ខេត្តសៀមរាប ៖ កម្លាំងការិយាល័យបទល្មើសព្រហ្មទណ្ឌនៃកងរាជអាវុធហត្ថខេត្តបានចុះប្រតិបត្តិការបង្ក្រាបករណីល្បែងស៊ីសងខុសច្បាប់ (បៀរ ខ្លាឃ្លោក) មួយកន្លែងក្នុងក្រុងសៀមរាប រហូតឈានដល់ធ្វើការឃាត់ខ្លួនស្ត្រី៧នាក់ រួចយកមកធ្វើការសួរនាំនៅការិយល័យជំនាញ ដើម្បីរៀបចំសំណុំរឿងបញ្ជូនបន្តទៅតុលាការខេត្តចាត់ការតាមនីតិវិធីច្បាប់ នៅថ្ងៃទី១៣ ខែមករា ឆ្នាំ២០១៧ ស្ថិតនៅចំណុចក្នុងផ្ទះឈ្មោះ យិន ព្រម ភូមិកក្រាញ់ សង្កាត់សៀមរាប ខេត្តសៀមរាប។
តាមប្រភពពីកម្លាំងកងរាជអាវុធហត្ថខេត្តបានប្រាប់ឱ្យដឹងថា មុនពេលឈានដល់ធ្វើការឃាត់ខ្លួនស្ត្រីញៀនល្បែងស៊ីសងខុសច្បាប់នេះ ដោយមានការចង្អុលបង្ហាញ និងបទបញ្ជារបស់លោកឧត្តម សេនីយ៍ត្រី ប៉ោ វណ្ណនិត មេបញ្ជាការកងរាជអាវុធហត្ថខេត្ត បានឱ្យកម្លាំងការិយាល័យបទល្មើសនៃកងរាជអាវុធហត្ថខេត្ត ចុះប្រតិបត្តិការចាប់ល្បែងស៊ីសងខុសច្បាប់ រហូតឈានដល់ធ្វើការឃាត់ខ្លួនបានស្ត្រីញៀនល្បែង (បៀរ ខ្លាឃ្លោក) ចំនួន៧នាក់ រួចនាំយកមកធ្វើការសួរនាំនៅការិយាល័យជំនាញផងដែរ។
ប្រភបបានបន្តថា ស្ត្រីញៀនល្បែងស៊ីសងខុសច្បាប់ ចំនួន៧នាក់នោះមាន ១-ឈ្មោះ យិន ព្រម ភេទស្រី អាយុ៥៧ឆ្នាំ ស្រុកកំណើតភូមិកកក្រាញ់ សង្កាត់សៀមរាប ក្រុងសៀមរាប ២-ឈ្មោះ ថោង ឡាញ់ ភេទស្រី អាយុ៦១ឆ្នាំ រស់នៅភូមិស្ពានជ្រាវ សង្កាត់ជ្សៀមរាប ខេត្តសៀមរាប ៣-ឈ្មោះ ហុង សំបូរ ភេទស្រី អាយុ៣៧ឆ្នាំ រស់នៅភូមិកក្រាញ់ សង្កាត់សៀមរាប ៤-ឈ្មោះ កុល សារី ភេទស្រី អាយុ៦២ឆ្នាំ រស់នៅភូមិកក្រាញ់ សង្កាត់សៀមរាប ៥-ឈ្មោះ ចាន់ ស៊ីវ ភេទស្រី អាយុ៥២ឆ្នាំ រស់នៅភូមិកក្រាញ់ សង្កាត់សៀមរាប ៦-ឈ្មោះ មឿន សារី ភេទស្រី អាយុ៥០ឆ្នាំ រស់នៅភូមិផ្សារក្រោម សង្កាត់ស្វាយដង្គំ ខេត្តសៀមរាប និង៧-ឈ្មោះ ហួយ សារី ភេទស្រី អាយុ៣៤ឆ្នាំ រស់នៅភូមិជ្រាវ សង្កាត់ជ្រាវ ខេត្តសៀមរាប។
ក្រោយពីធ្វើការឃាត់ខ្លួនបានស្ត្រីញៀនល្បែងស៊ីសងខុសច្បាប់ទាំង៧នាក់រួចមក កម្លាំងជំនាញបាន ដកហូតវត្ថុតាងរួមមាន គ្រាប់ខ្លាឃ្លោកចំនួន៣គ្រាប់, កំរាលខ្លាឃ្លោកចំនួន១, ម៉ូតូអ្នកលេង៣គ្រឿង,ប្រាក់រៀលចំនួន១៥ម៉ឺនរៀល, បៀចំនួន៣ហ៊ូ និងកៅអី៤។
ចែករំលែកព័តមាននេះ