ឆ្នាំ2016គ្រោះថ្នាក់ចរាចរណ៍នៅស្វាយរៀងស្លា.ប់58នាក់ របួស600នាក់
ខេត្តស្វាយរៀង ៖ នៅខេត្តស្វាយរៀងមានមនុស្សស្លា.ប់៥៨នាក់ និងជាង៦០០នាក់ផ្សេងទៀតបានរងរបួសធ្ងន់-ស្រាលដោយគ្រោះថ្នាក់ចរាចណ៍ក្នុងឆ្នាំ២០១៦
ខេត្តស្វាយរៀង ៖ នៅខេត្តស្វាយរៀងមានមនុស្សស្លាប់៥៨នាក់ និងជាង៦០០នាក់ផ្សេងទៀតបានរងរបួសធ្ងន់-ស្រាលដោយគ្រោះថ្នាក់ចរាចណ៍ក្នុងឆ្នាំ២០១៦ ដែលតាមតួលេខនេះ គឺគ្រោះថ្នាក់ចរាចណ៍មានការកើនឡើងជាងឆ្នាំ២០១៥ចំនួន៣២លើក ។ នេះបើយោងតាមមន្ត្រីចរាចរណ៍ខេត្តបានឱ្យដឹងកាលពីថ្មីៗនេះ ហើយដើម្បីបង្ការទប់ស្កាត់គ្រោះថ្នាក់ចរាចរណ៍លោកអភិបាលខេត្តបង្កើតបានគណៈកម្មការសុវត្ថិភាពចរាចរណ៍ផ្លូវគោកចុះអនុវត្តច្បាប់ឱ្យមានប្រសិទ្ធភាព ។
បើតាមមន្ត្រីការិយាល័យចរាចរណ៍ផ្លូវគោកនៃស្នងការនគរបាលខេត្តស្វាយរៀងបានប្រាប់ឱ្យដឹងនៅព្រឹកថ្ងៃទី១៣ មករា ២០១៧ថា ក្នុងឆ្នាំ២០១៦ នៅទូទាំងខេត្តមានគ្រោះថ្នាក់ចរាចរណ៍ចំនួន១៧៧លើក បើប្រៀបធៀបទៅនឹងឆ្នាំ២០១៥ មានការកើនឡើងចំនួន៣២លើក ស្មើនឹង១៨% ក្នុងនោះបង្កឱ្យមនុស្សចំនួន៥៨នាក់ស្លាប់ និងជាង៦០០នាក់ផ្សេងទៀត បានរងរបួសធ្ងន់-ស្រាល ។ កត្តាដែលបង្កឱ្យមានគ្រោះថ្នាក់ចរាចរណ៍មានការកើនឡើង ដោយសារអ្នកបើកបរប្រើប្រាស់ល្បឿនលឿនចំនួន៤៧លើក បើកបរមិនគោរពសិទ្ធិអាទិភាពចំនួន៤៧លើក បើកបរមិនមើលឆ្វេងស្តាំ២២លើក បើកបរមិនប្រកាន់ស្តាំ២២លើក បើកបរក្នុងស្ថានភាពស្រវឹង២០លើក បើកបរជែងក្នុងស្ថានភាពគ្រោះថ្នាក់១៧លើក និងបើកបរក្នុងស្ថានភាពសុខភាពមិនល្អ២លើក ។ ក្នុងនោះបានកើតឡើងនៅក្រុងបាវិតចំនួន៤៨លើក ក្រុងស្វាយរៀង៤៥លើក ស្រុករមាសហែក២៣លើក ស្រុកស្វាយជ្រំ២០លើក ស្វាយទាប១៧លើក រំដួល១០លើក កំពង់រោទ៍៨លើក និងស្រុកចន្ទ្រា៦លើក និងធ្វើឱ្យមធ្យោបាយយានយន្ត តូច ធំ កង់ និងម៉ូតូ ខូចខាត ជិត៣០០គ្រឿង ។
មន្ត្រីចរាចរណ៍រូបនេះបានបន្តទៀតថា នៅក្នុងរយៈពេល១ឆ្នាំ២០១៦នេះ ក្រុមការងារចម្រុះរបស់ខេត្តបានចុះធ្វើការផ្សព្វផ្សាយអប់រំច្បាប់ចរាចរណ៍ដល់ក្រុមបើកបរដឹកជញ្ជូននៅតាមតំបន់ រោងចក្រ សហគ្រាស សាលារៀន និងគ្រឹះស្ថាននានាបានចំនួន៨៧លើក មានអ្នកចូលរួមស្តាប់ និងទទួលប័ណ្ណព័ត៌មានដើម្បីរៀនសូត្របឋមស្តីពីការបើកបរជិត២ម៉ឺននាក់ផងដែរ ហើយបានបន្តចុះរឹតបន្តឹងការអនុវត្តច្បាប់ចរាចរណ៍នៅលើផ្លូវជាតិលេខ១ ចាប់ពីផ្សារក្រោលគោស្រុកស្វាយជ្រំ រហូតដល់ក្រុងបាវិតជាពិសេសអនុវត្តទៅលើអ្នកបើកបររថយន្តដឹកកម្មករ គឺចាប់អនុវត្តរយៈពេល៣ថ្ងៃ ចាប់ពីថ្ងៃទី១១ មករា ដល់ថ្ងៃ១៤ មករា ២០១៧ ។
