តារាចម្រៀងល្បីឈ្មោះប្រចាំខេត្តតាកែវ ដែលមហាជនស្គាល់ថា ជាត្រកូលអ៊ាង បាននិងកំពុងបន្តអាជីពចម្រៀងនៅក្នុងវិស័យសិល្បៈ មិនទាន់បោះបង់ទៅណាឡើយ។ ត្រកូលសិល្បៈនេះ នៅតែព្យាយាមរិះរកចម្រៀងល្អៗ
រាជធានីភ្នំពេញ ៖ តារាចម្រៀងល្បីឈ្មោះប្រចាំខេត្តតាកែវ ដែលមហាជនស្គាល់ថា ជាត្រកូលអ៊ាង បាននិងកំពុងបន្តអាជីពចម្រៀងនៅក្នុងវិស័យសិល្បៈ មិនទាន់បោះបង់ទៅណាឡើយ។ ត្រកូលសិល្បៈនេះ នៅតែព្យាយាមរិះរកចម្រៀងល្អៗ និពន្ធឡើងលើកកិត្តិយសខេត្តតាកែវ និងភាពរីកចម្រើន មានទាំងបទសម័យ និងបុរាណ។
យ៉ាងណាមិញ ចម្រៀងកំពុងទាក់ទាញមួយបទ កំពុងតែផ្ទុះឡើង ហើយជាការដាស់តឿនអោយយុវវ័យងាកមកគិតគូរ ជួយមើលថែឪពុកម្តាយអោយទាន់ខែភ្លឺ បានស្តាប់ហើយគឺរំភើបចង់យំតែម្តង។ បទចម្រៀងរយលានអត្ថន័យនេះ ត្រូវគេដឹងថា សំនៀងដើម សុគន្ធ និសា ត្រូវបានច្រៀងឡើងវិញ ដោយអ្នកនាង អ៊ាង ច័ន្ទថាវី, អ៊ាង ម៉ាឡា, អ៊ាង អម្រិត, អ៊ាង សុធា និងអ៊ាង ច័ន្ទរិទ្ធីរុង សម្រួលតន្ត្រីដោយ អ៊ាង ច័ន្ទរិទ្ធីរុង។
អ្នកដែលបានស្តាប់នៅក្នុងបណ្តាញសង្គម គ្រាន់តែឮអត្ថន័យនេះ បានស្រណោះខ្លួន ហើយកាន់តែដក់ចិត្តចង់នៅក្បែរអ្នកមានគុណ ។ នេះសម្រាប់អ្នកស្រឡាញ់ឪពុកម្តាយពិតប្រាកដនៅតែបារម្ភ គ្រប់វិនាទី ទោះនៅឆ្ងាយបែបណាក្តី។ ដូចនេះ កូនទាំងឡាយណាដែលធ្លាប់ធ្វើអោយអ្នកមានគុណខកចិត្ត ត្រូវខំកែខៃ ហើយត្រូវងាកត្រឡប់មកជួយមើលថែព្រះនៅក្នុងផ្ទះអោយបានល្អទាន់ខែភ្លឺ។
អ្នកនាងអ៊ាង ច័ន្ទថាវី ដែលជារៀមច្បងត្រកូលអ៊ាង បានប្រាប់ថា ចម្រៀងនេះ ច្រៀងឡើងវិញ ដោយបងប្អូននាង៥នាក់ ហើយជាការជូនជាកាដូដល់លោកប៉ាអ្នកម៉ាក់នៅថ្ងៃខួបកំណើត។ នេះជាសារមួយផ្ញើជូនដល់យុវវ័យទាំងឡាយបន្តជួយមើលថែទាំអ្នកមានគុណអោយល្អ ទោះសងមិនអស់ តែត្រូវខំធ្វើអោយគាត់សប្បាយចិត្ត។
ពិតណាស់ត្រកូល អ៊ាង អ្នកណាមិនល្បីនៅខេត្តតាកែវ ដូចជា ៖ អ៊ាង ច័ន្ទថាវី ជាអតីតម្ចាស់ជ័យលាភីចម្រៀងបុរាណពានរង្វាន់សម្តេចតេជោ កាលពីច្រើនឆ្នាំមុន បានប្រឡងនៅទូរទស្សន៍បាយ័ន ។ បើនិយាយពីប្អូនស្រី អ៊ាង ម៉ាឡាវិញ ជាម្ចាស់ពានរង្វាន់ប្រឡងចម្រៀងខ្មែរជាសាកល ដែលបច្ចុប្បន្ន អ៊ាង ម៉ាឡា មានស្វាមី និងកូនរស់នៅប្រទេសអូស្ត្រាលី។ ជាអ្នកបុរាណត្រកូលនេះ បានបង្កើតជាក្រុមភ្លេងការឈ្មោះ ម៉ាឡែន ម៉ាឡាភ្លេងការ ទុកជាមុខរបររដូវរៀបមង្គលការ។ តោះស្តាប់កម្សាន្តចម្រៀង ដ៏អណ្តែងអណ្តូងពីត្រកូលអ៊ាង ដូចតទៅ ៖
ចែករំលែកព័តមាននេះ