ឡានបុកពីក្រោយ ស្លា.ប់ម្នាក់ របួសម្នាក់
ខេត្តព្រះសីហនុ ៖ យុវជនម្នាក់បានស្លា.ប់នៅនឹងកន្លែង និងម្នាក់ទៀតបានរងរបួស ខណៈយុវជនទាំង២នាក់ កំពុងជិះម៉ូតូតាមបណ្តោយផ្លូវជាតិស្រាប់តែត្រូវរថយន្តបុកពីក្រោយ
ខេត្តព្រះសីហនុ ៖ យុវជនម្នាក់បានស្លាប់នៅនឹងកន្លែង និងម្នាក់ទៀតបានរងរបួស ខណៈយុវជនទាំង២នាក់ កំពុងជិះម៉ូតូតាមបណ្តោយផ្លូវជាតិស្រាប់តែត្រូវរថយន្តបុកពីក្រោយកាលពីវេលាម៉ោង ៨ និង៥៣នាទីយប់ ថ្ងៃទី១៤ ខែមករា ឆ្នាំ២០១៧ តាមបណ្តោយផ្លូវជាតិលេខ៤ ចន្លោះគីឡូម៉ែត្រលេខ១៦២-១៦៣ ស្ថិតនៅភូមិតានៃ ឃុំ ជើងគោ ស្រុកព្រៃនប់ ខេត្តព្រះសីហនុ ។
ប្រភពព័ត៌មានពីកន្លែងកើតហេតុបានឲ្យដឹងថា គ្រោះថ្នាក់នេះបានកើតឡើងរវាងរថយន្តមិនស្គាលម៉ាកបានបុកម៉ូតូម៉ាកវ៉េវ ពណ៌ក្រហម គ្មានស្លាកលេខ ក្នុងទិសដៅស្របគ្នាពីខេត្តព្រះសីហនុទៅភ្នំពេញ ។
ប្រភពដដែលបានបន្តទៀតថា គ្រោះថ្នាក់នេះបានបណ្តាលឲ្យជនរង្គ្រោះភាគីខាងម៉ូតូដែលមានគ្នា២នាក់ ម្នាក់ឈ្មោះ សេម ខេមរា ភេទប្រុស អាយុ១៩ឆ្នាំ ជាអ្នកបើកបរម៉ូតូ មុខរបរកម្មករោងចក្រកាត់ដេរ មានទីលំនៅភូមិចាំស្រី ឃុំកំពង់សិលា ស្រុកកំពង់សិលា ខេត្តព្រីហនុ ស្លាប់នៅនឹងកន្លែងកើតហេតុ ចំណែកម្នាក់ទៀតឈ្មោះ នី សុភស្ភ័ ភេទប្រុស អាយុ១៨ឆ្នាំ មុខរបរកម្មកររោងចក្រកាត់ដេរដូចគ្នា មានទីលំនៅភូមិថ្មី ឃុំកំពង់សិលា ស្រុកកំពង់សិលា ខេត្តព្រះសីហនុ អ្នករួមដំណើរពីក្រោយ រងរបួសស្រាល ។
ប្រភពបានបន្ថែមថា ចំពោះមូលហេតុក្នុងគ្រោះថ្នាក់នេះមិនត្រូវបានគេដឹងថាយ៉ាងណានោះទេ គ្រាន់គេថា ជនរងគ្រោះត្រូវបានរថយន្ត១គ្រឿងមិនស្គាល់ម៉ាកបុកពីក្រោយម៉ូតូជនរងគ្រោះ ហើយបន្តបើកទៅមុខរត់គេចខ្លួនបាត់តែម្តងទោះបីជាមានការតាមពីសំណាក់សមត្ថកិច្ចយ៉ាងណាក៏ដោយ ។
ក្រោយពេលកើតហេតុ សពត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី ចំណែកម៉ូតូត្រូវបានប៉ូលិសស្រុកព្រៃនប់យកទៅរក្សារទុករង់ចាំធ្វើការដោះស្រាយនៅពេលក្រោយ ៕
ចែករំលែកព័តមាននេះ