សង្ស័យមុខសញ្ញាដដែលៗបន្លំលួចលុយវីងទាំងកណ្ដាលថ្ងៃត្រង់
ខេត្ដបាត់ដំបង ៖ ជនមិនស្គាល់មុខមួយក្រុមដែលគេសង្ស័យថា ជាមុខសញ្ញាដដែលៗ បានធ្វើសកម្មភាពបន្លំលួចលុយក្នុងទីតាំង «វីង» វេរលុយមួយកន្លែង
ខេត្ដបាត់ដំបង ៖ ជនមិនស្គាល់មុខមួយក្រុមដែលគេសង្ស័យថា ជាមុខសញ្ញាដដែលៗ បានធ្វើសកម្មភាពបន្លំលួចលុយក្នុងទីតាំង «វីង» វេរលុយមួយកន្លែងយកលុយអស់ប្រមាណជា២.០០០ដុល្លារ ហើយគេចខ្លួនបាត់ដោយសុវត្ថិភាព កាលពីវេលាម៉ោង១និង៤០នាទីរសៀលថ្ងៃទី១៤ មករា នៅក្រុមទី១៨ ស្ថិតក្នុងភូមិចំការសំរោង២ សង្កាត់ចំការសំរោង ក្រុងបាត់ដំបង ។
អធិការក្រុងបាត់ដំបង លោក ប៉ាង ហៀង បានឲ្យដឹងថា ហេតុការណ៍នោះបានកើតឡើង ស្របពេលដែលការធ្វើចរាចរណ៍លើដងផ្លូវនោះ មានសភាពស្ងាប់ស្ងាត់បន្តិច ។ លោកថា ទីតាំង«វីង» វេរលុយនោះមានយីហោ «ណាប់សានី» និងមានម្ចាស់ឈ្មោះ ណែម ចំណាប់ ភេទប្រុស អាយុ៣៨ឆ្នាំ ។ លោក ប៉ាង ហៀង បានបញ្ជាក់ថា មុខសញ្ញាជនសង្ស័យមានចំនួន៤នាក់ ក្នុងនោះមានស្ត្រី២នាក់ ជិះម៉ូតូ២គ្រឿងបានចូលទៅធ្វើជាវេរលុយ និងខ្លះធ្វើជារកទិញកាតទូរស័ព្ទ លុះមានឱកាសក៏បន្លំលួចលុយតែម្ដង ។
លោក ណែម ចំណាប់ ជាម្ចាស់វីងបាននិយាយប្រាប់សមត្ថកិច្ចថា ក្រុមជនមិនស្គាល់មុខទាំង៤នាក់ ដែលមានស្ត្រី២នាក់ផងនោះ បានជិះម៉ូតូមកឈប់នៅខាងមុខទីតាំងវីងរបស់ខ្លួន ហើយគ្នាវាខ្លះបានធ្វើជាមករកវេរលុយ រីឯខ្លះទៀតធ្វើជាសួរនាំរកទិញកាតទូរស័ព្ទ ។ លោកថា សកម្មភាពក្រុមនេះបានធ្វើឲ្យគាត់វក់វីយ៉ាងខ្លាំង ដែលនាំឲ្យពួកគេមានឱកាសបន្លំលួចលុយរបស់គាត់ដែលដាក់ក្នុងថង់ខ្មៅយកទៅបាត់ ។ ប៉ុន្តែពេលក្រុមនោះចេញផុតបន្តិចទើបគាត់ដឹងថាបាត់លុយ តែមិនដឹងក្រុមនោះជិះដល់ណាអស់ទៅហើយទេ ។ លោក ណែម ចំណាប់ បានបញ្ជាក់ប្រាប់សមត្ថកិច្ចថា លុយដែលក្រុមចោរលួចទៅនោះមានចំនួនប្រហែល២.០០០ដុល្លារ ។
ជុំវិញមុខសញ្ញាជនសង្ស័យមួយក្រុមនេះ បើតាមលោក ប៉ាង ហៀង អធិការក្រុងបាត់ដំបងបាននិយាយថា ជនសង្ស័យគឺជាមុខសញ្ញាក្រុមដដែលៗ ដែលតែងធ្វើសកម្មភាពបន្លំលួចលុយតាមទីតាំង «វីង» វេរលុយនាពេលកន្លងមកនៅក្នុងក្រុងបាត់ដំបង និងតាមបណ្ដាស្រុកមួយចំនួននៅក្នុងខេត្ត ។ លោកថា ក្រុមនេះតែងធ្វើការស៊ើបឬជិះម៉ូតូពិនិត្យទីតាំង និងស្ថានភាពជាមុន មុនពេលធ្វើសកម្មភាព ។ លោកបញ្ជាក់ថា ពេលនេះមន្ត្រីជំនាញកំពុងសួរនាំជនរងគ្រោះ និងសាក្សីនានា ដើម្បីស្រាវជ្រាវស្វែងរកតម្រុយមុខសញ្ញាជនសង្ស័យ ។
បើតាមសមត្ថកិច្ចបានបញ្ជាក់ដែរថា ជនសង្គមងងឹតមួយក្រុមនេះ គឺអាចជាមុខសញ្ញាដដែលៗដែលតែងធ្វើសកម្មភាពកន្លងមកមែន ។
ប្រភពដដែលបន្តថា ក្រុមនេះនឹងធ្វើសកម្មភាពជាបន្តបន្ទាប់ទៀត ប្រសិនបើសមត្ថកិច្ចបំបែកសម្បុកក្រុមនេះមិនបានទេ ។ ដូច្នេះគ្រប់ទីតាំងបើកវីង ឬទីតាំងប្ដូរ ឬវេរលុយនានាទូទាំងខេត្ត ត្រូវមានការប្រុងប្រយ័ត្នឲ្យបានខ្ពស់បំផុត និងត្រូវរាយការណ៍ជាបន្ទាន់ទៅសមត្ថកិច្ចបើឃើញជនណា ឬក្រុមណាដែលគួរឲ្យសង្ស័យ ដើម្បីឲ្យសមត្ថកិច្ចជួយត្រួតពិនិត្យ និងឈានដល់ការទប់ស្កាត់បានទាន់ពេលវេលា ៕
ចែករំលែកព័តមាននេះ