ខេត្តបាត់ដំបង ៖ មាន់កសិកម្មដែលឈ្មួញនាំចូលពីប្រទេសថៃដោយខុសច្បាប់ចំនួន៣រថយន្ត ត្រូវមន្ត្រីពេទ្យសត្វស្ទាក់ចាប់បានជាបន្តបន្ទាប់ កាលពីវេលារំលងអាធ្រាត្រឈានចូលថ្ងៃទី១៥ មករា នៅតាមដងផ្លូវចេញពីស្រុកកំរៀង ឆ្ពោះទៅកាន់ក្រុងបាត់ដំបង តែបានដោះលែង២គ្រឿងវិញទាំងយប់ ព្រោះម្ចាស់បានបង់លុយរួចជាមុន រីឯ១គ្រឿងទៀតត្រូវបញ្ជូនទៅកាន់មន្ទីរកសិកម្មខេត្ត ដើម្បីចាត់ការតាមច្បាប់។ នេះបើតាមប្រភពព័ត៌មានដែលបានទម្លាយឲ្យដឹងនៅព្រឹកថ្ងៃទី១៥មករា ២០១៧។
ប្រភពព័ត៌មានបានឲ្យដឹងថា រថយន្តដឹកមាន់ទាំង៣គ្រឿងនោះ មានរថយន្តម៉ាកកាមរីពណ៌សកែច្នៃទ្រុងតែមិនស្គាល់ម្ចាស់, រថយន្តនីសាន់១បាំងកន្លះ ពណ៌ក្រហមមានថៅកែស្រីឈ្មោះ ម៉េវ ហៅកាម៉េវ និងរថយន្តកូរ៉េប្រភេទ១,៥តោន មានថៅកែឈ្មោះ ពៅ។ រថយន្តទាំង៣គ្រឿងនេះត្រូវគេដឹងថា បានដឹកសត្វមាន់កសិកម្មពីប្រទេសថៃ ដោយខុសច្បាប់ចេញតាមច្រករបៀង«បឹងឆ្នាំ ឬភ្នំព្រះពុទ្ធ» ដែលស្ថិតក្នុងឃុំកំរៀង ស្រុកកំរៀង។ ប្រភពដដែលបានបញ្ជាក់ថា រថយន្តទាំង៣គ្រឿងដែលមានថៅកែផ្សេងៗគ្នានេះ ត្រូវមន្ត្រីពេទ្យសត្វស្ទាក់ចាប់ជាបន្តបន្ទាប់ពេលកំពុងធ្វើដំណើរតាមផ្លូវ។
ប៉ុន្តែបានដោះលែងរថយន្តថៅកែឈ្មោះ កាម៉េវ និងថៅកែឈ្មោះ ពៅ ទាំងយប់វិញក្រោយចាប់បានមួយដង្ហើមចង្រិត ព្រោះថៅកែរថយន្តទាំង២នេះបានបង់លុយជាប្រចាំ។ ដោយឡែករថយន្តកាមរីកែច្នៃ ត្រូវមន្ត្រីពេទ្យសត្វនាំទៅកាន់មន្ទីរកសិកម្មខេត្ត ព្រោះម្ចាស់គ្មានខ្សែ និងភ្លេចបង់លុយឲ្យពេទ្យសត្វ។ ស្ត្រីម្នាក់ដែលអះអាងថា ជាម្ចាស់រថយន្តដែលមន្ត្រីពេទ្យសត្វចាប់បញ្ជូនទៅមន្ទីរកសិកម្មខេត្តបាននិយាយថា រថយន្តគាត់ដឹកមាន់ចេញពីច្រករបៀង«បឹងឆ្នាំ ឬភ្នំព្រះពុទ្ធ»ក្នុងស្រុកកំរៀង ដើម្បីយកមកបោះឲ្យម៉ូយនៅឃុំខ្នាចរមាស ស្រុកបវេល។
ប៉ុន្តែត្រូវពេទ្យសត្វស្ទាប់ចាប់នៅវេលារំលងអាធ្រាត្រ ត្រង់ចំណុចឃុំក្ដុល ស្រុកបវេល។ ស្ត្រីរូបនេះបន្តថា រថយន្តដែលដឹកចេញតាមច្រកជាមួយគាត់ក៏ត្រូវគេចាប់ដែរ តែគេដោះលែងវិញ លើកលេងតែរថយន្តគាត់ត្រូវគេបញ្ជូន ព្រោះគាត់មិនបានបង់លុយឲ្យពេទ្យសត្វ។ មន្ត្រីកសិកម្មម្នាក់បានឲ្យដឹងថា នៅក្នុងខេត្តបាត់ដំបងមានក្រុមហ៊ុន២ដែលមានច្បាប់អនុញ្ញាតត្រឹមត្រូវ ក្នុងការនាំចូលសត្វមាន់កសិកម្មពីប្រទេសថៃ។ ប៉ុន្តែបច្ចុប្បន្នគេឃើញមានឈ្មួញជាច្រើននាក់បានលួចនាំចូលសត្វមាន់នេះ ពីប្រទេសថៃដែរ ដោយគ្មានច្បាប់អនុញ្ញាត។
