អគ្គិភ័យលេបត្របាក់ផ្ទះឈើអ្នកស្រុកអស់៤ខ្នង នៅស្រុកឆ្លូង
ខេត្តក្រចេះ ៖ គ្រោះអគ្គិភ័យដោយសង្ស័យថា អាចផ្តើមចេញពីការទុស្សេចរន្តអគ្គិសនី បានលេបត្របាក់ផ្ទះឈើប្រក់ក្បឿងធំៗដែលសង់នៅជាប់ៗគ្នា អស់ចំនួន៤ខ្នងផ្ទះ
ខេត្តក្រចេះ ៖ គ្រោះអគ្គិភ័យដោយសង្ស័យថា អាចផ្តើមចេញពីការទុស្សេចរន្តអគ្គិសនី បានលេបត្របាក់ផ្ទះឈើប្រក់ក្បឿងធំៗដែលសង់នៅជាប់ៗគ្នា អស់ចំនួន៤ខ្នងផ្ទះ
ខេត្តក្រចេះ ៖ គ្រោះអគ្គិភ័យដោយសង្ស័យថា អាចផ្តើមចេញពីការទុស្សេចរន្តអគ្គិសនី បានលេបត្របាក់ផ្ទះឈើប្រក់ក្បឿងធំៗដែលសង់នៅជាប់ៗគ្នា អស់ចំនួន៤ខ្នងផ្ទះ នៅភូមិព្រែកសំរោង១ ឃុំខ្សាច់អណ្តែត ស្រុកឆ្លូង។ គ្រោះអគ្គិភ័យដែលបានឆេះសន្ធោសន្ធៅផ្អើលអ្នកស្រុក ក៏ដូចជានគរបាលស្រុក ហើយបានប្រើប្រាស់រថយន្តពន្លត់អគ្គិភ័យធំៗ២គ្រឿង និងប្រើប្រាស់ទឹកអស់រាប់សិបឡាន ក្នុងការជួយបាញ់សង្គ្រោះទប់ស្កាត់នេះ បានកើតឡើងកាលពីវេលាម៉ោង១រសៀលថ្ងៃទី១៥ ខែមករា។
មិនមានសេចក្តីរាយការណ៍ជាក់លាក់ណាមួយឲ្យច្បាស់ថា គ្រោះអគ្គីភ័យនេះផ្តើមចេញពីអ្វីឲ្យប្រាកដនៅឡើយទេ តែបើតាមការសន្និដ្ឋានពីនគរបាលបានឲ្យដឹងថា គ្រោះអគ្គិភ័យនេះ អាចបណ្តាលមកពីទុស្សេចរន្តអគ្គិសនីចេញពីផ្ទះបាយមួយខ្នង ហើយបានឆាបឆេះ រាលដាលដល់ផ្ទះចំនួន៣ខ្នងផ្សេងទៀត។ ជាមួយនឹងការខូចខាត នគរបាលស្រុកបានធ្វើការប៉ាន់ប្រមាណលើការខាតបង់សរុបគឺអស់ជិត១០ម៉ឺនដុល្លារ។ តាមការឲ្យដឹងពីនគរបាលស្រុកឆ្លូងបានឲ្យដឹងថា លំនៅឋានធំៗធ្វើអំពីឈើប្រក់ ក្បឿងចំនួន៤ខ្នងផ្ទះ បានរងការឆាបឆេះតែរយៈពេលជាង១ម៉ោង។
ក្នុងនោះរួមមានផ្ទះ របស់ជនរងគ្រោះទី១.ឈ្មោះ ហ៊ត គឹមហ៊ុយ អាយុ៧១ឆ្នាំ និងប្រពន្ធឈ្មោះ ជុយ សុខគាង អាយុ៧០ឆ្នាំ បានរងការឆេះផ្ទះឈើប្រក់ក្បឿង១ខ្នងទំហំ៧,៥ម៉ែត្រ គុណ១០ម៉ែត្រ និងជាផ្ទះបង្កហេតុដំបូងគេ ទី២.ជនរងគ្រោះឈ្មោះ ស្រេង នាងធំ អាយុ៦៥ឆ្នាំ ជាស្ត្រីមេម៉ាយ បានរងការឆេះផ្ទះឈើប្រក់ក្បឿង១ខ្នងទំហំ ៧,៥ម៉ែត្រ គុណ១០ម៉ែត្រ ទី៣.ឈ្មោះ ឡាយ ញ៉ា អាយុ៤៥ឆ្នាំ ប្រពន្ធឈ្មោះ ស៊ាន នីសំ អាយុ៤២ឆ្នាំ បានរងការឆេះផ្ទះឈើប្រក់ក្បឿង១ខ្នងទំហំ៦ម៉ែត្រ គុណ១៥,៥ម៉ែត្រ និងទី៤.ឈ្មោះ ហង្ស ស្រ៊ុង អាយុ៧៥ឆ្នាំ បានរងការឆេះផ្ទះឈើប្រក់ក្បឿង១ខ្នងទំហំ៦ម៉ែត្រ គុណ១៦ម៉ែត្រ។
យ៉ាងណាបើតាមការបញ្ជាក់ពីលោកវរសេនីយ៍ទោ ឌួង សុទ្ធី បានឲ្យដឹងថា គ្រោះអគ្គិភ័យនេះ មិនបានបង្កឲ្យមានអ្នករងគ្រោះថ្នាក់ដល់អាយុជីវិតនោះទេ។ ដោយគ្រាន់តែសម្ភារប្រើប្រាស់ជាច្រើន និងមានផ្ទះឈើ៤ខ្នង ជាច្រើនដំបូលបានរងការឆេះហ្មត់តែមួយពព្រិចភ្នែក។ សម្រាប់ខេត្តក្រចេះ គ្រោះអគ្គិភ័យត្រូវគេកត់សម្គាល់ឃើញថា ស្រុកឆ្លូងដែលជាស្រុក នៅបណ្តោយដងទន្លេមេគង្គ បានកើតមានញឹកញាប់ជាងគេដូចជាឆេះផ្ទះ ឆេះផ្សារ ឆេះបង្គោលអង់តែន និងឆេះឡថ្នាំជាដើម ឧប្បត្តិហេតុនេះក៏ត្រូវបានគេចាត់ទុកថាបណ្ដាលមកពីការធ្វេសប្រហែស៕
ចែករំលែកព័តមាននេះ