រាជធានីភ្នំពេញ ៖ បើគ្មានការប្រែប្រួលទេ សម្តេចអគ្គមហាសេនាបតីតេជោ ហ៊ុន សែន នឹងចាកចេញពីព្រះរាជាណាចក្រកម្ពុជានៅវេលាម៉ោង៧យប់ថ្ងៃទី១៥ មករានេះ ដើម្បីអញ្ជើញទៅចូលរួមវេទិកាសេដ្ឋកិច្ចពិភពលោកឆ្នាំ២០១៧ ដែលតាមគម្រោងនឹងប្រព្រឹត្តធ្វើពីថ្ងៃទី១៧ដល់ថ្ងៃទី២០ មករា នៅទីក្រុងដាវ៉ូស ក្លូស្ទ័រប្រទេសស្វីស ។
យោងតាមសេចក្តីជូនព័ត៌មានរបស់ក្រសួងការបរទេសនិងសហប្រតិបត្តិការអន្តរជាតិរបស់ប្រទេសកម្ពុជាបានបញ្ជាក់ឲ្យដឹងថា កិច្ចប្រជុំវេទិកាសេដ្ឋកិច្ចពិភពលោកប្រចាំឆ្នាំគឺជាការជួបជុំថ្នាក់ដឹកនាំពិភពលោកកម្រិតខ្ពស់បំផុតពីរដ្ឋាភិបាល អ្នកជំនួញ អ្នកស្រាវជ្រាវ សង្គមស៊ីវិលនិងប្រព័ន្ឋផ្សព្វផ្សាយ ដែលប្រព្រឹត្តទៅនៅរៀងរាល់ដើមឆ្នាំ ដើម្បីកំណត់របៀបវារៈពិភពលោក តំបន់ និងឧស្សាហកម្ម ។
សេចក្តីជូនព័ត៌មានដដែលបានបញ្ជាក់បន្ថែមទៀតថា វេទិកាសេដ្ឋកិច្ចពិភពលោកដែលប្រទេសស្វីសជាម្ចាស់ផ្ទះនេះ នឹងប្រព្រឹត្តទៅក្រោមប្រធានបទ «ការរៀបចំប្រព័ន្ឋពិភពលោកប្រឈមនឹងភាពមិនច្បាស់លាស់នៃនយោបាយនិងសេដ្ឋកិច្ច» ។ នៅក្នុងវេទិកាសេដ្ឋកិច្ចពិភពលោកឆ្នាំ២០១៧ ដែលនឹងប្រព្រឹត្តទៅនៅថ្ងៃអង្គារសប្តាហ៍ក្រោយនេះ សម្តេចតេជោនាយករដ្ឋមន្ត្រីនឹងចូលរួមក្នុងកិច្ចប្រជុំនានាដែលមានប្រធានបទចំនួន០៨ និងជួបពិភាក្សាទ្វេភាគីជាមួយលោកសាស្ត្រចារ្យ ក្លូស ស្វាប់ ស្ថាបនិកនិងជាប្រធានប្រតិបត្តិវេទិកាសេដ្ឋកិច្ចពិភពលោក ព្រមទាំងជាមួយបណ្តាថ្នាក់ដឹកនាំនៃប្រទេសមួយចំនួនផងដែរ ។
បើតាមសម្តេចតេជោ ហ៊ុន សែន ដែលសរសេរបង្ហោះនៅលើបណ្តាញសង្គមហ្វេសប៊ុកនាព្រឹកថ្ងៃទី១៥ មករានេះ បានបញ្ជាក់ថា «ការចេញទៅបំពេញការងារក្រៅប្រទេសលើកនេះហាក់ដូចជាយូរថ្ងៃបន្តិច តែនេះជាការចាំបាច់។ ឆ្នាំនេះវេទិកាសេដ្ឋកិច្ចពិភពលោកអំពីអាស៊ាននឹងធ្វើនៅកម្ពុជាក្នុងអំឡុងខែឧសភា។ ដូចនេះ វត្តមានរបស់ខ្ញុំក្នុងការចូលរួមវេទិកាសេដ្ឋកិច្ចពិភពលោកនៅទីក្រុងដាវ៉ូសនៃប្រទេសស្វីសគឺជាការចាំបាច់ ។ ខ្ញុំនិងគណៈប្រតិភូ នឹងចាកចេញពីកម្ពុជានៅម៉ោង៧ល្ងាចនេះឆ្ពោះទៅកាន់ហុងកុង បន្ទាប់មកប្តូរយន្តហោះបន្តដំណើរទៅកាន់ទីក្រុង Zurich មុននឹងធ្វើដំណើរតាមរថយន្តទៅកាន់កន្លែងប្រជុំនាទីក្រុងដាវ៉ូសនៃប្រទេសស្វីស ។បណ្តាប្រទេសនៅតំបន់អឺរ៉ុបនាពេលនេះ ធាតុអាកាសត្រជាក់ខ្លាំង ហើយសំរាប់ប្រទេសស្វីសខុសគ្នាជាមួយកម្ពុជាយើង៦ម៉ោងដែលធ្វើឱ្យយើងលំបាកទ្រាំបន្តិច។ ក្រៅពីកិច្ចការក្នុងវេទិកា សេដ្ឋកិច្ចពិភពលោក ខ្ញុំក៏មានគំរោងជួបសំណេះសំណាលផងដែរជាមួយបងប្អូនខ្មែរយើងដែលកំពុងរស់នៅប្រទេសស្វីស។» ៕
ចែករំលែកព័តមាននេះ