មន្ត្រីរូបនេះបានបញ្ជាក់ថា គេសង្ស័យមន្ត្រីពេទ្យជាអ្នកផ្ដល់សញ្ញាភ្លើងខៀវឲ្យក្រុមឈ្មួញគ្មានច្បាប់ទាំងនោះ។ ក្រុមឈ្មួញគ្មានច្បាប់ទាំងនោះបាននាំចូលសត្វមាន់ពីប្រទេសថៃ រាប់ពាន់ក្បាលជារៀងរាល់យប់។ រថយន្តដឹកមាន់ខុសច្បាប់ទាំងអស់ត្រូវគេបង្គាប់ឲ្យដឹកចេញពីព្រំដែននៅពាក់កណ្ដាលអាធ្រាត្រ ដើម្បីបិទបាំងពីភ្នែកមហាជន។ ជុំវិញករណីនេះ កោះសន្តិភាព មិនអាចទំនាក់ទំនងសុំការបំភ្លឺពីលោក ប៉ែន សេដ្ឋា ប្រធានការិយាល័យបសុព្យាបាល នៃមន្ទីរកសិកម្មខេត្តបានទេនៅព្រឹកថ្ងៃទី១៥ មករា។
ប៉ុន្តែមន្ត្រីនៃមន្ទីរនេះម្នាក់ដែលសុំមិនប្រាប់ឈ្មោះ បានទទូលស្គាល់ថា ពេទ្យសត្វពិតជាបានចាប់រថយន្តដឹកមាន់៣គ្រឿងមែន។ មន្ត្រីដដែលនេះ បានបង្ហើបឲ្យដឹងថា ការចេញចាប់រថយន្តដឹកសត្វមាន់ខុសច្បាប់ដែលមិនធ្លាប់មានពីមុនមកនេះ គឺធ្វើឡើងបន្ទាប់ពីមានភាគីក្រុមហ៊ុនស្របច្បាប់ប្ដឹងជាបន្តបន្ទាប់ឲ្យចាត់ការក្រុមឈ្មួញទុច្ចរិត ហើយក៏ស្របពេលមានមន្ត្រីនាយកដ្ឋានផលិតកម្ម និងបសុព្យាបាល ចុះតាមឃ្លាំមើល និងតាមចាប់ឈ្មួញដែលលួចនាំសត្វមាន់ខុសច្បាប់ពីប្រទេសថៃ មុនឳកាសបុណ្យចូលឆ្នាំចិនខាងមុខនេះផងដែរ។ បើតាមព័ត៌មានដែលបែកធ្លាយពីឈ្មួញរកស៊ីដឹកមាន់ខុសច្បាប់ បានទម្លាយឲ្យដឹងថា ក្រុមឈ្មួញដឹកមាន់ខុសច្បាប់ត្រូវបង់លុយតាមរូបភាពការប្រព្រឹត្តអំពើពុករលួយឲ្យទៅមន្ត្រីពេទ្យសត្វ មន្ត្រីគយព្រំដែន និងស្ថាប័នពាក់ព័ន្ធមួយចំនួននៅតាមដងផ្លូវ។
ដោយឡែកចំពោះពេទ្យសត្វវិញ ឈ្មួញត្រូវបង់ច្រើនជាងគេក្នុងតំលៃចាប់ពី៥០ម៉ឺនរៀលដល់១លានរៀល ក្នុងរថយន្ត ឬរ៉ឺម៉កម៉ូតូ១គ្រឿង ដោយគិតទៅតាមមធ្យោបាយដឹកជញ្ជូនធុនតូច ឬធំ។ ប្រភពដដែលបញ្ជាក់ថា ក្រុមឈ្មួញដែលគ្មានច្បាប់ ត្រូវផ្ដល់ដំណឹងជាមុនដល់ពេទ្យសត្វ មុនពេលចេញទៅដឹកមាន់នៅព្រំដែន។ ប៉ុន្តែមួយរយៈកន្លងទៅនេះ មន្ត្រីពេទ្យសត្វបានផ្ដល់សញ្ញាឲ្យក្រុមឈ្មួញគ្មានច្បាប់ទាំងអស់ ត្រូវផ្អាកសកម្មភាពដឹកជញ្ជូនមាន់ជាបណ្ដោះអាសន្នសិន។
ព្រោះមានមន្ត្រីនាយកដ្ឋានផលិតកម្ម និងបសុព្យាបាលចុះចាប់ តែក្រុមឈ្មួញនៅតែអាចដឹកលួចលាក់បានខ្លះៗដែរ។ ការផ្អាកនេះបានធ្វើឲ្យម្ចាស់ស្ដង់បោចមាន់ធំៗជិត១០កន្លែងនៅក្នុងក្រុងបាត់ដំបង ខ្វះខាតមាន់បោះឲ្យម៉ូយលក់នៅតាមទីផ្សារ ខណៈពិធីបុណ្យចូលឆ្នាំចិនកាន់តែខិតជិតចូលមកដល់។ ប៉ុន្តែពួកគេខ្លះបានងាកទៅរកទិញមាន់ពីក្រុមហ៊ុនស្របច្បាប់វិញ ដែលពួកគេបានបោះបង់នាពេលកន្លងមក៕
ចែករំលែកព័តមាននេះ