ប្រភពដដែលបន្តទៀតថា ដោយអនុវត្តតាមផែនការលេខ០០១ ចុះថ្ងៃទី៦ ខែមករា ឆ្នាំ២០១៧ ស្តីពីការរៀបចំសណ្តាប់ធ្នាប់ចរាចរណ៍ នៅក្រុងបាវិត និងក្រុងស្វាយរៀងរយៈពេល ៣ថ្ងៃ របស់គណៈបញ្ជាការឯកភាពខេត្តមានលោក ម៉ែន វិបុល អភិបាលខេត្តស្វាយរៀងដឹកនាំ, លោកឧត្តមសេនីយ៍ទោ កឹង ឃន ស្នងការនគរបាលខេត្តស្វាយរៀង បានចុះដឹកនាំបញ្ជាកងកម្លាំងផ្ទាល់ សហការជាមួយកម្លាំងកងរាជអាវុធហត្តខេត្ត ដើម្បីរៀបចំសណ្តាប់ធ្នាប់ រថយន្តដឹកកម្មករ រថយន្តដឹកអ្នកដំណើរ រថយន្តទេសចរណ៍ លើទ្រូងផ្លូវតាមបណ្តោយផ្លូវជាតិលេខ១ ខាងមុខតំបន់សេដ្ឋកិច្ចពិសេសក្នុងក្រុងស្វាយរៀង ក្រុងបាវិត និងបានធ្វើពិធីផ្សព្វផ្សាយអប់រំដល់អ្នកបើកបររថយន្តដឹកកម្មករ ។
តាមប្រសាសន៍លោកឧត្តមសេនីយ៍ទោ កឹង ឃន ស្នងការនគរបាលខេត្តបានបញ្ជាក់ឱ្យដឹងថា យុទ្ធនាការឈរលើទ្រូងផ្លូវសម្រួលចរាចរណ៍កុំឱ្យមានការកកស្ទះនៅពេលម៉ោងរថយន្តដឹកកម្មករកម្មការិនីចូលធ្វើការនិងចេញពីធ្វើការនេះមានរយៈពេលបីថ្ងៃ ដោយប្រើប្រាស់កម្លាំងសរុប២៦៥នាក់ មានគោលដៅសំខាន់ៗតាមបណ្តោយផ្លូវជាតិលេខ១ មុខរោងចក្រលូថៃ ក្រុងស្វាយរៀង មុខតំបន់សេដ្ឋកិច្ចសានតុង នាគរាជ តាយសេង តាយសេង១ និង តំបន់សេដ្ឋកិច្ចពិសេសមេនហាតធានក្នុងក្រុងបាវិត ។ ជាពិសេសលោកឧត្តមសេនីយ៍ ស្នងការ ក៏បានចុះទៅប្រជុំផ្សព្វផ្សាយពន្យល់ពីច្បាប់ចរាចរណ៍ ដល់អ្នកបើករថយន្តដឹកកម្មករដោយផ្ទាល់ ដើម្បីឱ្យអ្នកបើកបរគ្រប់រូបមានការយល់ដឹងពីច្បាប់ចរាចរណ៍ លក្ខណៈបច្ចេកទេសរថយន្ត ដែលអ្នកបើកបរត្រូវមានក្រមសីលធម៌ក្នុងការបើកបរ ហើយចេះយោគយល់គ្នា បើកបរមានសណ្តាប់ធ្នាប់ មានរបៀបរៀបរយ និងត្រូវប្រកាន់ស្តាំជានិច្ច ដើម្បីបញ្ចៀសបាននូវគ្រោះថ្នាក់ចរាចរណ៍ និងការកកស្ទះ ព្រមទាំងបានឱ្យអ្នកបើកបរឡានដឹកកម្មករធ្វើកិច្ច សន្យា អនុវត្តសីលធម៌១០ចំណុច ដែលដាក់ចេញដោយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក ។
គួររំលឹកផងដែរថា មុនថ្ងៃចុះយុទ្ធនាការនេះ នៅស្នងការដ្ឋាននគរបាលខេត្តស្វាយរៀង ក៏បានធ្វើការហ្វឹកហាត់ពីរបៀបបញ្ជានិងសម្រួលយានយន្ត ដល់កងកម្លាំង និងមានបំពាក់ឧបករណ៍ សម្ភារដូចជា ឯកសណ្ឋាន កញ្ចែ ពិលចរាចរណ៍ និងសាជី ដែលជាការច្នៃរបស់លោកឧត្តមសេនីយ៍ស្នងការ ៕
ចែករំលែកព័តមាននេះ