រាជធានីភ្នំពេញ ៖ គម្រោងអគារខុនដូ ការិយាល័យ និងផ្សារទំនើប The Bridge ដែលអភិវឌ្ឍន៍ដោយក្រុមហ៊ុន Oxley World Bridge និងទើបប្រកាសបញ្ចប់ការសាងសង់គ្រោងអគារទាំងមូលកាលពីពេលថ្មីៗនេះ
រាជធានីភ្នំពេញ ៖ គម្រោងអគារខុនដូ ការិយាល័យ និងផ្សារទំនើប The Bridge ដែលអភិវឌ្ឍន៍ដោយក្រុមហ៊ុន Oxley World Bridge និងទើបប្រកាសបញ្ចប់ការសាងសង់គ្រោងអគារទាំងមូលកាលពីពេលថ្មីៗនេះ បានប្រកាសលក់គម្រោងផ្ទះពាណិជ្ជកម្ម (Shop house) នៅជាន់ផ្ទាល់ដី និងគម្រោងផ្សារទំនើបរបស់ខ្លួនហើយកាលពីថ្ងៃទី១៣ មករា ម្សិលមិញ ។
លោកឧកញ៉ា សៀ ឫទ្ធី ប្រធានក្រុមប្រឹក្សាក្រុមហ៊ុន World Bridge បានមានប្រសាសន៍ថា ដោយសារតែគម្រោងសាងសង់អគារ The Bridge បញ្ចប់ទៅតាមផែនការនោះ ធ្វើឱ្យក្រុមហ៊ុន និងអតិថិជនមានការត្រេកអរ ។ ដូចនេះហើយក្រុមហ៊ុនក៏បានប្រកាសលក់គម្រោងផ្ទះពាណិជ្ជកម្មនៅក្នុងគម្រោងអគារ The Bridge នៅពេលនេះ ហើយក៏នឹងចាប់ផ្ដើមទទួលការកក់ពីអតិថិជននូវគម្រោងផ្សារទំនើបមួយរបស់ The Bridge ផងដែរ ។ លោកមានប្រសាសន៍ថា ៖ « នៅក្នុងឆ្នាំនេះ អគារ The Bridge របស់យើងនឹងចាប់ផ្ដើមសាងសង់ដេគ័រផ្នែកខាងក្នុង និងសង្ឃឹមថា នៅក្នុងឆ្នាំក្រោយអតិថិជននឹងអាចចូលកាន់កាប់អគាររបស់ខ្លួន ដែលបានទិញ ។ បន្ថែមលើនោះ ក្រុមហ៊ុនសូមបញ្ជាក់ផងដែរថា ក្រុមហ៊ុននឹងចាប់ផ្ដើមលក់ផ្ទះជាន់ក្រោមដែលមាន២ជាន់ ចំនួន៣១ផ្ទះ » ។
លោកបន្តថា លក្ខណៈពិសេសរបស់ផ្ទះជាន់ក្រោមនៃអគារ The Bridge គឺខាងក្រោយជាប់នឹងផ្លូវធំ និងខាងមុខបែរទៅរកផ្សារ ដែលជាផ្សាររបស់ក្រុមហ៊ុនសាងសង់ផ្ទាល់ផងដែរ ហើយប្រកាសលក់ជូនអតិថិជនមានបំណងចង់បានផ្សារសម្រាប់ធ្វើអាជីវកម្ម ។ ដូចនេះ អតិថិជនអាចមកមើលទីតាំងផ្ទះ និងផ្សារដែលក្រុមហ៊ុនប្រកាសលក់នៅពេលឆាប់ៗនេះ ។ លោកនិយាយថា ៖ « ចំពោះផ្សារដែលក្រុមហ៊ុនបើកលក់នោះគឺនៅជាន់ទី២និងទី៣ ក្រុមហ៊ុននឹងធានាជូនអតិថិជនក្នុងអំឡុងពេល៥ឆ្នាំដំបូង ផ្ដល់ជូនវិញក្នុងមួយឆ្នាំ៦% ហើយរយៈពេល៥ឆ្នាំបន្ទាប់ នឹងផ្ដល់ជូន៧%ក្នុងមួយឆ្នាំ ។ នេះសម្រាប់អតិថិជន ឬវិនិយោគិនណាដែលសល់លុយទិញគម្រោងនេះហើយជួលមកឱ្យក្រុមហ៊ុនវិញ ។ ដូចនេះ គ្រាន់តែអតិថិជនទិញហើយជួលមកក្រុមហ៊ុនវិញក្នុងរយៈពេល១០ឆ្នាំ អតិថិជនអាចរកប្រាក់ចំណូលបានស្ទើរតែស្មើនឹងតម្លៃទិញទៅហើយ ។ ដូចនេះ គាត់នឹងចំណេញច្រើន ព្រោះបានទាំងលុយហើយ គាត់នៅសល់តូបក្នុងផ្សារដដែល » ។
លោកឧកញ៉ាបន្ថែមថា ចំពោះតម្លៃផ្ទះពាណិជ្ជកម្មនៃគម្រោង The Bridge គឺចាប់ពី១លានដុល្លារអាមេរិកឡើងទៅ និងអាចធ្វើអាជីវកម្មបានស្ទើរតែ២៤ម៉ោង ហើយតម្លៃផ្សារទំនើបវិញ គឺប្រមាណជាង១០ម៉ឺនដុល្លារអាមេរិកផងដែរ ប៉ុន្តែបើសិនជាអតិថិជនទិញហើយនោះអាចធ្វើអាជីវកម្មដោយផ្ទាល់ខ្លួន ឬក៏ជួលត្រឡប់មកឱ្យក្រុមហ៊ុន រួចក្រុមហ៊ុននឹងជួលត្រឡប់ទៅអតិថិជនផ្សេងជំនួសវិញ ដោយអតិថិជនដែលទិញគម្រោងផ្សារនោះ រង់ចាំតែយកប្រាក់ឈ្មួលស្រាប់ ។
លោកឧកញ៉ាបញ្ជាក់ថា រាល់គម្រោងដែលអភិវឌ្ឍន៍ដោយក្រុមហ៊ុនរបស់លោក ត្រូវមានស្តង់ដាត្រឹមត្រូវ ដោយមានអ្នកសាងសង់ផ្សេង អ្នកលក់ផ្សេង មិនមែនអ្នកអភិវឌ្ឍន៍ អ្នកសាងសង់ និងអ្នកលក់ជាមនុស្សតែមួយទេ គឺត្រូវប្រគល់ការងារដាច់ដោយឡែក និងត្រូវរកអ្នកជំនាញដើម្បីធ្វើការងារនីមួយៗ ។ លោកឧកញ៉ាបញ្ជាក់ថា ៖ « រាល់គម្រោងរបស់យើងខុសពីគម្រោងផ្សេងៗមួយចំនួន យើងអ្នកអភិវឌ្ឍន៍ យើងមិនមានជំនាញសាងសង់ទេ ។ ដូចនេះ ត្រូវប្រគល់ការងារសាងសង់ទៅឱ្យក្រុមហ៊ុនជំនាញជាអ្នកសាងសង់ ហើយយើងក៏គួរតែប្រគល់ការលក់ទៅឱ្យក្រុមហ៊ុនដែលមានជំនាញលក់ជាអ្នកលក់ជំនួសវិញ ដោយគ្រាន់តែយើងចាំតាមដានពិនិត្យមើលបានហើយ ថាតើក្រុមហ៊ុនទាំងនោះធ្វើទៅតាមការចង់បានរបស់យើងដែរឬទេ » ៕
ចែករំលែកព័តមាននេះ