ចំនួនមនុស្សគ្មានការងារធ្វើនៅទូទាំងពិភពលោក នឹងកើនដល់២០០លាននាក់ក្នុងឆ្នាំ២០១៧នេះ ។ សម្រាប់អ្នកដែលមានការងារវិញ ក៏ប្រហែលជាមិនទទួលបានការឡើងប្រាក់បៀវត្សផងដែរ ។
ចំនួនមនុស្សគ្មានការងារធ្វើនៅទូទាំងពិភពលោក នឹងកើនដល់២០០លាននាក់ក្នុងឆ្នាំ២០១៧នេះ ។ សម្រាប់អ្នកដែលមានការងារវិញ ក៏ប្រហែលជាមិនទទួលបានការឡើងប្រាក់បៀវត្សផងដែរ ។
ទាំងនេះជាការរកឃើញនៃការស្រាវជ្រាវរបស់អង្គការពលកម្មពិភពលោក (ILO) ជាភ្នាក់ងារមួយដែលរួមមានអ្នកតំណាងរដ្ឋាភិបាល និយោជក និងនិយោជិតប្រមាណ១៨៧ប្រទេស។
ក្នុងសេចក្តីរាយការណ៍កាលពីសប្តាហ៍មុន ILO និយាយថា អត្រាមនុស្សគ្មានការងារធ្វើត្រូវបានព្យាករថា នឹងកើនឡើង៣,៤លាននាក់ក្នុងឆ្នាំនេះ និង២,៧លាននាក់ក្នុងឆ្នាំ២០១៨ ព្រោះតែចំនួនពលករកំពុងតែកើនឡើងក្នុងល្បឿនលឿនជាងការងារដែលត្រូវបានបង្កើត ។
លោក Guy Ryder អគ្គនាយក ILO ថ្លែងថា ៖ « ការលូតលាស់នៃសេដ្ឋកិច្ចបន្តធ្វើឲ្យខកចិត្ត ។ នេះបង្កឲ្យមានភាពព្រួយបារម្ភសម្រាប់សេដ្ឋកិច្ចពិភពលោក និងលទ្ធភាពរបស់វាក្នុងការបង្កើតការងារគ្រប់គ្រាន់ នេះមិននិយាយដល់ការងារល្អៗផង » ។
ILO ក៏មានដំណឹងអាក្រក់ចំពោះអ្នកមានការងារធ្វើផងដែរ ។ ក្នុងសេចក្តីរាយការណ៍ដោយឡែកមួយទៀត ភ្នាក់ងារខាងលើនិយាយថា ការលូតលាស់នៃប្រាក់បៀវត្សពិភពលោក (គិតគូរអតិផរណារួច) បានធ្លាក់មកល្បឿនមួយដ៏យឺតបំផុតក្នុងឆ្នាំ២០១៥ ។
ការកើនឡើងនៃប្រាក់បៀវត្សក្នុងសេដ្ឋកិច្ចអភិវឌ្ឍន៍មួយចំនួន រួមទាំងសហរដ្ឋអាមេរិក និងអាល្លឺម៉ង់ គឺមិនគ្រប់គ្រាន់ឡើយ ខណៈមានការធ្លាក់ចុះក្នុងប្រទេសជាច្រើនទៀត ។
ILO និយាយថា ចំនួនមនុស្សដែលមានការងារធ្វើ ប៉ុន្តែបន្តស្ថិតក្នុងស្ថានភាពក្រីក្រនៅខ្ពស់នៅឡើយ ដោយមានពាក់កណ្តាលនៃពលកររស់នៅក្នុងអាស៊ីខាងត្បូង និងជិត២ភាគ៣នៃពលករក្នុងអាហ្វ្រិក គឺរស់នៅក្នុងស្ថានភាពក្រីក្រយ៉ាងខ្លាំង ឬក្រីក្រមធ្យម ។
យោងតាម ILO ឲ្យដឹងទៀតថា សេដ្ឋកិច្ចកំពុងអភិវឌ្ឍន៍ ជាពិសេស អាមេរិកឡាទីននឹងទទួលបានការកើនឡើងនៃអត្រាអ្នកគ្មានការងារច្រើនជាងគេក្នុងឆ្នាំ២០១៧ ប៉ុន្តែអត្រាអ្នកគ្មានការងារធ្វើអាចនឹងធ្លាក់ចុះក្នុងអឺរ៉ុប សហរដ្ឋអាមេរិក និងកាណាដា ទោះជាការធ្លាក់ចុះមានភាពយឺត និងមិនស្មើគ្នាក្តី ។
ILO បានព្រមានដែរថា មនុស្សគ្មានការងារធ្វើក្នុងរយៈពេលយូរកំពុងតែក្លាយជាបញ្ហាដ៏ធំមួយក្នុងអឺរ៉ុប និងអាមេរិកខាងលិច ។ ជិតពាក់កណ្តាលនៃមនុស្សដែលគ្មានការងារធ្វើក្នុងអឺរ៉ុប និង១ភាគ៤នៃមនុស្សទាំងនោះក្នុងសហរដ្ឋអាមេរិក បានស្វែងរកការងារអស់រយៈពេលច្រើនជាង៦ខែមកហើយ ៕
ចែករំលែកព័តមាននេះ