ប្រទេសចិន ៖ លោក Donald Trump បានវាយប្រហារទៅលើប្រទេសចិនថា ប្រើប្រាស់វិធីមិនសមរម្យដើម្បីជំរុញការនាំចេញរបស់ខ្លួន ។ នាពេលបច្ចុប្បន្ននេះ ស្ថានភាពក្នុងប្រទេសចិន គឺមិនល្អឡើយ ។
យោងតាមទិន្នន័យចេញផ្សាយកាលពីថ្ងៃសុក្រកន្លងមកឲ្យដឹងថា ការនាំចេញរបស់ប្រទេសចិនបានធ្លាក់ចុះ២% ក្នុងឆ្នាំមុន ។ នេះគឺជាការធ្លាក់ចុះប្រចាំឆ្នាំច្រើនជាងគេតាំងពីឆ្នាំ ២០០៩ មកម្ល៉េះ ។
ការនាំចេញទៅកាន់សហរដ្ឋអាមេរិក មិនបានផ្លាស់ប្តូរទេតាំងឆ្នាំ២០១៥ ប៉ុន្តែផលលើសពាណិជ្ជកម្មសរុបរបស់ប្រទេសចិន បានធ្លាក់ចុះជាលើកដំបូងតាំងពីឆ្នាំ២០១១មក ។
មន្ត្រីក្នុងប្រទេសចិននិយាយថា ពួកគេព្រួយបារម្ភនារយៈពេលប៉ុន្មានខែខាងមុខទៀត ដោយមានគំនិតការពារនិយមកើនឡើងពីប្រធានាធិបតីជាប់ឆ្នោត Donald Trump និងអ្នកដឹកនាំដទៃ ។
លោក Huang Songping អ្នកនាំពាក្យរបស់ភ្នាក់ងារចិន ដែលរាយការណ៍ពីទិន្នន័យពាណិជ្ជកម្មរបស់ប្រទេសនេះ និយាយថា ៖ «និន្នាការនៃគំនិតប្រឆាំងនឹងសកលភាវូបនីយកម្មគឺកាន់តែច្បាស់ឡើង ហើយប្រទេសចិនបានក្លាយជាជនរងគ្រោះធំជាងគេ » ។
សេដ្ឋវិទូមួយចំនួន ក៏មានគំនិតទុទ្ទិដ្ឋិនិយមផងដែរ ។
Julian Evans-Pritchard អ្នកជំនាញមកពី Capital Economics និយាយថា ៖ « វាពិតជាពិបាកណាស់ក្នុងការមើលឃើញថា ស្ថានការណ៍នឹងល្អឡើងសម្រាប់ពាណិជ្ជកម្មរបស់ចិន » ។
លោក Trump នឹងឡើងកាន់អំណាចក្នុងសប្តាហ៍នេះនិយាយថា លោកមានគម្រោងចោទប្រកាន់ប្រទេសចិនថា បានទម្លាក់តម្លៃប្រាក់ដើម្បីបង្កើនការនាំចេញ ។
គួរបញ្ជាក់ថា ប្រទេសចិនបានចំណាយប្រាក់រាប់រយប៊ីលានដុល្លារនាពេលថ្មីៗនេះ ដើម្បីទិញរូបិយប័ណ្ណរបស់ខ្លួន និងបញ្ឈប់តម្លៃវាមិនឲ្យធ្លាក់ចុះលឿនពេក ៕
ចែករំលែកព័តមាននេះ