម្មការិនី ។ ក្នុងនោះមានកម្មការិនី១០នាក់បានសម្រាលកូនក្នុងអំឡុងពេលនេះ ដែលកាន់តែលំបាកត្រូវការជំនួយមនុស្សធម៌។ ពាក់ព័ន្ធបញ្ហានេះ តំណាងសហព័ន្ធសហជីពចំនួន៧ បានធ្វើញត្តិរួមគ្នាគោរពស្នើសុំ សម្តេចអគ្គមហាសេនាបតីតេជោ ហ៊ុន សែន មេត្តាជួយអន្តរាគមន៍ដោះស្រាយករណីរោងចក្រខាងលើនេះ គឺទីមួយ ជួយពន្លឿនលើផ្នែកប្រព័ន្ធច្បាប់តុលាការខេត្តកណ្តាល ចេញសាលក្រមលក់ទ្រព្យសម្បត្តិឱ្យបានឆាប់ និងទីពីរសូមសម្តេចមេត្តាជួយផ្តល់ថវិកាបុរេប្បទានរបស់រាជរដ្ឋាភិបាលជាមុន ដូចករណីនៅរោងចក្រយ៉ុងវ៉ា ដើម្បីបើកជូនកម្មករ នៅពេលដែលកម្មករ កម្មការិនីកំពុងជួបការលំបាក។
ជុំវិញករណីថៅកែរោងចក្ររត់ចោលនេះ តំណាងសហជីពរួមនឹងកម្មករនិយោជិតទាំងអស់ មានជំនឿយ៉ាងមុតមាំ និងមានការជឿជាក់យ៉ាងខ្លាំងលើ សម្តេចតេជោ តែម្នាក់គត់ ដែលអាចជួយអន្តរាគមន៍ និងពន្លឿនដោះស្រាយ ករណីខាងលើនេះ ដើម្បីឱ្យកម្មករ កម្មការិនីបានទទួលនូវប្រាក់បំណាច់ផ្សេងៗ ទៅតាមច្បាប់ស្តីពីការងារ និងធានាបាន នូវជីវភាពរបស់កម្មករមានភាពប្រក្រតីឡើងវិញ។ កម្មការិនីឈ្មោះ សោម សុភាព អាយុ៤៣ឆ្នាំ បានឱ្យដឹងថា “ខ្ញុំធ្វើការនៅរោងចក្រនេះរយៈពេល១៥ឆ្នាំហើយ ពោលតាំងពីក្មេង រហូតដល់ពេលនេះសុំគេចូលធ្វើការនៅរោងចក្រផ្សេងគេមិនទទួលដោយសារលើសអាយុ។ ដូច្នេះគឺមានតែសម្តេចតេជោម្នាក់គត់អាចជួយដោះស្រាយដល់កម្មករដែលមានវ័យចំណាស់ ដើម្បីយកដើមទុនទៅប្រកបមុខរបរផ្សេងវិញ “។
សោម សុភាព បន្តថា នៅក្នុងអំឡុងពេលថៅកែរត់ចោលកម្មករ មានកម្មការិនី១០នាក់បានសម្រាលកូន ដែលជួបការលំបាកយ៉ាងខ្លាំងត្រូវការជំនួយមនុស្សធម៌។ កម្មការិនីមួយចំនួនដែលបានខ្ចីលុយធនាគារ គ្មានលុយបង់ឱ្យគេតាមកំណត់កំពុងប្រឈមនឹងការរឹបអូសយកដី និងផ្ទះ។ អ្នកជួលផ្ទះ កំពុងប្រឈមនឹងការបង់ថ្លៃផ្ទះ ទឹក ភ្លើង និងជីវភាពប្រចាំថ្ងៃ ។ ចំណែកលោកណយ រដ្ឋា អាយុ៤០ឆ្នាំ ដែលបានធ្វើការនៅរោងចក្រនេះបាន១៨ឆ្នាំបានសំណូមពរយ៉ាងទទូចដល់សម្តេចតេជោ ហ៊ុន សែន មេត្តាជួយផ្តល់ថវិកាបុរេប្រទាន ដល់កម្មករដូចនៅរោងចក្រយ៉ុងវ៉ា ហើយរដ្ឋទូទាត់គ្នាជាមួយម្ចាស់ដីរោងចក្រជាក្រោយនៅពេលតុលាការលក់ដី និងអគារបាន ព្រោះអីកម្មករបានរង់ចាំនីតិវិធីអស់រយៈពេល៦ខែហើយ ។
លោក សោម អូន បានបញ្ជាក់ចុងក្រោយសូមឱ្យកម្មករ កម្មការិនីទាំងអស់បន្តអត់ធ្មត់ ដោយវិធីអហិង្សា ហើយនៅសប្តាហ៍ក្រោយលោកនឹងនាំតំណាងកម្មករទៅជួបលោកចៅក្រមដែលកាន់សំណុំរឿងនេះដើម្បីសាកសួរព័ត៌មានបន្ថែមទៀត ៕
ចែករំលែកព័តមាននេះ