ខេត្តកំពង់ឆ្នាំង ៖ ជនសង្ស័យ៥នាក់ត្រូវកម្លាំងនគរបាលក្រុងកំពង់ឆ្នាំង សហការជាមួយការិយាល័យជំនាញ នៃស្នងការដ្ឋាននគរបាលខេត្ត ធ្វើការចាប់ឃាត់ខ្លួន រួមនឹងវត្ថុតាងមួយចំនួន កាលពីវេលាម៉ោង៩ និង៣០នាទីព្រឹក ថ្ងៃទី១៥ ខែមករា ឆ្នាំ២០១៧ នៅចំណុចកោះត្រឡាច ស្ថិតក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង ខណៈដែលពួកគេកំពុងចែកចាយ និងប្រើប្រាស់គ្រឿងញៀន។
លោក ឆាយ ខេមរ័ត្ន បានឲ្យដឹងថា ជនសង្ស័យទាំង៥នាក់ ១.ឈ្មោះ ឃឹម សុភី ភេទប្រុស អាយុ៣០ឆ្នាំ ២.ឈ្មោះ ឈីវ សុខ ភេទប្រុស អាយុ៣២ឆ្នាំ ៣.ឈ្មោះ មាស ម៉ាប់ ភេទប្រុស អាយុ៣៦ឆ្នាំ ៤.ឈ្មោះ ទៀង សាន់ ភេទប្រុស អាយុ១៧ឆ្នាំ ទាំង៤នាក់ មានទីលំនៅភូមិចំការឃ្លៃ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង និង៥.ឈ្មោះ វ័ន្ត លីហុង ភេទប្រុស អាយុ១៧ឆ្នាំ មានទីលំនៅភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង។
ប្រភពដដែលបានបន្តថា ក្នុងការចុះបង្ក្រាបនេះសមត្ថកិច្ចដកហូតបានវត្ថុតាងមាន ថ្នាំញៀនម៉ាទឹកកចំនួន៩កញ្ចប់ ម៉ូតូម៉ាកវ៉េវ អាល់ហ្វា១គ្រឿង ទូរស័ព្ទ២គ្រឿង និងឧបករណ៍សម្រាប់ប្រើប្រាស់គ្រឿងញៀន។ ជនសង្ស័យទាំង៥នាក់ត្រូវសមត្ថកិច្ចកំពុងកសាងសំណុំរឿង បញ្ជូនបន្តចាត់ការតាមនីតិវិធីច្បាប់៕
ចែករំលែកព័តមាននេះ