សហរដ្ឋអាមេរិក ៖ លោកប្រធានាធិបតីជាប់ឆ្នោត Donald Trump បាននិយាយកាលពីថ្ងៃពុធកន្លងមកថា លោកត្រូវបានស្នើឲ្យសហការក្នុងគម្រោងតម្លៃ២ប៊ីលានដុល្លារនៅឌូបៃ ជាមួយក្រុមហ៊ុនអចលនទ្រព្យដ៏ធំ ប៉ុន្តែលោកបានបដិសេធ ព្រោះលោកមិនចង់ឲ្យមាន ជម្លោះផលប្រយោជន៍ បន្ទាប់ពីការបោះ ឆ្នោត។
លោកបាននិយាយក្នុងសន្និសីទកាសែតមួយថា ៖ « កាលពីចុងសប្តាហ៍កន្លងមកនេះ ខ្ញុំត្រូវបានស្នើឲ្យសហការក្នុងគម្រោងមួយតម្លៃ២ប៊ីលានដុល្លារនៅឌូបៃ ជាមួយបុរសដ៏ល្អអស្ចារ្យម្នាក់ក្នុងវិស័យអចលនទ្រព្យនៅមជ្ឈិមបូព៌៌ា ។ ខ្ញុំបានបដិសេធនឹងលោក ទោះជាខ្ញុំមិនចាំបាច់ត្រូវបដិសេធក៏ដោយ » ។
បុរសដែលលោក Trump បាននិយាយដល់នោះ គឺលោក Hussain Sajwani ជាអគ្គនាយករបស់ក្រុមហ៊ុន Damac Properties Dubai Co ។ ក្រុមហ៊ុននេះមានគម្រោងអភិវឌ្ឍន៍កន្លែងវាយកូនហ្គោលចំនួន២ ជាមួយលោក Trump នៅឌូបៃ ដែលបានរកចំណូលដល់លោកប្រមាណ១០លានដុល្លារឯណោះក្នុងឆ្នាំ២០១៥ និងដើមឆ្នាំ២០១៦ ។
អ្នកនាំពាក្យរបស់ Damac លោក Niall McLoughlin និយាយថា៖ « ក្រុមហ៊ុន Damac បញ្ជាក់ថា ការពិភាក្សាគ្នាពិតជាមានមែន ប៉ុន្តែវាត្រូវបានបដិសេធដូចដែលលោក Trump បាននិយាយ » ។
គួរបញ្ជាក់ថា លោក Sajwani និងក្រុមគ្រួសាររបស់លោកបានចូលរួមក្នុងពិធីជប់លៀងឆ្លងឆ្នាំ នៅរមណីយដ្ឋាន Mar-a-Lago ក្នុងរដ្ឋ Florida របស់លោក Trump ផងដែរ ដោយលោក Trump បានកោតសរសើរដល់ដៃគូពាណិជ្ជកម្មរូបនេះមកពីឌូបៃ ។ វាមិនទាន់ច្បាស់នៅឡើយទេថា តើទីនោះជាកន្លែងដែលលោកទាំងពីរបានពិភាក្សាពីរឿងគម្រោងអចលនទ្រព្យបន្ថែម ។
លោក Trump បានប្រកាសពីគម្រោងជាមួយក្រុមហ៊ុន Damac ដំបូងក្នុងឆ្នាំ២០១៤ ជាមួយផែនការលក់វីឡាប្រណីតប្រមាណ១០០ខ្នងនៅជុំវិញទីលានវាយកូនហ្គោលរបស់លោក Trump ដែលនឹងចាប់បើកដំណើរការក្នុងឆ្នាំនេះ ។ ទីលានវាយកូនហ្គោលទី២របស់លោក Trump និងក្រុមហ៊ុន Damac កំពុងត្រូវបានច្នៃម៉ូដដោយលោក Tiger Woods ផងដែរ ។
លោក Trump បន្តទៀតថា ៖ « ខ្ញុំគ្មានស្ថានភាពជម្លោះផលប្រយោជន៍ព្រោះតែខ្ញុំជាប្រធានាធិបតីទេ ប៉ុន្តែខ្ញុំមិនចង់ទាញយកផលប្រយោជន៍ពីអ្វីមួយឡើយ » ៕
ចែករំលែកព័តមាននេះ