ខេត្តកំពង់ស្ពឺ ៖ ប្រជាពលរដ្ឋរស់នៅតំបន់ជាំ នៃស្រុកឱរ៉ាល់ បានបង្ហើបឱ្យដឹងថា សកម្មភាពដឹកជញ្ជូនឈើប្រណីតខុសច្បាប់របស់ក្រុមឈ្មោះ ចឿង ថេង និងគូ សុកខឿន ជាប្រពន្ធ រស់នៅក្នុងភូមិគោក ឃុំសង្កែសាទប ស្រុកឱរ៉ាល់ នៅតែធ្វើសកម្មភាពរៀងរាល់យប់ ដោយគ្មានខ្លាចច្បាប់បន្តិចណាទាល់តែសោះ ដែលទំនងជាការដឹកនេះក៏បានផ្តល់ផលប្រយោជន៍ដល់សមត្ថកិច្ចគ្រប់ស្ថាប័នតាំងពីលើមកដល់ក្រោម ទើបបានជាមានការបើកភ្លើងខៀវឱ្យដឹកបែបនេះ។ ជាងនេះទៅទៀត ការដឹកឈើប្រណីតប្រភេទធ្នង់ បេង សង្ស័យថា ឈ្មួញបានឃុបឃិតគ្នាគ្រប់កន្លែងមិនមានសល់កន្លែងណាឡើយ លើកលែងតែគ្រូបង្រៀន និងគ្រូពេទ្យតែប៉ុណ្ណោះដែលគ្មានសមត្ថកិច្ចបង្ក្រាប ។
ជារៀងរាល់យប់គេតែងតែសង្កេតឃើញរថយន្តកូរ៉េ ពណ៌ស អត់ស្លាកលេខ ចំណុះ៣តោនរបស់ឈ្មោះ ចឿង ថេង ដឹកឈើប្រណីតចេញពីតំបន់ជាំ នៃស្រុកឱរ៉ាល់ តាមបណ្តោយផ្លូវលេខ៤៤ ឆ្លងកាត់ស្នាក់ការដ្ឋបាលព្រៃឈើឱរ៉ាល់ ដែលមានលោក តាំង ចាន់សែម៉ា ជាប្រធាន និងសង្កាត់រដ្ឋបាលព្រៃឈើសង្កែសាទប ដែលមានលោក ហែម សុខា ជាប្រធាន និងសង្កាត់រដ្ឋបាលព្រៃឈើសំរោងទង ដែលមានលោក អុល កូស៊ីណា ជាប្រធាន និងស្នាក់ការបណ្តុះកូនឈើតាម៉ុលរបស់ផ្នែករដ្ឋបាលព្រៃឈើ ដែលមានលោក យ៉ុន យុវរឹទ្ធ ជានាយផ្នែក និងខណ្ឌរដ្ឋបាលកំពង់ស្ពឺ ដែលមានលោក ផល មុនី ជានាយខណ្ឌ។
បើតាមប្រភពច្បាស់ការណ៍ពីមន្ត្រីអត់លិទបានបង្ហើបថា ឈើប្រណីតដែលឈ្មួញដឹកពីកំពង់ស្ពឺនេះ គឺយកទៅលក់នៅច្រកតន់ហន់ ប្រទេសវៀតណាម ។ ដោយឡែកចំពោះការបង់លុយវិញក្នុង១ឡានមិនក្រោមពី៤ទៅ៥រយដុល្លារឡើយ ក្នុងស្នាក់ការមេព្រៃនីមួយៗ ក្នុងនោះនៅមិនទាន់និយាយដល់ស្ថាប័នខាងលើដូចជា ប៉េអឹម និងនគរបាលសេដ្ឋកិច្ចឡើយ។ ដោយឡែកប្រជាពលរដ្ឋរស់នៅតំបន់ខាងលើបានខ្សឹបថា សកម្មភាពដឹកជញ្ជូនឈើនៅតំបន់នេះ គឺធ្វើឡើងជាយូរឆ្នាំមកហើយ គឺក្រុមឈ្មួញធ្វើសកម្មភាពដឹកទាំងយប់ដឹកទាំងថ្ងៃ ដោយមិនឃើញមានអាជ្ញាធរទប់ស្កាត់ឡើយ ជាពិសេសគឺស្ថាប័នជំនាញរដ្ឋបាលព្រៃឈើតែម្តង ។ សកម្មភាពទាំងអស់នេះស្តែងឱ្យឃើញថា ទាំងកម្លាំងសមត្ថកិច្ច