ខេត្តកំពង់ស្ពឺ ៖ សមត្ថកិច្ចនគរបាលស្រុកឧដុង្គបានឃាត់ខ្លួនបុរសម្នាក់ យោងតាមសេចក្តីរាយការណ៍របស់គ្រូពេទ្យបានសួរនាំបុរសរូបនោះពេលកំពុងដេរក្បាល ដោយជននេះបំភាន់ថា បានដើរបុករនូតផ្ទះ តែការពិតមិនមែននោះទេ ។
លោកវរសេនីយ៍ត្រី ពីង ពៅ អធិការរងនគរបាលស្រុកឧដុង្គឱ្យដឹង នៅព្រឹកថ្ងៃទី១៦ មករា ២០១៧ នេះថា សមត្ថកិច្ចបានចុះទៅឃាត់ខ្លួនជនសង្ស័យនៅមន្ទីរពេទ្យបង្អែកឧដុង្គ ។
លោកអធិការរងបន្តថា ក្រោយពីឃាត់ខ្លួន ទើបបុរសសង្ស័យឈ្មោះសេង ហន អាយុ៥៦ឆ្នាំ មានទីលំនៅក្នុងភូមិខ្នុលអំពិល ឃុំវាលពង់ ស្រុកឧដុង្គ ខេត្តកំពង់ស្ពឺ បានឆ្លើយសារភាពថា កាលពីថ្ងៃទី១៥ មករា វេលាម៉ោង០៧ និង១០នាទីយប់ ខ្លួនបានបបួលឪពុកក្មេងស្រីមានអាយុ១៧ឆ្នាំម្នាក់ ផឹកស្រា.សតាំងពីថ្ងៃ រហូតទាល់តែឪពុកក្មេងស្រីស្រវឹងសន្លប់បាត់មាត់ឈឹង ។
លុះខ្លួនឃើញឱកាសល្អ ក៏ធ្វើសកម្មភាពចាប់រំលោភលើក្មេងស្រីនោះ ដោយផ្តួលពីលើខ្លួនប្រុងចាប់រំលោភសេពសន្ថវៈ តែមិនទាន់បានស៊ីជម្រៅផងនោះទេ ក៏ត្រូវម្តាយក្មេងស្រីមកទាន់ យកពូថៅកាប់ពីក្រោយ២ពូថៅចំក្បាល បណ្តាលឱ្យសន្លប់ ហើយត្រូវបានអ្នកជិតខាង ដឹកយកទៅពេទ្យបង្អែកស្រុកឧដុង្គតែម្តង ។ ជនសង្ស័យបន្តថា ពេលកំពុងដេកនៅមន្ទីរពេទ្យ ក៏ត្រូវសមត្ថកិច្ចឃាត់ខ្លួន ហើយនាំមកកាន់នៅប៉ុស្តិ៍រដ្ឋបាលវាំងចាស់ ។
ស្ត្រីជាម្តាយបានប្រាប់សមត្ថកិច្ចដែរថា មុនពេលកើតហេតុ គាត់មិនបាននៅផ្ទះនោះទេ ដោយកូនស្រីនៅផ្ទះម្នាក់ឯង ហើយឪពុកដេកនៅលើផ្ទះ លុះពេលគាត់ត្រឡប់មកពីក្រៅវិញ ចូលដល់ក្រោមផ្ទះ ក៏ឃើញតាចាស់នេះ កំពុងចាប់កូនគាត់ផ្តួលទៅលើដីក្បែរជង្រុកស្រូវ ហើយពោបពីលើធ្វើសកម្មភាពរំលោភ ។
គាត់បន្តថា ដោយចង់ជួយកូនស្រីគាត់ សម្រេចចិត្តយកពូថៅកាប់ទៅលើជននេះចំក្បាលចំនួន២ពូថៅ ហើយទើបរំដោះយកកូនចេញពីក្រញ៉ាំដៃតារូបនេះតែម្តង ។ ក្រោយពីត្រូវគាត់កាប់ ជនសង្ស័យត្រូវបានអ្នកភូមិដឹកយកទៅឱ្យពេទ្យជួយសង្គ្រោះ ។ ដោយឡែក រូបគាត់បានមកដាក់ពាក្យបណ្តឹងស្តីពីករណីជននេះ ចាប់រំលោភកូនស្រីគាត់រំលោភ ។
នៅព្រឹកថ្ងៃទី១៦ មករា ដដែលនេះ សមត្ថកិច្ចកំពុងបន្តនីតិវិធីស៊ើបអង្កេតបន្ត ដើម្បីកសាងសំណុរឿង បញ្ជូនជនសង្ស័យទៅកាន់ការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺ ចាត់ការបន្ត ។ រីឯស្ត្រីជាម្តាយ ដែលកាប់ជនសង្ស័យក្នុងករណីរំលោភនេះ មិនត្រូវបានសមត្ថកិច្ចឃាត់ខ្លួននោះទេ ព្រោះយល់ថា នេះជាទង្វើការពារកូន ។
ចែករំលែកព័តមាននេះ