អង់គ្លេសកោះហៅឯកអគ្គរដ្ឋទូតចិនមកសួររឿងសមយុទ្ធជុំវិញកោះតៃវ៉ាន់
អង់គ្លេស ៖ រដ្ឋមន្ត្រីការបរទេសអង់គ្លេសលោកស្រី Liz Truss កាលពីថ្ងៃពុធ ទី ១០ សីហា បានកោះហៅ
អង់គ្លេស ៖ រដ្ឋមន្ត្រីការបរទេសអង់គ្លេសលោកស្រី Liz Truss កាលពីថ្ងៃពុធ ទី ១០ សីហា បានកោះហៅឯកអគ្គរដ្ឋទូតចិនប្រចាំអង់គ្លេសលោក Zheng Zeguang ឲ្យមកពន្យល់អំពីសកម្មភាពរបស់ចិនចំពោះកោះតៃវ៉ាន់ បន្ទាប់ពីដំណើរទស្សនកិច្ចរបស់ប្រធានសភាអាមេរិកលោកស្រី Nancy Pelosi។
ចិនខឹងសម្បារយ៉ាងខ្លាំងចំពោះដំណើរទស្សនកិច្ចរបស់លោកស្រី Pelosi និងបានធ្វើសមយុទ្ធទ្រង់ទ្រាយធំមិនធ្លាប់មាននៅក្នុងដែនទឹកជុំវិញកោះតៃវ៉ាន់។
រដ្ឋមន្ត្រីការបរទេសអង់គ្លេសនិយាយក្នុងសេចក្តីប្រកាសថា «ខ្ញុំបានណែនាំឲ្យមន្ត្រីកោះហៅឯកអគ្គរដ្ឋទូតចិនមកពីពន្យល់ពីសកម្មភាពរបស់ប្រទេសគាត់។ យើងបានឃើញអាកប្បកិរិយាឈ្លានពានកាន់តែខ្លាំងឡើង និវោហាសាស្ត្រពីទីក្រុងប៉េកាំងក្នុងរយៈពេលប៉ុន្មានខែចុងក្រោយនេះ ដែលគំរា.មកំហែងដល់សន្តិភាព និងស្ថិរភាពនៅក្នុងតំបន់»។
«ចក្រភពអង់គ្លេសជំរុញឲ្យចិនដោះស្រាយការខ្វែងគំនិតគ្នាដោយសន្តិវិធី ដោយគ្មានការគំរា.មកំហែង ឬការប្រើកម្លាំង ឬការបង្ខិតបង្ខំ»។
ជាការឆ្លើយតប បន្ទាប់ពីកិច្ចប្រជុំជាមួយនឹងមន្ត្រីជាន់ខ្ពស់អង់គ្លេស ស្ថានទូតចិនបាននិយាយថា លោក Zheng Zeguang បាន «ច្រានចោលយ៉ាងម៉ឺងម៉ាត់ និងថ្កោលទោសយ៉ាងខ្លាំងចំពោះវោហាសាស្ត្រមិនទទួលខុសត្រូវរបស់ភាគីអង់គ្លេសអំពីការឆ្លើយតបស្របច្បាប់ និងចាំបាច់របស់ចិនចំពោះដំណើរទស្សនកិច្ចរបស់ប្រធានសភាអាមេរិកទៅតៃវ៉ាន់»។
សេចក្តីប្រកាសរបស់ស្ថានទូតចិននិយាយថា «គ្មានប្រទេសបរទេសណា រួមទាំងចក្រភពអង់គ្លេស មានសិទ្ធិជ្រៀតជ្រែកចូលកិច្ចការផ្ទៃក្នុងរបស់ចិននោះទេ»៕ (យោងតាមប្រភព៖ Reuters)
ចែករំលែកព័តមាននេះ