និងមន្ត្រីជំនាញ មានជាប់ពាក់ព័ន្ធទៅនឹងអំពើពុករលួយទាំងស្រុង ។ មានការលើកឡើងទៀតថា បើសិនមិនបានទទួលលាភសក្ការៈពីក្រុមឈ្មួញទេ កុំថាឡើយឡានរត់ដល់វៀតណាម សូម្បីវិលកង់មិនបានមួយជុំផង ច្បាស់ជាត្រូវចាប់បង្ក្រាបជាក់ជាមិនខានឡើយ ឱ្យតែមានឈើប្រណីតនៅលើឡាន។
មិនឱ្យមានការសង្ស័យបែបនេះយ៉ាងម៉េចកើត បើសកម្មភាពដឹកជញ្ជូនឈើប្រណីតទាំងនេះ ត្រូវឆ្លងកាត់ស្នាក់ការមេព្រៃជាច្រើនកន្លែង នេះមិនទាន់រាប់បញ្ចូលទាំងស្នាក់ការប៉ូលិសសេដ្ឋកិច្ចមូលដ្ឋាន និងប៉េអឹមស្រុកឱរ៉ាល់ ដែលមានលោក សោម ពុទ្ធតារា ជាមេបញ្ជាការគ្រប់គ្រង២កន្លែងទៀតផង ។ ប្រភពបន្តថា សកម្មភាពដឹកជញ្ជូនឈើនេះ គឺធ្វើឡើងក្រោយការចាប់បង្ក្រាបរបស់សមត្ថកិច្ចលើផ្ទៃប្រទេស កាលពីពេលថ្មីៗកន្លងទៅ ហើយសំណុំរឿងចាប់នៅមិនទាន់បញ្ចប់នៅឡើយទេ។
ជាក់ស្តែងចំពោះសកម្មភាពដឹកជញ្ជូនឈើរបស់ ចឿង ថេង និង គូ សុកខឿន គឺចាប់ផ្តើមកក្រើកឡើងវិញតាំងពីយប់ថ្ងៃទី១៤ មករា ២០១៧ មកម្ល៉េះ ក្នុងនោះឈើធ្នង់ចំនួន២ឡានត្រូវបានដឹកចេញ និងរសៀលថ្ងៃទី១៥ មករា ២០១៧ ចំនួន១ឡានឈើប្រណីតបានដឹកចេញដោយរលូនក្រោមការជួយសំរួលពីមន្ត្រីមកពីផ្ទៃប្រទេសទៀតផង។
ពាក់ព័ន្ធនិងការចោទប្រកាន់ខាងលើនេះ ដែលអ្នកយកព័ត៌មានយើងបានព្យាយាមសុំការបកស្រាយពីឈ្មោះ គូ សុកខឿន ដែលទូរស័ព្ទចូល៤ដង ហើយមិនមានអ្នកលើកនោះទេ។ ដោយឡែកលោក ផល មុន្នី នាយខណ្ឌរដ្ឋបាលព្រៃឈើខេត្តកំពង់ស្ពឺ បានទូរស័ព្ទចូលសុំការបកស្រាយដែល ប៉ុន្តែលោករវល់ប្រជុំក៏ចុចបិតវិញ។
ពាក់ព័ន្ខករណីខាងលើនេះដែរ លោកវ៉ី សំណាង អភិបាលខេត្តកំពង់ស្ពឺ បានបញ្ជាក់ប្រាប់តាមទូរស័ព្ទមុនពេលចាកចេញទៅអាមេរិកថា ករណីលើកឡើងខាងលើ លោកបានជ្រាបអស់ហើយ ពេលនេះមនុស្សរបស់លោកកំពុងតែធ្វើការស្រាវជ្រាវបន្ត។ លោកបញ្ជាក់ថា លោកមិនលើកលែងឱ្យដាច់ខាតចំពោះអ្នកពាក់ព័ន្ធករណីនេះ ជាពិសេសក្រុមឈ្មួញដែលដឹកជញ្ជូនឈើតែម្តង ចាប់ថ្ងៃនេះមិនបានត្រូវតាមដានស្ទាក់ចាប់ នៅថ្ងៃស្អែកទៀតធ្វើយ៉ាងណាចាប់ឱ្យជាប់យកមកប្រគល់ឱ្យច្បាប់ចាត់ការ៕
ចែករំលែកព័តមាននេះ