អាជ្ញាធរខេត្តមណ្ឌលគិរីបានត្រៀមរួចស្រេចនៅទីទួលសុវត្ថិភាព និងមធ្យោបាយសម្រាប់ជួយសង្គ្រោះបន្ទាន់ដល់ប្រជាពលរដ្ឋដែលរងគ្រោះដោយសារទឹកជំនន់ បន្ទាប់ពី
ខេត្តមណ្ឌលគិរី៖ អាជ្ញាធរខេត្តមណ្ឌលគិរីបានត្រៀមរួចស្រេចនៅទីទួលសុវត្ថិភាព និងមធ្យោបាយសម្រាប់ជួយសង្គ្រោះបន្ទាន់ដល់ប្រជាពលរដ្ឋដែលរងគ្រោះដោយសារទឹកជំនន់ បន្ទាប់ពីភ្លៀងធ្លាក់ខ្លាំងជាបន្តបន្ទាប់រយៈពេលកន្លងមកនេះ នៅតាមបណ្តាឃុំមួយចំនួន ក្នុងស្រុកកោះញែក ដើម្បីត្រៀមកម្លាំងការពារទុកជាមុននូវគ្រោះមហន្តរាយនានា ដែលអាចកើតឡើងនៅតំបន់ដែលប្រឈមនឹងជំនន់ទឹកភ្លៀងដោយជាយថាហេតុ។
លោក ឈឹម កាន អភិបាលខេត្តស្តីទី បានឲ្យដឹងថា ដោយមានការយកចិត្តទុកដាក់ពីសំណាក់ឯកឧត្តម ថង សាវុន អភិបាលខេត្តមណ្ឌលគិរី ដើម្បីត្រៀមបង្ការ និងដោះស្រាយឱ្យបានទាន់ពេលវេលា ក្នុងករណីមានគ្រោះជំនន់ទឹកភ្លៀង ដូច្នេះក្រុមការងារចុះត្រួតពិនិត្យពីស្ថានភាពទឹក និងការខូចខាតនូវហេដ្ឋារចនាសម្ព័ន្ធ ដោយសារជំនន់ទឹកភ្លៀង និងត្រៀមបង្ការនូវមធ្យោបាយនានា សម្រាប់ឲ្យប្រជាពលរដ្ឋធ្វើដំណើរទៅមកបាន។
លោកបានបញ្ជាក់ថា ក្នុងស្ថានភាពភ្លៀងធ្លាក់ជាប់ៗគ្នានៅខេត្តមណ្ឌលគិរី រហូតមកដល់ពេលនេះ បានរងផលប៉ះពាល់ផ្លូវ ស្ពាន នៅតាមបណ្តាឃុំ ក្នុងស្រុកកោះញែក តែមិនបណ្តាលឲ្យបាត់បង់ដល់អាយុជីវិត និងមិនមានការខូចខាតដល់លំនៅដ្ឋាន រួមទាំងដំណាំប្រជាពលរដ្ឋធ្ងន់ធ្ងរនោះទេ។
លោកបន្ថែមថា ក្នុងការចុះពិនិត្យស្ថានភាពទឹកនេះ អាជ្ញាធរខេត្ត និងស្រុក ក៏បានដាក់កម្លាំងការពារត្រៀមទូកចំនួន២គ្រឿង សម្រាប់ចម្លងប្រជាពលរដ្ឋធ្វើដំណើរទៅមកនៅឃុំណងឃីលឹក។ ម្យ៉ាងទៀត ក៏សូមឲ្យប្រជាពលរដ្ឋទាំងអស់ ជាពិសេសប្រជាពលរដ្ឋដែលរស់នៅតាមដងទន្លេស្រែពក និងអូរច្បារ ត្រូវមានការប្រុងប្រយ័ត្នខ្ពស់ ចំពោះស្ថានភាពទឹកនេះផងដែរ។
ចំណែកតាមរបាយការណ៍របស់លោក ឌឹម នី អភិបាលស្រុកកោះញែក ក៏បានឱ្យដឹងដែរថា បន្ទាប់ពីមានភ្លៀងធ្លាក់ផ្ទួនៗចាប់ពីថ្ងៃទី០៥ ខែសីហា រហូតដល់ថ្ងៃទី១០ ខែសីហា ឆ្នាំ២០២២ បានធ្វើឲ្យមានជំនន់ទឹកភ្លៀងជន់លិចហេដ្ឋារចនាសម្ព័ន្ធ តាមបណ្តាឃុំ ក្នុងស្រុកកោះញែក រួមមាន ៖
ទី១- ឃុំណងឃីលឹក ស្រុតបាកក្បាលស្ពានអូរជីមៀត ១កន្លែង ប្រវែង២០ម៉ែត្រ និងលិចផ្លូវ១កន្លែង ចំណុចក្បែរអូរជីមាត ផ្លូវទៅកោះម្យើលប្រវែង១០០ម៉ែត្រ បច្ចុប្បន្នរដ្ឋបាលស្រុក បានដាក់ទូក២គ្រឿង សម្រាប់ចម្លងប្រជាពរដ្ឋ។
ទី២- នៅឃុំរយ៉ លិចផ្លូវលំ១កន្លែង ចំណុចស្ពានរវ៉ាក់ ផ្លូវទៅស្រែជ្រៃប្រវែង៥០ម៉ែត្រ ។
ទី៣- នៅឃុំសុខសាន្ត លិចផ្លូវលំ១កន្លែងចំណុចសែនធំ ផ្លូវទៅស្រែថាស ប្រវែង៥០ម៉ែត្រ ។
ទី៤- ភូមិស្រែហ៊ុយ លិចផ្លូវលំ ១កន្លែងចំណុចថងប៉ាង ប្រវែង ៥០ម៉ែត្រ៕
ចែករំលែកព័តមាននេះ