ខេត្តព្រៃវែង ៖ វាជារឿងហួសវិស័យមួយដែលមិនធ្លាប់មានពីមុនមក ប៉ុន្តែវាបានកើតឡើងរួចទៅហើយ ដែលប្តីមានអាយុតិចជាងប្រពន្ធរហូតដល់ទៅ២០ឆ្នាំ ហើយថែមទាំងប្តីស្រលាញ់ស្ម័គ្រស្មោះជាមួយប្រពន្ធរហូតឈឺចិត្តស្អិតទ្រូងដោយសារតែដឹងថា ប្រពន្ធចំណាស់របស់ខ្លួនលួចមានប្រុសថ្មី ដល់ថ្នាក់លែងចង់រស់ បានសម្រេចចិត្តធ្វើអត្តឃាតដោយចាក់សាំងដុតប៉ងសម្លាប់ខ្លួនឯងដ៏គួរឲ្យរន្ធត់កាលពីវេលាម៉ោង៤ និង៣០នាទីទៀបភ្លឺ ថ្ងៃទី១៤ ខែមករា ឆ្នាំ២០១៧ នៅខាងមុខផ្ទះប្រពន្ធខ្លួនឯងដែលស្ថិតក្នុងភូមិតាប្រុយ ឃុំព្រៃពោន ស្រុកកំពង់ត្របែក ខេត្តព្រៃវែង ។
បុរសខូចចិត្តខាងលើឈ្មោះ សុខ ដារ៉ា អាយុ៣២ឆ្នាំ មានស្រុកកំណើតនៅឃុំក្តីតាកុយ ស្រុកកៀនស្វាយ ខេត្តកណ្តាល បានឆេះរលាករលេះរលួយខ្លួនប្រាណរងរបួសធ្ងន់ធ្ងរ ចំណែកស្ត្រីជាប្រពន្ធឈ្មោះ ពិន តុលា អាយុ៥២ឆ្នាំ មានទីលំនៅក្នុងភូមិកើតហេតុ ។
ប្រភពពីអ្នកស្រុកបានឲ្យដឹងថា ស្ត្រីជាប្រពន្ធឈ្មោះ ពិន តុលា ទោះបីជាមានអាយុច្រើនក៏ពិតមែន ប៉ុន្តែសាច់គាត់នៅចាំ ហើយ ចូលចិត្តតែងខ្លួនស្អាត ពេលតែងខ្លួនម្តងៗសម្រស់គឺមិនចាញ់ស្ត្រីវ័យ៣០ស្តើងប៉ុន្មានទេ ហេតុនេះហើយទើបធ្វើឲ្យបុរសជាប្តីនៅអាឡោះអាល័យបែបនេះ ។
ទាក់ទិននឹងហេតុការណ៍ដុតសម្លាប់ខ្លួនរបស់បុរសជាប្តីនោះ ត្រូវបានខាងសមត្ថកិច្ចប្រាប់ឲ្យដឹងថា ប្តីប្រពន្ធនេះបានលែងលះគ្នា១ឆ្នាំហើយ ដោយភាគីខាងប្រុសរស់នៅឯស្រុកកំណើតក្នុងខេត្តកណ្តាល ចំណែកខាងស្រីរស់នៅក្នុងផ្ទះកើតហេតុ ហើយតាមការនិយាយតៗគ្នាពីមាត់អ្នកស្រុកបានឲ្យដឹងទៀតថា ស្ត្រីជាប្រពន្ធបានទាក់ទងមានស្នេហាជាមួយបុរសម្នាក់ផ្សេងទៀតច្រើនខែមកហើយ ហើយពេលជនរងគ្រោះជាប្តីដឹងក៏តាមមករកនៅផ្ទះប្រពន្ធ តែមិនបានជួបប្រពន្ធទេ ហើយរូបគេបានរង់ចាំប្រពន្ធតាំងពីក្បាលល្ងាចរហូតដល់ម៉ោង៤ និង៣០នាទីទៀបភ្លឺមិនឃើញប្រពន្ធមកផ្ទះទៀត ទើបឈឺចិត្តស្អិតទ្រូងលែងចង់រស់ ហើយក៏ទិញសាំងយកទៅចាក់ដុតសម្លាប់ខ្លួនឯងនៅខាងមុខផ្ទះរបស់ប្រពន្ធតែម្តង ដើម្បីបញ្ជាក់ពីចិត្តស្មោះចំពោះប្រពន្ធ ។ ប៉ុន្តែភ្លាមៗនោះត្រូវបានអ្នកស្រុកឃើញទាន់ ហើយក៏រាយការណ៍ទៅនគរបាលប៉ុស្តិ៍រដ្ឋបាលឃុំព្រៃពោនសហការគ្នាចូលទៅជួយពន្លត់ភ្លើង រួចហៅរថយន្តសង្គ្រោះ ដឹកជនរងគ្រោះយកទៅសង្គ្រោះនៅមន្ទីរពេទ្យបង្អែកស្រុកកំពង់ត្របែកភ្លាមៗតែម្តង ។
ប្រភពមួយផ្សេងទៀតពីអ្នកស្រុកបានអះអាងបញ្ជាក់ថា បុរសជាប្តីត្រឡប់មករកប្រពន្ធវិញគឺដោយសារបានដឹងថា ស្ត្រីជាប្រពន្ធ បានសែនព្រេនជាមួយបុរសម្នាក់ផ្សេងទៀត ទើបរូបគេខឹង ហើយមកតាមរកដើម្បីរារាំងហាមឃាត់ប្រពន្ធ ប៉ុន្តែពេលមកដល់រកប្រពន្ធមិនឃើញ ទើបខូចចិត្តអស់សង្ឃឹម ក៏សម្រេចចិត្តធ្វើអត្តឃាតដោយចាក់សាំងដុតសម្លាប់ខ្លួនតែម្តងទៅ តែទោះជាគេចង់ស្លាប់ឬរស់យ៉ាងណាក៏ស្ត្រីជាប្រពន្ធគេមិនខ្វល់ មិនមកមើលដែរ ព្រោះគេមានប្តីថ្មីហើយ ។
សមត្ថកិច្ចបញ្ជាក់ថា ពេលបញ្ជូនជនរងគ្រោះទៅដល់មន្ទីរពេទ្យបង្អែកស្រុក ក្រុមគ្រូពេទ្យបានខំប្រឹងធ្វើការជួយសង្គ្រោះយ៉ាងអស់ពីលទ្ធភាពហើយ ប៉ុន្តែស្ថានភាពជនរងគ្រោះហាក់នៅតែមានសភាពធ្ងន់ធ្ងរណាស់ ទើបត្រូវបញ្ជូនទៅសង្គ្រោះបន្តនៅភ្នំពេញទៀត ប៉ុន្តែមើលទៅហាក់គ្មានសង្ឃឹមនោះទេ ។ ចំណែកស្ត្រីជាប្រពន្ធវិញ គឺតាំងពីកើតហេតុរហូតដល់ពេលនេះ គេនៅមិនទាន់ឃើញវត្តមានរបស់មកមើលប្តីនៅឡើយទេ ហើយក៏មិនឃើញនៅក្នុងស្រុកភូមិដែរ ទំនងជាទៅនៅជាមួយប្រុសថ្មីនោះហើយមើលទៅ ៕
ចែករំលែកព័តមាននេះ